বিতৰ্কিত নাগৰিকত্ব বিধেয়ক গৃহীতকৰণৰ স্পষ্ট সংকল্পৰে বিজেপিয়ে সোমবাৰে দেশৰ সমাগত লোকসভা নিৰ্বাচনৰ ৰাষ্ট্ৰীয় ইস্তাহাৰ প্ৰকাশ কৰাৰ লগে লগে জাঙুৰ খাই উঠা সদৌ অসম ছাত্ৰ সন্থাই দলটোক নিৰ্বাচনত “উচিত প্ৰত্যুত্তৰ” দিবলৈ অসমৰ ৰাইজক মুকলি আহ্বান জনাইছে।
“ইয়াৰ পিছত আৰু বহি থকাৰ কথা নাই। গণতন্ত্ৰত ৰাইজেই ৰজা। ৰাইজে এই দলটোক উচিত প্ৰত্যুত্তৰ দি অসমৰ ওপৰত জাপি দিব খোজা এনেধৰণৰ জাতিধ্বংসী সিদ্ধান্ত বিতাড়িত কৰিবৰ কাৰণে পদক্ষেপ গ্ৰহণ কৰিব পাৰে। অসমৰ জনসাধাৰণক তেওঁলোকে যোৱা ৫ বছৰে নিৰ্য্যাতন কৰিছে। ৰাইজে যদি কঠোৰ আৰু নিৰ্ণায়ক সিদ্ধান্ত গ্ৰহণ কৰে তেন্তে তেওঁলোকে আৰু আমাক এইধৰণে অত্যাচাৰ, নিৰ্য্যাতন কৰিব নোৱাৰিব।”, নতুন দিল্লীত প্ৰধান মন্ত্ৰী নৰেন্দ্ৰ মোদী, বিজেপিৰ ৰাষ্ট্ৰীয় সভাপতি অমিত শ্বাহ আৰু কেন্দ্ৰীয় গৃহ মন্ত্ৰী ৰাজনাথ সিঙে ইস্তাহাৰখন মুকলি কৰাৰ লগে লগে গুৱাহাটীত এক জৰুৰী সংবাদমেলযোগে এই আহ্বান আছুৰ সভাপতি দীপাংক কুমাৰ নাথৰ।
বিজেপিক পুলিয়ে-পোখাই উভালাৰ আহ্বান জনাই আছুৰ সভাপতিজনে লগতে অভিযোগ কৰে যে দলটোৱে জনসাধাৰণক বিপথে পৰিচালিত কৰি ভোট আদায়ৰ বাবে “কাৰচাজি”ৰ কৌশল লৈছে।
“সম্পূৰ্ণ ধৰ্মনিৰপেক্ষ অসমৰ জনসাধাৰণক তেওঁলোকে হিন্দু-মুছলমানৰ নামত ভাগ ভাগ কৰিব। আৰু নাগৰিকত্ব বিধেয়ক আমাৰ ওপৰত জাপি দি আমাৰ সভ্যতা-সংস্কৃতি বিনাশ কৰিব।”, গেৰুৱা দলৰ ধৰ্মীয় মেৰুকৰণৰ “অপসংস্কৃতি” সন্দৰ্ভত অসমৰ ৰাইজলৈ সাৱধানবাণী নাথৰ।
গেৰুৱা দলৰ বিৰুদ্ধে ভোটদানৰ বিকল্প হিচাপে কোনো দলৰে নাম নলৈ “জাতিধ্বংসী” নাগৰিকত্ব বিধেয়ক বিৰোধিতাক নিৰ্বাচনৰ আধাৰৰূপে ল’বলৈ সংগঠনটোৱে আহ্বান জনাইছে। বিধেয়ক “বিৰোধী” অগপই নিৰ্বাচনৰ পূৰ্বে পুনৰ বিজেপিৰ সৈতে মিত্ৰতা গঢ়াৰ বিপৰীতে গেৰুৱা দলৰ মূল প্ৰতিদ্বন্দ্বী কংগ্ৰেছে নিজৰ ৰাষ্ট্ৰীয় ইস্তাহাৰত বিধেয়ক চূড়ান্তভাৱে “বাতিল”ৰ ঘোষণা কৰিছে।
লগতে পঢ়ক– কংগ্ৰেছৰ ৰাষ্ট্ৰীয় ইস্তাহাৰত নাগৰিকত্ব বিধেয়ক বাতিলৰ প্ৰতিশ্ৰুতি
আনহাতে বিজেপিৰ আকোৰগোঁজালিৰ বিপৰীতে বিধেয়কবিৰোধী আন্দোলন অব্যাহত থাকিব বুলিও ছাত্ৰ সন্থাই স্পষ্ট কৰি দিছে।
“বিধেয়কখন প্ৰতিহত কৰিবৰ কাৰণে যত যি কৰিব লাগে কৰিবলৈ ছাত্ৰ সন্থা বদ্ধপৰিকৰ।”, অসম তথা উত্তৰ-পূবৰ ৰাইজক লগত লৈ ছাত্ৰ সন্থাসহ ৩০টা সংগঠন আৰু নেছ’ই বিধেয়কবিৰোধী আন্দোলন চলাই নিব বুলি বিজেপি নেতৃত্বাধীন চৰকাৰক সকীয়াই মন্তব্য নাথৰ।
