এক পৰিকল্পিত মায়াজাল। সুন্দৰীৰ আছে এক মায়াসনা কাহিনী। অবিবাহিত ডেকাসকল সহজেই জালত পৰে। প্ৰেমত মজি জালত পৰা বুলি গম পোৱাৰ লগে লগে যুৱতীগৰাকীয়ে বিয়াৰ প্ৰস্তাৱ দিয়ে। আৰু বিয়াৰ পিছতে পলায়ন!
অৱশ্যে খালী হাতেৰে নহয়। গহনা আৰু টকা লুট কৰি শহুৰেকৰ ঘৰৰ পৰা বাৰে বাৰে পলায়ন কৰি আহিছিল অনুৰাধা পাছৱানে। এইবাৰ সামান্য ভুল হ’ল। সেইবাবেই ধৰা পৰিল। যুৱতীগৰাকীয়ে এনেদৰে ২৫খন বিয়াৰ পৰা লাখ লাখ টকা আৰু গহনা লুট কৰাৰ অভিযোগ উঠিছে। ৰাজস্থান আৰক্ষীয়ে গ্ৰেপ্তাৰ কৰিছে এই ‘চুৰুণী কইনা’ক।
কেৱল এই ‘মায়াৰাণীয়ে’ই নহয়, দলত আছে আৰু লোক৷ অভিযান চলোৱাটো কঠিন। আৰক্ষীৰ সূত্ৰ অনুসৰি অভিযুক্ত যুৱতীগৰাকীৰ প্ৰকৃত নাম অনুৰাধা পাছৱান। অৱশ্যে প্ৰৱঞ্চনাৰ সুবিধাৰ বাবে তেওঁ বেলেগ নাম আৰু স্থানত ঘৰ ভাড়াত লৈছিল। তাই দুখীয়া কইনাৰ অভিনয় কৰি স্থানীয় যুৱক-যুৱতীক ছলনা কৰি নিজৰ জালত পেলাইছিল।
অনুৰাধাৰ মানুহে বিয়াৰ প্ৰস্তাৱটো ডেকাজনৰ পৰিয়াললৈ লৈ যায়। কইনাৰ অসহায় জীৱনৰ কাহিনী কয়। বেছিভাগ ক্ষেত্ৰতে তেনে কৰিলে দৰাপক্ষৰ অন্তৰ গলি যায়। বিয়াখনো ঠিকেই হৈ যায়। অনুৰাধাৰ দলৰ সদস্যসকলে এই অনুষ্ঠান আয়োজন কৰাৰ বাবে দুই লাখ টকা লয়।
প্ৰতাৰণা ইয়াতেই শেষ নহয়। বিয়াৰ পিছত অনুৰাধা পৰিকল্পনা অনুসৰি কিছুদিন শহুৰেকৰ ঘৰত থাকে। ঘৰৰ মানুহবোৰক তেওঁৰ ভাল আচৰণৰে মোহত পৰিবলৈ বাধ্য কৰাইছিল। সকলোৰে আস্থা লাভ কৰাৰ পিছত এদিন খাদ্য বা পানীয়ৰ লগত নিচাযুক্ত দ্ৰব্য মিহলাই শহুৰেকৰ ঘৰৰ সদস্যসকলক খুৱাই দিয়ে। তাৰপিছত নগদ ধন-গহনা চুৰি কৰি পলাই যায়।
এইবাৰো অনুৰাধাই একেদৰেই এটা পৰিয়ালক জালত পেলালে। যোৱা ২০ এপ্ৰিলত ‘চুৰুণী কইনা’গৰাকীয়ে সাৱাই মাধোপুৰৰ নিবাসী বিষ্ণু শৰ্মাৰ সৈতে বিবাহপাশত আবদ্ধ হয়। বিবাহৰ ব্যৱস্থা কৰি দিয়াৰ বাবে বিষ্ণুৰ পৰিয়ালে জনৈক পাপ্পু মীনাক দুইলাখ টকা দিছিল বুলি আৰক্ষীয়ে জানিবলৈ দিয়ে।
বিয়াৰ দুসপ্তাহৰ ভিতৰতে অনুৰাধাই ডেৰ লাখ টকাৰ গহনা, নগদ ৩০ হাজাৰ টকা আৰু এটা মোবাইল লৈ পলায়ন কৰে। সমস্যাটো হ’ল বিষ্ণু আন প্ৰতাৰিত মানুহৰ দৰে কেৱল হতাশ হৈয়ে ক্ষান্ত নাছিল। তেওঁ ততালিকে থানাত গৈ এজাহাৰ দাখিল কৰে। তদন্তৰ অন্তত অনুৰাধাক গ্ৰেপ্তাৰ কৰিছে আৰক্ষীয়ে। বাকী গেংটোৰ সন্ধান চলি আছে।
