বিগত কিছু দিনৰ পৰা লাভ জেহাদৰ বিৰুদ্ধে কেবাখনো ৰাজ্যই আইন প্ৰণয়ন কৰাৰ প্ৰসংগই দেশত বিশেষভাৱে চৰ্চা লাভ কৰি আছে।
দেশৰ বিজেপি শাসিত ইখনৰ পিছত সিখন ৰাজ্যই লাভ জেহাদৰ বিৰুদ্ধে আইন প্ৰণয়নৰ বাবে সাজু হৈছে।
ইতিমধ্যে উত্তৰ প্ৰদেশৰ ৰাজ্যপালে লাভ জেহাদ বিৰোধী অধ্যাদেশত স্বাক্ষৰ কৰাৰ বিপৰীতে মধ্য প্ৰদেশ চৰকাৰে অতি শীঘ্ৰেই বিধানসভাত বিধেয়ক উত্থাপন কৰাৰ কথা।
তেনে এক সময়ত উচ্চতম ন্যায়ালয়ৰ এগৰাকী প্ৰাক্তন ন্যায়াধীশে ইয়াৰ বিৰুদ্ধে সোচ্চাৰ হোৱা দেখা গৈছে।
দেশৰ সৰ্বোচ্চ ন্যায়ালয়ৰ প্ৰাক্তন ন্যায়াধীশ মদন লুকুৰে ইয়াৰ বিৰোধিতা কৰি কয় যে লাভ জেহাদ ৰোধৰ আইন মানৱাধিকাৰ বিৰোধী। লুকুৰ মতে এই আইনে ব্যক্তিৰ পচন্দৰ স্বাধীনতাকো খৰ্ব কৰিব।
“সম্প্ৰতি উত্তৰ প্ৰদেশত যিখন অধ্যাদেশ পাচ কৰা হৈছে সেয়া দুৰ্ভাগ্যজনক। আইনখনত জোৰকৈ প্ৰতাৰণা অথবা ধৰ্মান্তকৰণৰ মাধ্যমেৰে বিয়া কৰোৱা কথা কোৱা হৈছে। এই আইনে পচন্দৰ স্বাধীনতা, মৰ্যাদা অথবা মানৱাধিকাৰক উপেক্ষা কৰিছে।” তেওঁ কয়।
এই আইনে উচ্চতম ন্যায়ালয়ৰ বিবাহ আইনকো লংঘন কৰিছে বুলি দাবী কৰি “২০১৮ চনৰ হাদিয়া গোচৰত উচ্চতম ন্যায়ালয়ে যি আইনৰ কথা কৈছিল সেয়া কি হ’ব?” বুলিও তেওঁ প্ৰশ্ন কৰে।
