প্ৰেমিকে কিশোৰী প্ৰেমিকাক বিহ খুৱাই পিছত জ্বলাই হত্যা কৰি মৃতদেহ পেলালে জংঘলত
গৌৰীপুৰত প্ৰেমিকে কিশোৰী প্ৰেমিকাক প্ৰথম অৱস্থাত বিহ খুৱাই ইয়াৰ পিছতে জ্বলাই হত্যা কৰা ঘটনা আজি পোহৰলৈ অহাত ঘটনাটোৱে স্থানীয় লোকৰ মাজত তীব্ৰ চাঞ্চল্যৰ সৃষ্টি কৰিছে।
নিহত কিশোৰী গৰাকীক গোৰীপুৰৰ বগৰীবাৰী থানাৰ অন্তৰ্গত ৰঙামাটি তৃতীয়খণ্ডৰ বাসিন্দা অজুদ্দিন শ্বেখৰ দ্বিতীয় কন্যা মঞ্জু খাতুন বুলি চিনাক্ত কৰা হৈছে। মঞ্জু খাতুনে অষ্টম শ্ৰেণীত অধ্যয়ন কৰি আছিল।
নিহত কিশোৰীগৰাকীৰ একেগাঁৱৰে ছোৰহাব আলীৰ পুত্ৰ ছহিদুল ইছলাম(১৯)ৰ সৈতে প্ৰেমৰ সম্পৰ্ক আছিল বুলি স্থানীয় একাংশ লোকৰ পৰা জানিব পৰা গৈছে।
‘দুয়োৰে মাজত থকা প্ৰেমৰ সম্পৰ্কৰ বাবে ছহিদুলে প্ৰায়ে কিশোৰীগৰাকীৰ ঘৰলৈ আহ-যাহ কৰিছিল। ইয়াৰ মাজতে ঈদৰ দিনাই দুয়ো প্ৰেমিক-প্ৰেমিকাৰ মাজত তৰ্কাতৰ্কি লাগিছিল। কালি নিশা পৰিয়ালৰ লোক শুই থকা অৱস্থাত কিশোৰীগৰাকীক প্ৰেমিক ছহিদুলে সমীপৰে এখল জংঘললৈ মাতি নিয়ে। ইয়াৰ কিছু সময়ৰ পিছতে আমি চিঞৰ-বাখৰ শুনাত ঘটনাস্থলীত উপস্থিত হৈ কিশোৰীগৰাকীৰ জ্বলি ছাই হোৱা মৃতদেহ দেখা পাঁও’, স্থানীয় লোকৰ মন্তব্য।
কিশোৰী গৰাকীৰ মৃতদেহৰ কাষত এটা পইজনৰ বটল আৰু এটা কেৰাচিনৰ বটল উদ্ধাৰ হয়। ছহিদুলে প্ৰথমে বিহ খুৱাই ইয়াৰ পিছতে জ্বলাই কিশোৰী গৰাকীক হত্যা কৰে বুলি কিশোৰীগৰাকীৰ পৰিয়ালৰ লোকে অভিযোগ উত্থাপন কৰিছে।
ঘটনা সন্দৰ্ভত আৰক্ষী অৱগত হোৱাত ঘটনাস্থলীত আৰক্ষী উপস্থি হৈ তদন্ত আৰম্ভ কৰে। আৰক্ষীয়ে কিশোৰী গৰাকীৰ পহী মাজৰ পৰা কেইবাখনো প্ৰেম পত্ৰ উদ্ধাৰ কৰিছে।
ইফালে অভিযুক্ত ছহিদুল আৰু ছহিদুলৰ পৰিয়ালৰ লোক বৰ্তমান বাতৰি লিখা পৰলৈকে পলাতক হৈ আছে। আৰক্ষীয়ে অভিযুক্তৰ সন্ধানত অনুসন্ধান আৰম্ভ কৰিছে বুলি জানিব পৰা গৈছে।