বিজেপিয়ে অতি নিকৃষ্ট ৰাজনীতি কৰিছে। এয়া হিন্দুত্ব হ’বই নোৱাৰে। বিজেপি চৰকাৰৰ প্ৰতি পুনৰ এইদৰে বিষোদগাৰ প্ৰকাশ কৰিছে মহাৰাষ্ট্ৰৰ মুখ্যমন্ত্ৰী উদ্ধৱ ঠাকৰেই।
আজি তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৱে ঠাকৰেক লগ ধৰে। উল্লেখযোগ্য যে ৰাওৱে শেহতীয়াকৈ বিজেপি বিৰোধী এটা নতুন মিত্ৰযোঁট গঠনৰ বাবে প্ৰস্তুতি অব্যাহত ৰাখিছে।
তেনে পৰিস্থিতিত কাষৰীয়া ৰাজ্য মহাৰাষ্ট্ৰৰ মুখ্যমন্ত্ৰী ঠাকৰেৰ সৈতে সাক্ষাৎ কৰাটোৱে ব্যাপক চৰ্চা লাভ কৰিছে। সাক্ষাৎকালছোৱাত ৰাওক সহযোগ কৰি যোৱাৰ আশ্বাস প্ৰদান কৰে ঠাকৰেই।
ঠাকৰেই কয় যে হিন্দুত্ব মানে হিংসা অথবা প্ৰতিশোধ পৰায়ণতা নহয়। যদি বিজেপি চৰকাৰে হিন্দুত্বৰ নামত নিম্ন মানৰ ৰাজনীতি কৰি যায়, তেনেহ’লে দেশৰ ভৱিষ্যত কি হ’ব বুলিও ঠাকৰেই প্ৰশ্ন কৰে।
উল্লেখযোগ্য যে তেলেংগানাৰ মুখ্যমন্ত্ৰী ৰাওৰ পূৰ্বে ইতিমধ্যে পশ্চিম বংগৰ মুখ্যমন্ত্ৰী মমতা বেনাৰ্জীয়েও এনেধৰণৰ এটা মিত্ৰজোঁট গঠনৰ প্ৰক্ৰিয়া আৰম্ভ কৰিছিল।
বেনাৰ্জীয়ে অভিযোগ কৰি আহিছে যে কেন্দ্ৰীয় চৰকাৰে দেশৰ যুক্তৰাষ্ট্ৰীয় ব্যৱস্থাটোক ধ্বংস কৰি পেলাইছে।
বেনাৰ্জীৰ লগতে তামিল নাডুৰ মুখ্যমন্ত্ৰী এম কে ষ্টেলিন আৰু প্ৰাক্তন প্ৰধানমন্ত্ৰী এইচ ডি দেৱগৌড়াইও এনেধৰণৰ ভাষ্য প্ৰদান কৰি আহিছে।
লক্ষ্যণীয়ভাৱে দেশৰ প্ৰধান বিৰোধী দল কংগ্ৰেছ এই মিত্ৰযোঁটৰ স’তে ঐক্যমতত উপনীত হ’ব পৰা নাই।
তেনে পৰিস্থিতিত কে চন্দ্ৰশেখৰ ৰাওৱে পুনৰ এটা নতুন বিৰোধী মিত্ৰযোঁট গঠন কৰাটোৱে ব্যাপক তাৎপৰ্য বহন কৰিছে।
