অতি সোনকালে পূৰ্ণগতিত আৰম্ভ হ’ব অসমৰ বৃহৎ নদীবান্ধবিৰোধী প্ৰতিবাদে স্তব্ধ কৰি থকা নামনি সোৱণশিৰি জলবিদ্যুৎ প্ৰকল্পৰ নিৰ্মাণ।
২০০০ মেগাৱট ক্ষমতাসম্পন্ন বান্ধটো ৰূপায়ণৰ বাবে শুকুৰবাৰে গুৱাহাটীত “সন্মতিৰ চুক্তি” (Memorandum of Agreement)ত আবদ্ধ হৈছে নিৰ্মাণকাৰী ৰাজহুৱা সংস্থা এন এইচ পি চি আৰু অসম চৰকাৰ।
“২০০০ মে.ৱ. নামনি সোৱণশিৰি হাইড্ৰ’-ইলেক্ত্ৰিক প্ৰকল্প ৰূপায়ণৰ বাবে অসম চৰকাৰ আৰু নেচনেল হাইড্ৰ’-ইলেক্ত্ৰিক পাৱাৰ কৰ্পৰে’চন লিমিটেডৰ মাজত আজি এখন সন্মতিৰ চুক্তি স্বাক্ষৰিত হৈছে,” এন এইচ পি চিৰ বিবৃতিত প্ৰকাশ।
বাৰিষা শেষ হ’লেই বান্ধটোৰ নিৰ্মাণ কৰিবলৈ সাজু বুলি নিৰ্মাণ সংস্থাটোৱে প্ৰকাশ কৰিছে।
চুক্তিখনত অসম চৰকাৰৰ হৈ প্ৰধান সচিব (শক্তি) নীৰজ বাৰ্মা আৰু এন এইচ পি চিৰ পৰিচালন সঞ্চালক বলৰাজ যোশীয়ে স্বাক্ষৰ কৰিছে।
২০১১ চনৰ পৰা নিৰ্মাণ বন্ধ হৈ থকা বান্ধটোৰ কাম আৰম্ভ কৰিবলৈ যোৱা ১৩ জুনত ভাৰত চৰকাৰে এন এইচ পি চিক নিৰ্দেশ দিছিল।
“নামনি সোৱণশিৰি জলবিদ্যুৎ প্ৰকল্পত যিমান সোনকালে পাৰি উৎপাদন কৰিব লাগে। এইটো উৎপাদনৰ কাম আৰম্ভ কৰিব পাৰিলে উত্তৰ-পূবৰ বাকী বৃহৎ বান্ধসমূহ নিৰ্মাণৰ দুৱাৰ মুকলি হ’ব,” পৰিৱেশ, বন আৰু জলবায়ু পৰিৱৰ্তন মন্ত্ৰ্যালয়ে দিয়া পত্ৰৰ উদ্ধৃতি।
শেহতীয়াকৈ ৰাষ্ট্ৰীয় সেউজ ন্যায়াধিকৰণেও বান্ধটোৰ নিৰ্মাণত সেউজ সংকেত প্ৰদান কৰিছিল।
বান্ধটো সন্দৰ্ভত গঠিত বিশেষজ্ঞ সমিতিক লৈ আপত্তি দৰ্শাই প্ৰাক্তন আছু নেতা তথা অগপ নেতা তুলাৰাম গগৈ আৰু এ পি ডব্লিউৰ অভিজিত শৰ্মাই দাখিল কৰা আবেদন ন্যায়াধিকৰণে খাৰিজ কৰিছিল।
এতিয়া এন এইচ পি চিয়ে কৈছে যে, বহুকেইখন সমিতিৰ পৰামৰ্শ অনুসৰি “সকলো কাৰিকৰী সংশয়ৰ উপশম ঘটোৱা হৈছে আৰু আইনী বাধা আঁতৰ হৈছে”।
বৃহৎ নদীবান্ধবিৰোধীসকলৰ আশংকাৰ বিপৰীতে এন এইচ পি চিয়ে “বান” আৰু “গৰাখহনীয়া” ৰোধৰ বাবে সোৱণশিৰিৰ নামনিত “সুৰক্ষামূলক কাম” হাতত লোৱা বুলি সদৰী কৰিছে।
বান্ধটোৰ নিৰ্মাণে অঞ্চলটোলৈ সামগ্ৰিক উন্নয়ন আনিব আৰু সামগ্ৰিক অৰ্থনীতিলৈ এক উদ্যম কঢ়িয়াই আনিব, বিবৃতিটোত প্ৰকাশ।
এই এইচ পি চিৰ প্ৰবোধৰ বিপৰীতে অসমৰ বান্ধবিৰোধী দল-সংগঠনসমূহে এতিয়াও নদীবান্ধটো নিৰ্মাণৰ বিৰুদ্ধে অৱস্থান লৈ আহিছে।
আনহাতে, ন্যায়াধিকৰণৰ ৰায়ত অসন্তুষ্ট দুই আবেদনকাৰীয়েও ইতিমধ্যে ভাৰতৰ উচ্চতম ন্যায়ালয়লৈ যোৱাৰ সিদ্ধান্ত ৰাজহুৱা কৰিছে।
