নামনি সোৱণশিৰি জলবিদ্যুৎ প্ৰকল্প নিৰ্মাণক প্ৰত্যাহ্বান জনাই ভাৰতৰ উচ্চতম ন্যায়ালয়লৈ যোৱাৰ সিদ্ধান্ত লৈছে অগপ নেতা তুলাৰাম গগৈয়ে।
ৰাষ্ট্ৰীয় সেউজ ন্যায়াধিকৰণে প্ৰকল্পটোত সন্দৰ্ভত শেহতীয়াকৈ দিয়া ৰায়ত “হতাশ”, গোচৰ্টোৰ আবেদনকাৰী গগৈয়ে মঙলবাৰে নৰ্থ-ইষ্ট নাওক এই কথা জনাইছে।
সদৌ অসম ছাত্ৰ সন্থাৰ প্ৰাক্তন নেতা গগৈয়ে বৃহৎ নদীবান্ধবিৰোধী আন্দোলনটোৰ আৰম্ভণিৰে পৰা নেতৃত্ব দি আহিছে।
গগৈয়ে উচ্চতম ন্যায়ালয়ৰ প্ৰতি “বিশ্বাস” থকা বুলি উল্লেখ কৰিছে, কিন্তু ন্যায়িক প্ৰক্ৰিয়াটো সন্দৰ্ভতো কিছু মন্তব্য আগবঢ়াইছে।
সেউজ ন্যায়াধিকৰণত বিষয়টোৰ শুনানি প্ৰক্ৰিয়াত, গগৈৰ মতে, তেওঁ “সন্তুষ্ট” আছিল; কিন্তু ৩০ জুলাইৰ চূড়ান্ত ৰায়দানে তেওঁক হতাশ কৰিছে।
“২৫ জুলাইত সেউজ ন্যায়াধিকৰণৰ তিনিগৰাকী বিচাৰক আৰু এজন বিশেষজ্ঞ বহিছিল। বিচাৰকসকলে এনএইচপিচি আৰু কেন্দ্ৰীয় চৰকাৰক ধমকি দিছিল যে তেওঁলোকো ভাৰতীয় নাগৰিক আৰু উত্তৰ-পূবো ভাৰতৰ অংগ। তেওঁলোকৰ এপ্ৰিহেন্সন থকালৈকে আপোনালোকক আগবাঢ়িব দিব নোৱাৰো। তেওঁলোকৰ ওপৰত বলপূৰ্বক সিদ্ধান্ত জাপি দিব নোৱাৰিব, এইদৰে বিচাৰককেইগৰাকীয়ে কৈছিল। কিন্তু কি বিজুতিত ৩০ জুলাইত সেউজ ন্যায়াধিকৰণৰ ৰায়টো সম্পূৰ্ণ ওলোটা আহিল?” গগৈৰ মন্তব্য।
গগৈয়ে লগতে কয় যে কেন্দ্ৰীয় চৰকাৰে আগতীয়াকৈ কেচটো এনেধৰণৰ হ’ব বুলি জানিছিল আৰু সেয়ে গোচৰটো চলি থকাৰ সময়তে ১৩ জুনতে এনএইচপিচিক আগবাঢ়ি যাবলৈ নিৰ্দেশ দিছিল।
এই প্ৰসংগত তেওঁ ভাৰত চৰকাৰৰ পৰিৱেশ, বন আৰু জলবায়ু পৰিৱৰ্তন মন্ত্ৰণালয়ে এনএইচপিছিক দিয়া চিঠিৰ ১৫নং দফাৰ উদ্ধৃতি দাঙি ধৰে। “নামনি সোৱণশিৰি জলবিদ্যুৎ প্ৰকল্পত যিমান সোনকালে পাৰি উৎপাদন কৰিব লাগে। এইটো উৎপাদনৰ কাম আৰম্ভ কৰিব পাৰিলে উত্তৰ-পূবৰ বাকী বৃহৎ বান্ধসমূহ নিৰ্মাণ কৰাৰ দৰ্জাখন মুকলি হৈ যাব।”
বান্ধটো সন্দৰ্ভত কেন্দ্ৰীয় চৰকাৰ-গঠিত আই ডি গুপ্তা, প্ৰভাস পাণ্ডে আৰু পি এম স্কটৰ বিশেষজ্ঞ সমিতি “নিৰপেক্ষ” নহয় বুলি গগৈয়ে পুনৰ দোহাৰে।
তেওঁ কয়, “নামনি সোৱণশিৰি জলবিদ্যুৎ প্ৰকল্পৰ আৰম্ভণিৰে পৰা তেওঁলোক বিভিন্ন শিতানত জৰিত হৈ আছে। গতিকে তেওঁলোক নিৰপেক্ষ নহয়। তেওঁলোক চৰকাৰৰ সৈতে একাত্ম হৈ নামনি সোৱণশিৰি জলবিদ্যুৎ প্ৰকল্পৰ লগতে উত্তৰ-পূবৰ সৰ্ববৃহৎ জলবিদ্যুৎ প্ৰকল্প নিৰ্মাণৰ বাবে কুচ-কাৱাজ কৰি থকা লোক।”
অসমৰ ৰাইজে বৃহৎ নদীবান্ধবিৰোধী আন্দোলন “স্থগিত কৰা নাই” বুলি মত প্ৰকাশ কৰি গগৈয়ে কয় ৰাইজ “থমকি যাব নালাগে”।
একেটা বিষয়ৰ আন এজন আবেদনকাৰী অসম পাব্লিক ৱৰ্কছৰ অভিজিত শৰ্মায়ো ইতিমধ্যে সেউজ ন্যায়াধিকৰণৰ ৰায়ত অসন্তুষ্টি প্ৰকাশ কৰি উচ্চতম ন্যায়ালয়লৈ যোৱাৰ কথা উল্লেখ কৰিছে।
