বিমানখন আকাশৰ মাজত আছিল। ভিতৰত ২০০ৰো অধিক যাত্ৰী আৰু ক্ৰু মেম্বাৰ। হঠাৎ তেওঁলোক মহা সংকটত পৰিল। কাৰণ দহ মিনিটৰ বাবে কোনো পাইলট নিজৰ আসনত নাছিল। এজন পাইলট টয়লেটত আছিল। আনজনৰ আসনত অজ্ঞান হৈ পৰিছিল। শেষত কি হ’ল? শেহতীয়াকৈ সেই ঘটনাৰ তদন্তৰ প্ৰতিবেদন ৰাজহুৱা কৰা হৈছে।
আন্তঃৰাষ্ট্ৰীয় সংবাদ মাধ্যমৰ সূত্ৰ অনুসৰি এই ঘটনা সংঘটিত হৈছে স্পেইনত। অৱশ্যে ঘটনাটো শেহতীয়া নহয়। যোৱা বছৰৰ ১৭ ফেব্ৰুৱাৰীত লুফথানছাৰ এখন বিমানত সংঘটিত হৈছিল এই ঘটনা। এবছৰ ধৰি এই ঘটনা গোপনে ৰখা হৈছিল। অৱশেষত তদন্তকাৰীৰ প্ৰতিবেদন ৰাজহুৱা কৰা হয়।
খবৰ অনুসৰি জাৰ্মানীৰ ফ্ৰেংকফৰ্টৰ পৰা স্পেইনৰ চেবিয়া অভিমুখে ৰাওনা হৈছিল লুফথানছা এয়াৰবাছ এ ৩২১ বিমানখন। সেই বিমানখনত ১৯৯ জন যাত্ৰী, ছয়জন ক্ৰু মেম্বাৰ আৰু দুজন পাইলট আছিল। বিমানখন আকাশৰ মাজভাগত থকাৰ সময়তে এজন পাইলট বাথৰুমলৈ গ’ল। আনজন চিটত বহি আছিল। হঠাৎ তেওঁ অচেতন হৈ পৰিল।
তদন্তত প্ৰকাশ পাইছে যে পাইলটজন অচেতন হৈ পৰিলেও অটোপাইলট মোড অন হৈ আছিল। গতিকে মাজ আকাশত কোনো বিপদ নঘটিল। আনকি যাত্ৰীসকলেও লক্ষ্য কৰা নাছিল। কিছুসময়ৰ পাছত পাইলটজন শৌচাগাৰৰ পৰা উভতি আহি ককপিটত সোমাব পৰা নাছিল। ফ্লাইট ক্ৰুৱেও চেষ্টা কৰিছিল যদিও ককপিটৰ দুৱাৰখন খুলিব পৰা নাছিল।
অৱশেষত ইমাৰ্জেন্সি ক’ড দি ককপিটত প্ৰৱেশ কৰিলে পাইলটজন। তেতিয়াই তেওঁ দেখিলে সহযোগী পাইলটজন অচেতন হৈ পৰি আছে। বিমানখন ততাতয়াকৈ মাদ্ৰিদত জৰুৰীকালীনভাৱে অৱতৰণ কৰা হয়। অৱতৰণৰ লগে লগে সহ-পাইলটজনক চিকিৎসালয়লৈ লৈ যোৱা হয়।
