গোৱা প্ৰদেশ কংগ্ৰেছৰ প্ৰাক্তন সভাপতি লুইজিনহ’ ফেলেৰিঅ’ক অসমক বাদ দি উত্তৰ-পূৰ্বাঞ্চলৰ বাকীকেইখন ৰাজ্যত দলৰ ভাৰপ্ৰাপ্ত সাধাৰণ সম্পাদক হিচাপে মঙলবাৰে নিযুক্তি দিয়া হৈছে।
পূৰ্বে এই ৰাজ্য কেইখনৰ দায়িত্বত থকা কংগ্ৰেছৰ জ্যেষ্ঠ নেতা চি পি যোশীৰ স্থানত গোৱাৰ নেতাজনক দলৰ ৰাষ্ট্ৰীয় অধ্যক্ষ ৰাহুল গান্ধীয়ে এই বিষয়বাব দিছে বুলি মঙলবাৰে দলৰ সাধাৰণ সম্পাদক অশোক গেহলটে বিবৃতি জাৰি কৰিছে।
গোৱাত ২০১৭ চনত চৰকাৰ গঠনত বিফল হোৱাৰ পিছতে ফেলেৰিঅ’ই প্ৰদেশ কংগ্ৰেছৰ সভাপতিৰ দায়িত্ব ত্যাগ কৰিছিল।
গোৱা বিধান সভাত ১৭খন আসনেৰে সৰ্বাধিক আসন থকা দল হোৱাৰ পিছতো ৩খন আসন থকা গোৱা ফৰৱাৰ্ড পাৰ্টিয়ে কংগ্ৰেছক সমৰ্থন নিদিয়াৰ ফলত দলটোৱে চৰকাৰ গঠন কৰাত বিফল হৈছিল।
বৰ্তমান উত্তৰ-পূবৰ দায়িত্ব ন্যস্ত কৰা ফেলেৰিঅ’ক মুখ্য মন্ত্ৰী পদৰ প্ৰাৰ্থী হিচাপে ফৰৱাৰ্ড দলে মানি লোৱা নাছিল।
উত্তৰ-পূবৰ দায়িত্বৰ উপৰি কংগ্ৰেছৰ সৰ্বভাৰতীয় নেতৃত্বটো মঙলবাৰে কেইবাটাও গুৰুত্বপূৰ্ণ সালসলনি কৰা হৈছে।
ৰাহুল গান্ধীয়ে কংগ্ৰেছ সভাপতিৰূপে দায়িত্ব লোৱাৰ পিছত দিগ্বিজয় সিঙকে ধৰি ‘পুৰণি কংগ্ৰেছী’ক গুৰুত্বপূৰ্ণ পদবীৰ পৰা গুচোৱা বুলি চৰ্চা চলি থকাৰ পৰতে প্ৰাক্তন অধ্যক্ষা ছোনিয়া গান্ধীৰ ৰাজনৈতিক উপদেষ্টা আহমেদ পেটেলক দলৰ কোষাধ্যক্ষ, আনন্দ শৰ্মাক বিদেশ পৰিক্ৰমাৰ অধ্যক্ষ, মীৰা কুমাৰক কংগ্ৰেছ কাৰ্য্যকৰী সমিতিৰ স্থায়ী আমন্ত্ৰিত সদস্যা আৰু দেশৰে এজন অন্যতম প্ৰবীণ কংগ্ৰেছী ম’তিলাল ভ’ৰাক দলৰ সাধাৰণ সম্পাদক (প্ৰশাসন)ৰূপে নিযুক্তি দিছে ৰাহুল গান্ধীয়ে।