লুৰিণজ্যোতিয়ে ৭০০-১৫০০ ভোট পাব : হিমন্ত

সমাগত বিধানসভাৰ নিৰ্বাচন। ইয়াক লৈ শাসক-বিৰোধীৰ যুঁজখন তীব্ৰতৰ হৈ উঠাৰ সমান্তৰালকৈ আমোদজনক হৈ পৰিছে আছুৰ সাধাৰণ সম্পাদক লুৰিণজ্যোতি গগৈ আৰু মন্ত্ৰী হিমন্ত বিশ্ব শৰ্মাৰ মাজৰ বাকযুদ্ধখন।

আজি লুৰিণজ্যোতি গগৈ নিৰ্বাচনত অৱতীৰ্ণ হ’লে কিমান ভোট পাব বুলি সাংবাদিকে সোধা প্ৰশ্নত তেওঁ কয় ‘সৰ্বাধিক ১৫০০ সৰ্বনিম্ন ৭০০ ভোট লাভ কৰিব। তাতকৈ বেছি নাপায়।

ইপিনে, নতুন আঞ্চলিক ৰাজনৈতিক দল ‘অসম জাতীয় পৰিষদ’ৰ শ্লোগান ‘ঘৰে ঘৰে আমি’ৰ সন্দৰ্ভতো মন্তব্য কৰে মন্ত্ৰী হিমন্ত বিশ্ব শৰ্মাই।

তেওঁ কয় ‘আমি কেতিয়াও মানুহৰ ঘৰত নাযাওঁ। মানুহৰ ঘৰত অতিথি, আৰক্ষী আৰু লুকাই-চুৰকৈ মানুহৰ ঘৰত চোৰো যায়। কাৰোবাৰ ঘৰলৈ গ’লে অনুমতি লৈহে যাব লাগিব। আমি চেষ্টা কৰিছো সেৱাৰ জৰিয়তে মানুহৰ হৃদয়ে হৃদয়ে অন্তৰে অন্তৰে থাকিব পাৰো।‘

‘এতিয়া যিহেতু কোনোবা ৰাজনৈতিক পথাৰত আহিয়ে গ’ল কোন বিশ্বাসঘাতক, কোন বিশ্বাসভাজন সেয়া বাকচৰ ওপৰত এৰি দিয়ক। আপোনালোকে এই প্ৰশ্ন বিলাকৰ উত্তৰ এপ্ৰিল মাহত পাই যাব।‘ নতুন আঞ্চলিক ৰাজনৈতিক দলটোক সমালোচনা কৰি এইদৰে কয় হিমন্তই।

ইপিনে, ৰাজনীতি কৰা মানুহক সমালোচনা কৰাটো সহজ বুলি উল্লেখ কৰি মন্ত্ৰীগৰাকীয়ে লগতে কয় ‘ৰাজনৈতিক নেতাৰ বিৰুদ্ধে আন্দোলন কৰাটো সহজ, যেতিয়া ৰাজনীতি কৰিব আহিব তেতিয়া ইয়াৰ প্ৰত্যাহ্বানৰ চৰিত্ৰটো নিজেই অনুভৱ কৰিব।‘

ইপিনে, নতুন ৰাজনৈতিক দলৰ আহ্বায়ক ৰাজু ফুকনে আৰোগ্য নিধিৰ জৰিয়তে মন্ত্ৰী হিমন্ত বিশ্ব শৰ্মাই চান্দা তোলা বুলি কৰা মন্তব্যৰ প্ৰতিক্ৰিয়া প্ৰকাশ কৰে হিমন্তই।

তেওঁলোকে কয় ‘আৰোগ্য নিধিৰ চান্দা তোলা, আৰু ৰাজনৈতিক দলৰ চান্দা তোলাৰ মাজত যি পাৰ্থক্যটো বুজি নাপায় তেওঁলোকৰ  লগত বিতৰ্ক কৰি কি পাব?’

‘আৰোগ্য নিধিৰ টকা খৰচ হ’লেহে হিচাপ দিব, ১০০ টকাৰ ১০০ টকাই জমা হৈ আছে। হিচাপ খৰচ কৰিলেহে বিচাৰে। ৰচিদ বহীৰ হিচাপ বিলাক ওলাবনে নাই? কিমান ৰচিদবহী প্ৰিণ্টিং হ’ল, সেইবিলাকৰ হিচাপ আছে নে নাই?’ হিমন্তই প্ৰত্যাহ্বান জনাই কয়।

ভৱিষ্যতবাণী কৰি হিমন্তই কয় ‘যদি ৭০০-১৫০০ ভোট পায় তেন্তে আপোনালোকে নক’ব আকৌ ইভিএমত যাদু চলিল বুলি ।‘