গুপ্তহত্যাৰ তদন্ত কৰিবলৈ তৰুণ গগৈ নেতৃত্বাধীন কংগ্ৰেছ চৰকাৰৰ দিনত গঠিত ন্যায়াধীশ কে এন শইকীয়া আয়োগ সন্দৰ্ভত উচ্চ ন্যায়ালয়ে দিয়া ৰায়ত সন্তুষ্টি প্ৰকাশ কৰিছে প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই।
মঙলবাৰে সাংবাদিকৰ সৈতে হোৱা বাৰ্তালাপত মহন্তই কয়, “কিছুমান ৰাজনৈতিক দলৰ ই এটা দীঘলীয়া ষড়যন্ত্ৰ আছিল। আমি তাৰ বিৰুদ্ধে ন্যায়ালয়ত প্ৰত্যাহ্বান জনাইছিলো। ন্যায়ালয়ে এটা ৰায় দিছে।”
উল্লেখ্য যে, গুপ্তহত্যাৰ তদন্ত কৰিবলৈ গঠন কৰা ন্যায়াধীশ কে এন শইকীয়াৰ নেতৃত্ব গঠন কৰা সমিতিখনৰ গঠন প্ৰক্ৰিয়া অসাংবিধানিক বুলি ৰায় দিয়ে গুৱাহাটী উচ্চ ন্যায়ালয়ে। ২০০৮ চনতে আয়োগখনৰ বিৰু্দ্ধে গোচৰ তৰিছিল প্ৰাক্তন মুখ্য মন্ত্ৰী মহন্তই। মহন্তৰ গোচৰৰ ভিত্তিত উচ্চ ন্যায়ালয়ৰ ন্যায়াধীশ উজ্জ্বল ভূঞাৰ আদালতে ৩ আগষ্টত এই ৰায় দিয়ে।
ইপিনে, ন্যায়ালয়ৰ এই ৰায়ৰ পাছতেই অগপৰ একাংশ নেতাক উৎফুল্ল হোৱা দেখা গ’ল। কিয়নো, বিগত সময়ছোৱাত গুপ্তহত্যাৰ বিষয়টোৱে অগপক প্ৰায়ে অস্বস্তিত পেলাইছিল। কেৱল অস্বস্তিয়েই নহয়, দলটোৰ ৰাজনৈতিক অৱস্থাক নিশকতীয়া কৰি আহিছিল। আনকি, কংগ্ৰেছে বাৰে বাৰে এই বিষয়টোক এক নিৰ্বাচনী ইচ্ছ্যু হিচাপে ব্যৱহাৰ কৰি অহা দেখা গৈছিল।
এই সন্দৰ্ভত দলটোৰ সাধাৰণ সম্পাদক ডাঃ কমলা কলিতাই কয়, “ই আমাৰ দলটোৰ বাবে এটা ডাঙৰ ষড়যন্ত্ৰ আছিল। কিন্তু মাননীয় উচ্চ ন্যায়ালয়ে এই ৰায়দানৰ জৰিয়তে অসম গণ পৰিষদ দলক এটা মান্যতা প্ৰদান কৰিলে। লগতে এই প্ৰক্ৰিয়াটো যে ষড়যন্তমূলক আছিল সেই কথাটো প্ৰমাণ কৰি দিলে।”
তেওঁ লগতে কয় যে সেই সময়ত উগ্ৰপন্থীয়ে বহু হত্যালীলা চলাইছিল কিন্তু তাত চৰকাৰৰ হাত থকা কথাটো অস্বাভাৱিক।
“অগপৰ দিনত যেনেকৈ উগ্ৰপন্থীৰ দ্বাৰা হত্যা-হিংসা হৈছিল তেনেকৈ তৰুণ গগৈৰ দিনতো বহুত হত্যা-হিংসা হৈছিল”, কলিতাই কয়।
ন্যায়ালয়ৰ ৰায়ত সন্তুষ্টি প্ৰকাশ কৰি বিধায়ক ৰমেন্দ্ৰ নাৰায়ণ কলিতাই কয়, “কে এন শইকীয়াৰ নেতৃত্বত গঠিত আয়োগখনে যি প্ৰতিবেদন দাখিল কৰিছিল সেয়া যিহেতু উচ্চ ন্যায়ালয়ে নাকচ কৰিলে, ই আমাৰ দলৰ বাবে এটা সু খৱৰ।”
