বড়োলেণ্ড টেৰিটৰিয়েল কাউন্সিলৰ প্ৰধান কাৰ্যবাহী সদস্য হাগ্ৰামা মহিলাৰীৰ ব্যক্তিগত সহায়ক হিচাপে কৰ্মৰত মহেশ ব্ৰহ্ম নামৰ এজন ৪৭ বছৰীয়া লোকৰ মৃতদেহ উদ্ধাৰ হোৱা ঘটনাই তীব্ৰ চাঞ্চল্যৰ সৃষ্টি কৰিছে। কোকৰাঝাৰৰ খাৰগাঁও অঞ্চলত অৱস্থিত এখন নৱনিৰ্মিত ৰেলৱে উৰণীয়া সেতুৰ পৰা ডিঙিত জৰী মেৰিওৱা অৱস্থাত ব্ৰহ্মৰ মৃতদেহটো উদ্ধাৰ কৰা হয়। প্ৰাথমিক দৃষ্টিত এয়া আত্মহত্যা যেন ধাৰণা হৈছে যদিও পৰিয়ালৰ সদস্য আৰু স্থানীয় একাংশ লোকে ইয়াক এক পৰিকল্পিত হত্যাকাণ্ড বুলি সন্দেহ প্ৰকাশ কৰিছে।
ঘটনাৰ খবৰ পোৱাৰ লগে লগে আৰক্ষী আৰু দণ্ডাধীশ ঘটনাস্থলীত উপস্থিত হৈ মৃতদেহটো উদ্ধাৰ কৰে আৰু মৰণোত্তৰ পৰীক্ষাৰ বাবে প্ৰেৰণ কৰে। মৃত মহেশ ব্ৰহ্ম এগৰাকী শান্ত আৰু ভদ্ৰ স্বভাৱৰ লোক হোৱাৰ লগতে সাংস্কৃতিক ক্ষেত্ৰখনৰ সৈতেও ওতঃপ্ৰোতভাৱে জড়িত আছিল। তেওঁৰ পৰিয়ালৰ সদস্যসকলে দাবী কৰা অনুসৰি, এয়া কোনো কাৰণতেই আত্মহত্যা হ’ব নোৱাৰে আৰু দুৰ্বৃত্তই তেওঁক হত্যা কৰাৰ পাছত আত্মহত্যাৰ ৰূপ দিবলৈ মৃতদেহটো উৰণীয়া সেতুত ওলোমাই থৈ গৈছে। এই ৰহস্যজনক মৃত্যুৰ প্ৰকৃত কাৰণ পোহৰলৈ আনিবলৈ পৰিয়ালৰ লোকে এক বিতং আৰু নিৰপেক্ষ তদন্তৰ দাবী জনাইছে।
এই খবৰ বিয়পি পৰাৰ লগে লগে সমগ্ৰ কোকৰাঝাৰতে গভীৰ শোক আৰু উদ্বেগৰ সৃষ্টি হৈছে। ঘটনাৰ পাছতেই বিটিচিৰ কাৰ্যবাহী সদস্য প্ৰকাশ বসুমতাৰীয়ে ঘটনাস্থলী পৰিদৰ্শন কৰি মৃতদেহ উদ্ধাৰ হোৱা স্থানত আৰক্ষীক পুংখানুপুংখ তদন্ত কৰিবলৈ আহ্বান জনায়। বৰ্তমান আৰক্ষীয়ে সমগ্ৰ ঘটনাটোৰ প্ৰাথমিক অনুসন্ধান আৰম্ভ কৰিছে আৰু মৰণোত্তৰ পৰীক্ষাৰ প্ৰতিবেদন লাভ কৰাৰ পাছতহে মৃত্যুৰ প্ৰকৃত কাৰণ আৰু ইয়াৰ আঁৰত কোনো অপৰাধমূলক কাৰ্য জড়িত আছে নে নাই, সেয়া স্পষ্ট হ’ব বুলি জানিবলৈ দিছে।
