ভাৰতীয় মল্লযুঁজ ফেডাৰেচনৰ প্ৰাক্তন মুৰব্বী ব্ৰীজ ভূষণ শৰণ সিঙৰ বিৰুদ্ধে উত্থাপিত যৌন নিৰ্যাতনৰ গোচৰ সন্দৰ্ভত এক ডাঙৰ বিস্ফোৰণ ঘটিছে। দেশৰ আগশাৰীৰ মল্লযুঁজাৰু বিনেশ ফোগাটে ৰাজহুৱাভাৱে এক ভিডিঅ’ যোগে স্বীকাৰ কৰিছে যে ব্ৰীজ ভূষণৰ বিৰুদ্ধে অভিযোগ দাখিল কৰা ছয়গৰাকী নিৰ্যাতিতা মহিলাৰ ভিতৰত তেওঁ অন্যতম। ৩ মে’ দেওবাৰে ছ’চিয়েল মিডিয়াত শ্বেয়াৰ কৰা এটা ভিডিঅ’ৰ জৰিয়তে প্ৰথমবাৰৰ বাবে বিনেশে নিজৰ পৰিচয় এই গোচৰৰ ভুক্তভোগী হিচাপে প্ৰকাশ কৰে।
উচ্চতম ন্যায়ালয়ৰ নিৰ্দেশনা অনুসৰি ভুক্তভোগীৰ পৰিচয় গোপন ৰখাৰ নিয়ম থকাৰ পিছতো বিনেশে কিয় এনেদৰে মুখ খুলিবলৈ বাধ্য হ’ল, সেই বিষয়েও তেওঁ স্পষ্ট কৰিছে। ২০২৬ চনৰ এছিয়ান গেমছৰ বাবে আগন্তুক প্ৰতিযোগিতা আৰু ট্ৰাইল উত্তৰ প্ৰদেশৰ গোণ্ডাত অনুষ্ঠিত কৰাৰ সিদ্ধান্ত লৈছে ভাৰতীয় মল্লযুঁজ ফেডাৰেচনে। গোণ্ডা হৈছে ব্ৰীজ ভূষণৰ নিজা দুৰ্গ আৰু এই ট্ৰাইল তেওঁৰ নিজা ব্যক্তিগত মহাবিদ্যালয়ত অনুষ্ঠিত হ’ব। বিনেশৰ মতে, এনে এটা পৰিৱেশত কোনো খেলুৱৈয়েই নিৰপেক্ষ বিচাৰ আৰু ন্যায্য প্ৰতিযোগিতা আশা কৰিব নোৱাৰে।
বৰ্তমানৰ ফেডাৰেচনৰ মুৰব্বী সঞ্জয় সিঙৰ জৰিয়তে ব্ৰীজ ভূষণে এতিয়াও মল্লযুঁজ ফেডাৰেচন নিয়ন্ত্ৰণ কৰি আছে বুলি বিনেশে গুৰুতৰ অভিযোগ উত্থাপন কৰিছে। প্ৰতিযোগিতাত কোনে ৰেফাৰী হ’ব আৰু কোনে কিমান পইণ্ট পাব, সেই সকলোবোৰ ব্ৰীজ ভূষণৰ মানুহে নিয়ন্ত্ৰণ কৰিব বুলি তেওঁ আশংকা প্ৰকাশ কৰিছে। আটাইতকৈ দুখজনক কথাটো হ’ল, চৰকাৰ আৰু ক্ৰীড়া মন্ত্ৰালয়ে এই সকলোবোৰ দেখিও নীৰৱ দৰ্শকৰ ভূমিকা পালন কৰিছে বুলি তেওঁ আক্ষেপ কৰে।
২০২৪ চনৰ পেৰিছ অলিম্পিকৰ পিছত প্ৰায় ১৮ মাহৰ বিৰতিৰ অন্তত মেটলৈ ঘূৰি আহিবলৈ বিনেশে কঠোৰ পৰিশ্ৰম কৰি আছে। কিন্তু যিগৰাকী ব্যক্তিৰ বিৰুদ্ধে তেওঁলোকে যুঁজ দি আছে, সেই ব্যক্তিগৰাকীৰ নিজৰ ঠাইলৈ গৈ প্ৰতিযোগিতাত ভাগ লোৱাটো এগৰাকী মহিলাৰ বাবে কিমান মানসিক আৰু শাৰীৰিকভাৱে কষ্টকৰ, সেয়া তেওঁ ভিডিঅ’টোত বৰ্ণনা কৰিছে। এনে পৰিস্থিতিত তেওঁ নিজৰ এশ শতাংশ দিব পাৰিব নে নাই, তাক লৈও তেওঁৰ মনত সন্দেহ উপজিছে।
উল্লেখযোগ্য যে ২০২৩ চনত নতুন দিল্লীৰ যন্তৰ মন্তৰত ব্ৰীজ ভূষণৰ বিৰুদ্ধে হোৱা তীব্ৰ প্ৰতিবাদৰ মূল নেতৃত্ব দিছিল বিনেশ ফোগাট, সাক্ষী মালিক আৰু বজৰং পুনিয়াই। সেই সময়ত আৰক্ষীয়ে তেওঁলোকক ৰাজপথত টানি নিয়াৰ দৃশ্যই আন্তঃৰাষ্ট্ৰীয় পৰ্যায়তো তীব্ৰ প্ৰতিক্ৰিয়াৰ সৃষ্টি কৰিছিল। নাবালিকাৰ গোচৰত ব্ৰীজ ভূষণে ৰেহাই পালেও, বিনেশকে ধৰি আন পাঁচগৰাকী প্ৰাপ্তবয়স্ক মহিলা মল্লযুঁজাৰুৰ সৈতে জড়িত যৌন নিৰ্যাতনৰ এই গুৰুতৰ গোচৰটো বৰ্তমানো আদালতত বিচাৰাধীন হৈ আছে।
