কেন্দ্ৰীয় চৰকাৰৰ প্ৰশাসনত বৃহৎ ৰদবদল। শনিবাৰে জাৰি কৰা নিৰ্দেশ অনুসৰি, যুটীয়া সচিব আৰু সমপৰ্যায়ৰ পদত মুঠ ২৭গৰাকী বিষয়াক নতুন দায়িত্ব অৰ্পণ কৰা হৈছে। এই নিযুক্তিসমূহৰ ভিতৰত বিশেষভাৱে চৰ্চালৈ আহিছে নিৰ্বাচন আয়োগৰ নতুন উপ-নিৰ্বাচন আয়ুক্ত হিচাপে প্ৰকাশ ৰাজপুৰোহিতৰ নিযুক্তি। ৰাজস্থান কেডাৰৰ ২০১০ বৰ্ষৰ আই এ এছ বিষয়া ৰাজপুৰোহিতে সঞ্জয় কুমাৰৰ স্থানত দায়িত্ব গ্ৰহণ কৰিব। তেওঁ ২০৩০ চনৰ ৮ এপ্ৰিললৈকে এই পদত কাৰ্যনিৰ্বাহ কৰিব।
কেবিনেটৰ নিযুক্তি সমিতিয়ে এই ৰদবদলৰ অধীনত কেইবাটাও গুৰুত্বপূৰ্ণ পদত নিযুক্তিত অনুমোদন জনাইছে। ৰাষ্ট্ৰীয় পৰীক্ষণ সংস্থা (এন টি এ)-ৰ যুটীয়া সচিব হিচাপে নিযুক্তি লাভ কৰিছে ১৯৯৬ বৰ্ষৰ ভাৰতীয় টেলিকম সেৱাৰ বিষয়া বিবেক খাৰে। আনহাতে, গৃহ মন্ত্ৰালয়ৰ যুটীয়া সচিব হিচাপে দায়িত্ব লাভ কৰিছে ৰবি শংকৰ, চিত্তৰঞ্জন দাস, পি মনোজ কুমাৰ আৰু অভিষেক ভাগোটিয়াই।
স্বাস্থ্য আৰু পৰিয়াল কল্যাণ মন্ত্ৰালয়ৰ যুটীয়া সচিব হিচাপে মহম্মদ ৱাই ছফিৰুল্লা আৰু ঋতু শৰ্মাক নিযুক্তি দিয়া হৈছে। ৰাষ্ট্ৰীয় স্বাস্থ্য প্ৰাধিকৰণৰ যুটীয়া সচিব হিচাপে দায়িত্ব লাভ কৰিছে অসম-মেঘালয় কেডাৰৰ ২০০৯ বৰ্ষৰ আই এ এছ বিষয়া বৰ্ণালী ডেকাই। একেটা প্ৰতিষ্ঠানতে অতিৰিক্ত মুখ্য কাৰ্যবাহী বিষয়া হিচাপে নিযুক্তি দিয়া হৈছে মোৰে আশীষ মাধৱৰাওক।
আন কেইবাটাও গুৰুত্বপূৰ্ণ পদতো নতুন বিষয়া নিযুক্ত কৰা হৈছে। নিখিল বাৰ্মাক দিল্লীৰ অতিৰিক্ত বৈদেশিক বাণিজ্য সঞ্চালক প্ৰধান, তন্বী সুন্দৰিয়ালক কৰ্পৰেট পৰিক্ৰমা মন্ত্ৰালয়ৰ যুটীয়া সচিব আৰু ইন্দৰজিৎ সিঙক সংস্কৃতি মন্ত্ৰালয়ৰ যুটীয়া সচিব হিচাপে দায়িত্ব দিয়া হৈছে। ভাৰতীয় বীমা নিয়ামক আৰু উন্নয়ন প্ৰাধিকৰণৰ কাৰ্যবাহী সঞ্চালক হিচাপে তাম্বোলি আয়াজ ফকিৰভাই, ভাৰতীয় খাদ্য নিগমৰ কাৰ্যবাহী সঞ্চালক হিচাপে ৰাজেশ মল্লিক আৰু আইন পৰিক্ৰমা বিভাগৰ যুটীয়া সচিব হিচাপে নবীন আগৰৱালে দায়িত্ব লাভ কৰিছে।
ইয়াৰ উপৰি কেপিটেল ডেভেলপমেণ্ট বিভাগত ব্ৰিজেশ পাণ্ডে, সংখ্যালঘু পৰিক্ৰমা মন্ত্ৰালয়ত এম ৰামচন্দ্ৰুডু আৰু নীতি আয়োগৰ উপদেষ্টা হিচাপে ছোনিয়া পন্থক নিযুক্তি দিয়া হৈছে। কেন্দ্ৰীয় সতৰ্কতা আয়োগৰ অতিৰিক্ত সচিব হিচাপে নীতিন কুমাৰ, পথ পৰিবহণ আৰু ৰাষ্ট্ৰীয় ঘাইপথ মন্ত্ৰালয়ৰ যুটীয়া সচিব হিচাপে চি মুৰগানাছ আৰু ৰাষ্ট্ৰীয় ঘাইপথ লজিষ্টিকছ মেনেজমেণ্ট লিমিটেডৰ মুখ্য কাৰ্যবাহী বিষয়া হিচাপে ৰাজনীশ কুমাৰ টোমাৰক দায়িত্ব দিয়া হৈছে। সামাজিক ন্যায় আৰু সৱলীকৰণ মন্ত্ৰালয়ৰ অধীনস্থ ব’ৰ্ডৰ মুখ্য কাৰ্যবাহী বিষয়া হিচাপে নিযুক্তি লাভ কৰিছে নিশিতা তিৱাৰীয়ে।
