পাঁচশ ছাত্ৰীৰ মাজত নিজকে অকলে দেখি বেহুচ হ’ল ছাত্ৰ

বিহাৰৰ নালন্দা জিলাৰ ঘটনা এয়া। শ শ ছোৱালীৰ মাজত নিজক অকলে দেখা পায় পৰীক্ষা কেন্দ্ৰত অচেতন হৈ পৰিল দ্বাদশ শ্ৰেণীৰ ছাত্ৰ।

এইদৰে অচেতন হৈ পৰা ছাত্ৰ গৰাকীৰ নাম মনিষ শংকৰ প্ৰসাদ। ১৭ বছৰীয়া দ্বাদশ শ্ৰেণীৰ এই ছাত্ৰজনে বুধবাৰে গণিতৰ পৰীক্ষা দিবলৈ গৈছিল ব্ৰিলিয়েন্ট কনভেন্ট স্কুল নামৰ বিদ্যালয়খনলৈ।

কিন্তু তাতেই ঘটিল অঘটনটো। পৰীক্ষা হলটোত আছিল প্ৰায় ৫০০ গৰাকী ছাত্ৰী। মনিষৰ শংকৰৰ বাহিৰে পৰীক্ষা হলটোত নাছিল আন কোনো ছাত্ৰ। যাৰ বাবে ইমানবোৰ ছাত্ৰীৰ মাজত নিজকে অকলে দেখি পৰীক্ষা হলতে মুছকচ খাই পৰিল ছাত্ৰগৰাকী।

অৱশ্যে বিদ্যালয়ৰ শিক্ষক আৰু প্ৰশাসনৰ সহায়ত ছাত্ৰজনক ততাতৈয়াকৈ সদৰ চিকিৎসালয়লৈ লৈ যোৱা হয়। চিকিৎসালয়ত কিছু সময় থকাৰ পিছত সজ্ঞান অৱস্থালৈ ঘূৰি আহে ছাত্ৰজন।

জানিব পৰা মতে নালন্দাৰ উক্ত পৰীক্ষা কেন্দ্ৰটো কেৱল ছাত্ৰীৰ বাবে সংৰক্ষিত আছিল। তেনে অৱস্থাত শিক্ষা বিভাগে কিয় তাত এজন ছাত্ৰক তাত পৰীক্ষা দিবলৈ দিলে সেই প্ৰশ্ন উত্থাপন কৰিছে ছাত্ৰজনৰ পেহীয়েক আৰু পিতৃয়ে।