কংগ্ৰেছৰ সভাপতি মল্লিকাৰ্জুন খাৰ্গেই সোমবাৰে বিজেপিৰ সাংসদ অনন্ত কুমাৰ হেগড়েই সংবিধান সংশোধন সন্দৰ্ভত কৰা মন্তব্যক লৈ আক্ৰমণ কৰি শাসকীয় দলটো সংবিধানত সন্নিৱিষ্ট সামাজিক ন্যায় আৰু ধৰ্মনিৰপেক্ষতাৰ বিৰোধী বুলি অভিযোগ কৰে।
নতুন দিল্লীস্থিত দলৰ মুখ্য কাৰ্যালয়ত সংবাদমেল সম্বোধন কৰি কংগ্ৰেছৰ সভাপতিগৰাকীয়ে কয় যে সংবিধান সংশোধন কৰিহে বিজেপিয়ে বৃহৎ আদেশ লাভ কৰাৰ লক্ষ্য ৰাখিছে। তেওঁ কয় যে বিজেপিৰ সংবিধান সলনি বা পুনৰ্লিখনৰ যিকোনো প্ৰচেষ্টাই উত্তাল পৰিস্থিতিৰ সৃষ্টি কৰিব।
শনিবাৰে কৰ্ণাটকৰ কাৰৱাৰত অনুষ্ঠিত এক সভাত বিজেপি সাংসদ হেগড়েই কয় যে সংবিধান সংশোধন কৰিবলৈ আৰু “কংগ্ৰেছে কৰা বিকৃতি আৰু অপ্ৰয়োজনীয় পৰিৱৰ্তনক গৰিহণা দিবলৈ” বিজেপিক সংসদৰ দুয়োটা সদনত দুই তৃতীয়াংশ সংখ্যাগৰিষ্ঠতাৰ প্ৰয়োজন।”
লগতে পঢ়কঃ ‘কা’ৰ বিৰুদ্ধে সমগ্র ৰাজ্যত গণতান্ত্ৰিকভাৱে তীব্ৰ প্রতিৰোধ গঢ়ি তুলিবলৈ আহ্বান অসম বিৰোধী ঐক্যৰ
খাৰ্গেই কয়, ‘মই দুখেৰে ক’ব লাগিব যে বিজেপিয়ে সংবিধান সম্পূৰ্ণৰূপে মানি লোৱা নাই।’ তেওঁ দাবী কৰে যে এফালে প্ৰধানমন্ত্ৰী নৰেন্দ্ৰ মোদীয়ে কয় যে সংবিধান সলনি নহ’ব আৰু আনফালে তেওঁ নিজৰ লোকসকলক কয় যে সংবিধান সংশোধন কৰিবলৈ তেওঁক দুই তৃতীয়াংশ সংখ্যাগৰিষ্ঠতাৰ প্ৰয়োজন।
কংগ্ৰেছ সভাপতি খাৰ্গেই কয় যে এই বক্তব্য কোনো বাহিৰৰ লোকে দিয়া নাই বৰঞ্চ বিজেপিৰ এজন সাংসদেহে দিছে। সংবিধানত সন্নিৱিষ্ট সামাজিক ন্যায় আৰু ধৰ্মনিৰপেক্ষতাৰ বিৰোধী তেওঁলোক (বিজেপি)। বিজেপিক লক্ষ্য কৰি খাৰ্গেই কয় যে এয়া ভাল মানসিকতা নহয়, যদি সংবিধান সলনি কৰিব বিচাৰে তেন্তে ই দেশত অস্থিৰতাৰ সৃষ্টি কৰিব। খাৰ্গেৰ দাবী, সেইবাবেই প্ৰধানমন্ত্ৰী মোদীয়ে এন ডি এৰ বাবে ৪০০ৰো অধিক আসনৰ কথা কয় কাৰণ তেওঁ সংবিধান সংশোধন কৰিব বিচাৰে।
খাৰ্গেই কয়, “মোৰ দলৰ কোনোবাই যদি এনে মন্তব্য কৰে মই তেওঁক অপসাৰণ কৰিম, যদি তেওঁলোকৰ (বিজেপি) সাহস থাকে তেন্তে তেওঁলোকে তেনে কৰা উচিত… যদি তেওঁলোকে বি আৰ আম্বেদকাৰক বিশ্বাস কৰে তেন্তে তেওঁলোকে এনে লোকক নিজৰ দলৰ পৰা অপসাৰণ কৰিব লাগে আৰু টিকট দিব নালাগে।”
লগতে পঢ়কঃ অসমীয়া জাতিৰ মৃত্যুঘন্টা বজালে বিজেপিয়ে : দেশজুৰি বলৱৎ হ’ল ‘কা’
ছয়বাৰৰ লোকসভাৰ সাংসদ তথা প্ৰাক্তন কেন্দ্ৰীয় মন্ত্ৰী হেগড়ে তেওঁৰ বিতৰ্কিত মতামতৰ বাবে পৰিচিত আৰু তেওঁৰ মন্তব্যই বিগত সময়তো বিতৰ্কৰ সৃষ্টি কৰিছিল। দেওবাৰে বিজেপিয়ে হেগড়েৰ এই মন্তব্যক ব্যক্তিগত মতামত বুলি অভিহিত কৰি তেওঁৰ পৰা স্পষ্টীকৰণ বিচাৰিছে।
