ড্ৰাগছৰ গোচৰত সকাহ, ২৪ বছৰৰ মূৰত ভাৰতত ভৰি দিলে অভিনেত্ৰী মমতা কুলকাৰ্ণীয়ে
বলীউডৰ ৯০ দশকৰ জনপ্ৰিয় অভিনেত্ৰী মমতা কুলকাৰ্ণী। ২০০০ কোটি টকাৰ ড্ৰাগছৰ গোচৰত তেওঁৰ নাম জড়িত হৈ পৰিছিল। বহুদিন অনুপস্থিতিৰ অন্তত এইবাৰ মুম্বাইলৈ উভতি আহিছে অভিনেত্ৰীগৰাকী।
‘কৰণ-অৰ্জুন’ৰ অভিনেত্ৰীগৰাকীয়ে নিজৰ ইনষ্টাগ্ৰামত এটা আৱেগিক পোষ্ট শ্বেয়াৰ কৰে। ভাৰতলৈ উভতি আহি আপ্লুত অভিনেত্ৰীগৰাকীয়ে নিজৰ অনুভৱ অনুৰাগীৰ সৈতে শ্বেয়াৰ কৰিছে।
ভিডিঅ’টোত অভিনেত্ৰীগৰাকীয়ে কোৱা শুনা যায়, ‘’বন্ধুসকল, মই মমতা কুলকাৰ্ণী, মাত্ৰ ভাৰতলৈ উভতি আহিছো, বম্বেত, এতিয়াৰ মুম্বাইত ২৫ বছৰৰ পিছত। মই নষ্টালজিক কাৰণ ২০০০ চনত ভাৰত এৰি ঠিক ২০২৪ চনত উভতি আহিলোঁ। মই আপ্লুত আৰু আৱেগিক হৈ পৰিছো, কেনেকৈ প্ৰকাশ কৰিম নাজানো। বিমানখন অৱতৰণ কৰাৰ আগতে মই বাওঁফালে-সোঁফালে চাইছিলো। ওপৰৰ পৰা প্ৰায় ২৫ বছৰৰ মূৰত মোৰ দেশখন দেখিলোঁ। মই আৱেগিক হৈ পৰিলোঁ, চকুলো ওলাই আহিল। মুম্বাই আন্তঃৰাষ্ট্ৰীয় বিমানবন্দৰৰ পৰা ওলাই অহাৰ লগে লগে মই বৰ আৱেগিক হৈ পৰিলোঁ।‘’
লগতে পঢ়কঃ বিৰল মহাজাগতিক পৰিঘটনা! আজি একে শাৰীতে দেখা যাব পৃথিৱী-সূৰ্য্য-আৰু বৃহস্পতি গ্ৰহক
চলিত বৰ্ষৰ আৰম্ভণিতে বম্বে উচ্চ ন্যায়ালয়ে কুলকাৰ্ণীৰ বিৰুদ্ধে ড্ৰাগছৰ গোচৰত অপৰাধমূলক কাৰ্য্যবিধি বাতিল কৰিছিল। ন্যায়াধীশ ভাৰতী ডাংৰে আৰু ন্যায়াধীশ মঞ্জুছা দেশপাণ্ডেৰ বিভাগীয় বিচাৰপীঠে প্ৰমাণৰ অভাৱত কুলকাৰ্ণীৰ বিৰুদ্ধে গোচৰ খাৰিজ কৰে।
২০১৬ চনত থানে আৰক্ষীৰ তদন্তত এটা বিশাল ড্ৰাগছ চক্ৰৰ সন্ধান পোৱা গৈছিল। দুখন গাড়ীৰ পৰা উদ্ধাৰ হৈছিল প্ৰায় ৮০ লাখ টকাৰ ড্ৰাগছ। পিছত জনা যায় যে মমতা কুলকাৰ্ণীৰ স্বামীৰ নাম মহাৰাষ্ট্ৰৰ সেই কাৰখানাটোৰ লগত জড়িত হৈ আছে য’ত এই ড্ৰাগছ প্ৰস্তুত কৰা হয়।
লগতে পঢ়কঃ সকলো সময়তে সন্তানে অভিযোগ কৰে! শিশুক কেনেকৈ নিয়ন্ত্ৰণ কৰিব? জানি লওক সহজ কিটিপ
কোম্পানীটোৰ সঞ্চালক হিচাপে কৰ্মৰত আছিল অভিনেত্ৰীগৰাকী। আৰক্ষীয়ে অভিযোগ কৰিছিল যে ড্ৰাগছ ব্যৱসায়ৰ সৈতে মমতাৰ প্ৰত্যক্ষ সম্পৰ্ক আছে। ইয়াৰ পিছত তদন্ত চলি থাকিল, ইটোৰ পিছত সিটো শুনানিৰ পিছত অৱশেষত অভিনেত্ৰীগৰাকীয়ে সকাহ পালে।