বাটৰ কুকুৰক এচিড ঢালি নিজৰেই বিপদ মাতি আনিলে বাক্সাৰ এইজন লোকে

এচিড আক্ৰমণৰ খবৰে প্ৰায়ে সংবাদ মাধ্যমৰ শিৰোনাম দখল কৰি আহিছে।

প্ৰেম প্ৰত্যাখিত যুৱকে যুৱতীক এচিড আক্ৰমণ কৰাৰ ঘটনা প্ৰায়ে ঘটি আহিছে।

কিন্তু অসমৰ এই জন লোকে কোনো লোকক উদ্দেশ্যি এচিড আক্ৰমণ সংঘটিত কৰা নাই।

লোকজনে এচিড আক্ৰমণৰ লক্ষ্য হিচাবে বাচি লৈছে বাটৰ কুকুৰক।

বাকছা জিলাৰ জখলীপথাৰত পথৰ পাঁচটাকৈ কুকুৰৰ ওপৰত এচিড ঢালি দি পাশৱিক তৃপ্তি লাভ কৰা লোক জন হৈছে গৌতম বসাক।

১৭ ডিচেম্বৰৰ দিনা বসাকে জখলীপথাৰত পথাৰ কুকুৰৰ ওপৰত এচিড ঢালি দিছিল।

এই দৃশ্য প্ৰত্যক্ষ কৰি স্থানীয় প্ৰকৃতিপ্ৰেমী যুৱক নিৰ্মল দাসে ঘটনাটোৰ বিষয়ে পশু-পক্ষীকলৈ কাম কৰা সংগঠন  ‘The Wagging Tail’ ৰ সৈতে যোগাযোগ কৰে।

‘The Wagging Tail’ সংগঠনৰ কৰ্মকৰ্তাই ঘটনাস্থলীত উপস্থিত হৈ আহত কুকুৰ কেইটাক উদ্ধাৰ কৰি চিকিৎসাৰ বাবে গুৱাহাটীলৈ প্ৰেৰণ কৰাৰ দিহা কৰে।

অৱশ্যে এচিড আক্ৰমণৰ ফলত গুৰুতৰ বাবে  আহত কুকুৰ এটাৰ ঘটনাস্থলীতে মৃত্যু ঘটে। ঘটনা সন্দৰ্ভত ‘The Wagging Tail’-এ আৰক্ষী থানাত গোচৰ তৰাৰ পিছতে আৰক্ষীয়ে অভিযান চলাই গৌতম বসাক নামৰ যুৱক জনক গ্ৰেপ্তাৰ কৰিবলৈ সক্ষম হয়।

৪৩ বছৰীয়া গৌতম বসাকৰ বিৰুদ্ধে আৰক্ষীয়ে ভাৰতীয় দণ্ডবিধিৰ 193/20 US 289/308/429 IPC r/w sec 11 (1) (c) (l) ধাৰাত গোচৰ ৰুজু কৰি লোকজনক নলবাৰীৰ কাৰাগাৰলৈ প্ৰেৰণ কৰে।