সামাজিক মাধ্যমত ভাইৰেল হৈছে এটা ভিডিঅ’। ভিডিঅ’টোত দেখা গৈছে একাংশ গো-ৰক্ষকৰ সন্ত্ৰাস। গো-ৰক্ষকৰ নাম লৈ বাটে-পথে একাংশ দুষ্কৃতিকাৰীয়ে সন্ত্ৰাস চলাই অহাটো এতিয়া এক সাধাৰণ কথাত পৰিণত হৈছে।
পুনৰ এনে দুষ্কৃতিকাৰীৰ নৃশংসতাৰ বলি হৈছে এজন লোক। ভাইৰেল হৈ পৰা ভিডিঅ’ত দেখা গৈছে, এজন সংখ্যালঘু লোকক একাংশ তথাকথিত গো-ৰক্ষকৰ নানা নিৰ্যাতন।
দেশ বিভক্ত হৈছে। গৰুতকৈ মানুহৰ মূল্য কম হৈ পৰিছে। অভিযোগ উঠিছে যে গো-ৰক্ষকৰ আক্ৰমণত লোকজনৰ মৃত্যু হয় আৰু তাৰ পাছতে তেওঁক এটা খাৱৈত পুতি থোৱা হয়। এই নৃশংস ঘটনাটো সংঘটিত হৈছে বিহাৰত।
আক্ৰমণকাৰী লোকসকলে নিষ্ঠুৰতাৰ নিদৰ্শন দাঙি ধৰি লোকজনক পেট্ৰ’ল ঢালি জ্বলাই দিয়া বুলিও অভিযোগ উঠিছে।
লোকজনৰ মৃতদেহত নিমখ ঢালি পুতি থোৱা বুলিও একাংশ লোকে অভিযোগ কৰিছে।
ভিডিঅ’টোত জনতা দল ইউনাইটেডৰ এগৰাকী সদস্য তথা বিহাৰৰ সমস্তিপুৰ জিলাৰ বাসিন্দা ভুক্তভোগী মহম্মদ খলিল আলম নামৰ লোকজনে আক্ৰমণকাৰী কেইজনক হাতে-ভৰিয়ে ধৰি তেওঁক মাৰ-ধৰ নকৰিবলৈ অনুৰোধ কৰা দেখা গৈছে । কিন্তু তেওঁৰ অনুৰোধ তথা প্ৰাৰ্থনাত হিয়া নগলিল আক্ৰমণকাৰীকেইজনৰ।
ভিডিঅ’টোত আক্ৰমণকাৰীকেইজন দৃষ্টিগোচৰ হোৱা নাই। কিন্তু তেওঁলোকে নানা ভয়-ভাবুকিৰে গো সৰবৰাহ আৰু গো মাংস বিক্ৰী সম্পৰ্কত বিভিন্ন প্ৰশ্ন কৰা শুনিবলৈ পোৱা গৈছে।
আক্ৰমণকাৰীকেইজনে আনকি লোকজনে কিমান গো-মাংস তেওঁৰ জীৱনত খাইছে আৰু ল’ৰা ছোৱালীক খুৱাইছে সেই সম্পৰ্কতো প্ৰশ্ন কৰে ।
এই ঘটনা পোহৰলৈ অহাৰ পাছতে তীব্ৰ চাঞ্চল্যৰ সৃষ্টি হৈছে। বিৰোধী দলৰ নেতা তেজস্বী যাদৱে ৰাজ্যখনৰ আইন শৃংখলা পৰিস্থিতি সম্পৰ্কত প্ৰশ্ন উত্থাপন কৰি কয় , এনে ঘটনাই চৰকাৰৰ ব্যৰ্থতাকে সূচাইছে।
দেশত সাম্প্ৰদায়িক ঘৃণা তথা এটা বিশেষ ধৰ্মীয় সম্প্ৰদায়ৰ লোকৰ প্ৰতি এনে নিষ্ঠুৰতা এতিয়া অতি উদ্বেগৰ বিষয় হৈ পৰিছে বুলি যাদৱে মন্তব্য কৰে।
