গোৱালপাৰা জিলাৰ কৃষ্ণাই থানাৰ অন্তৰ্গত আৰিমাৰাত আজি এগৰাকী লোকে সৰিয়হ ফুল দেখুৱালে আৰক্ষী প্ৰশাসনক ৷
পুৱা ১১ মান বজাত হঠাৎ উচ্চ প্ৰাবল্যৰ বিদ্যুতৰ সুউচ্চ টাৱাৰত লোক এজন বহি থকা দেখি ৰাইজৰ মাজত হুৱাদুৱা লাগে ৷
পাছত আৰক্ষীক খবৰ দিয়াত ঘটনাস্থলীত আৰক্ষী উপস্থিত হয় ৷
আৰক্ষী তথা ৰাইজে লোকজনক তললৈ নামি আহিবলৈ বহু সময় ধৰি ইংগিত দিয়ে যদিও প্ৰায় ৫ ঘন্টা ধৰি প্ৰচণ্ড ৰ’দত বহিয়ে থাকে ৷
অৱশেষত SDRF য়ে এক শ্বাসৰুদ্ধকাৰী অভিযান চলাই উদ্ধাৰ কৰি তললৈ লৈ আহে লোকজনক ৷ লোকজনৰ ঘৰ কৃষ্ণাইৰ খৰিধৰাৰ ৰামপুৰত বুলি জানিবপৰা গৈছে ৷
লোকজনক মানসিক ভাৱে কিছু বাধাগ্ৰস্ত বুলি সন্দেহ কৰিছে ৰাইজে ৷
ইফালে ১৭ নং ৰাষ্ট্ৰীয় ঘাইপথৰ ধাননি পথাৰত থকা টাৱাৰত সংঘটিত এই নাটকীয় দৃশ্য চাবলৈ শ শ লোকৰ হেতা-ওপৰা লাগে ৷ ঘটনাটোকলৈ গোৱালপাৰা আৰক্ষীৰ তৎপৰতাক লৈ ৰাইজে শলাগ লয় ৷