বাক্সা জিলাৰ ভাৰত-ভুটান সীমান্তত হোৱা অবাধ বন ধ্বংস আৰু বনাঞ্চলসমূহত চলা অবাধ বেদখলৰ বাবেই বনৰীয়া হাতী আৰু মানুহৰ মাজত সংঘাত বৃদ্ধি পাইছে বুলি মত প্ৰকাশ কৰিছে বাক্সা জিলা বন সংমণ্ডল বিষয়া ভাবেশ চন্দ্ৰ দাসে।
২৫ আগষ্টৰ আবেলি বাক্সা জিলাৰ তামুলপুৰ বনাঞ্চলিক কাৰ্য্যালয়ৰ অন্তৰ্গত নাগ্ৰীজুলি অঞ্চলত হাতী আৰু মানুহৰ সংঘাত বিষয়ক এখন সজাগতা সভাত অংশ গ্ৰহণ কৰি বন বিষয়াগৰাকীয়ে এই মন্তব্য কৰে।
নাগ্ৰীজুলি আৰক্ষী চকী চৌহদত বন বিভাগৰ উদ্যোগত চাহ জনজাতি ছাত্র সন্থাৰ বাক্সা জিলা সমিতিৰ সভাপতি অজয় কাৰমালিৰ পৌৰোহিত্যত অনুষ্ঠিত সভাত অংশ গ্ৰহণ কৰি বন সংমণ্ডল বিষয়াগৰাকীয়ে কয় যে মানুহৰ অদূৰদৰ্শিতা আৰু অবাধ বনাঞ্চল ধ্বংসৰ ফলত বনৰীয়া হাতীৰ লগতে বন্যপ্ৰাণীসমূহৰ বিচৰণ ভূমি সংকুচিত হোৱাৰ লগতে তীব্ৰ খাদ্য সংকটত ভোগাৰ ফলতেই হাতী মানুহৰ সংঘাত বৃদ্ধি পাইছে।
নাগ্ৰীজুলি অঞ্চলৰ বিভিন্ন ছাত্ৰ সংগঠন, নাগ্ৰীজুলি আৰক্ষী চকীৰ ভাৰপ্ৰাপ্ত বিষয়া নিখিল সিংহ, নাগ্ৰীজুলি বন তালাচী চকীৰ বিষয়া-কৰ্মচাৰী আৰু স্থানীয় ৰাইজৰ উপস্থিতিত বন বিষয়াগৰাকীয়ে কয় যে হাতী মানুহৰ সংঘাত ৰোধৰ বাবে নাগ্ৰীজুলি অঞ্চলত পৰ্যাপ্ত পৰিমাণে বন কৰ্মী নথকাত সংঘাত ৰোধৰ বাবে কিছু সমস্যাৰ সৃষ্টি হৈছে যদিও এই সমস্যা অচিৰেই সমাধান কৰিব পৰা যাব বুলি আশা কৰা হৈছে।
বিগত সময়ত হাতীৰ আক্ৰমণত মৃত্যু হোৱা লোক দুজনৰ বাবে শোক প্ৰকাশ কৰি ভবেশ চন্দ্ৰ দাসে কয় যে অঞ্চল এটাত হাতী প্ৰৱেশ কৰাৰ খবৰ পালে জনসাধাৰণে সজাগ হৈ বন বিভাগৰ লোকক খবৰ দি নিৰাপদ দূৰত্বত অৱস্থান কৰিব লাগে।
সভাত উপস্থিত থাকি তামুলপুৰ বনাঞ্চলিক কাৰ্য্যালয়ৰ বনাঞ্চলিক বিষয়া কেশৱ চন্দ্ৰ ব্ৰহ্ময়ো ভাষণ ৰাখি হাতী খেদাত ৰাইজৰ সহায়-সহযোগ কামনা কৰে।
সভাৰ অন্তত বনৰীয়া হস্তী উপদ্ৰুত অঞ্চলৰ লোকৰ মাজত উচ্চ ক্ষমতাৰ টৰ্চ লাইট, উচ্চ শব্দ সৃষ্টিকাৰী ফটকা আদি বিতৰণ কৰা হয়। ক্ষতিগ্ৰস্ত পৰিয়ালসমূহকো ক্ষতি পূৰণ দিয়া হ’ব বুলি আশ্বাস দিয়ে বন বিভাগৰ বিষয়াসকলে।
