নিজৰ নাবালক পুত্ৰক মটৰ চাইকেল চলাবলৈ দি ওড়িশ্যাৰ চাম্বলপুৰ জিলাৰ এজন ব্যক্তিয়ে ৪৩,০০০ টকাৰ জৰিমনা ভৰিবলগীয়া হোৱা ঘটনাই চাঞ্চল্যৰ সৃষ্টি কৰিছে।
সূত্ৰৰ পৰা জানিব পৰা মতে, খেতৰাজপুৰ আৰক্ষী থানাৰ অন্তৰ্গত দালাদালিপাড়াৰ নিবাসী বিজয় সিঙৰ পুত্ৰক হেলমেট নিপিন্ধাকৈ বাইক চলোৱাৰ বাবে আৰক্ষীয়ে লক্ষ্মী টকিজ চকত ৰখাইছিল।
হেলমেট নিপিন্ধাৰ উপৰি নাবালকজনে যান-বাহন আৰক্ষীৰ আগত ড্ৰাইভিং লাইচেঞ্চো দেখুৱাবলৈ সক্ষম নহ’ল। ইয়াৰ উপৰি বাইকখনৰ নাছিল পলুশ্যন চাৰ্টিফিকেট আৰু ইঞ্চুৰেন্স।
লগে লগে আৰক্ষীয়ে বিজয় সিঙৰ নামত নাবালকে বাইক চলোৱাৰ বাবে ২৫০০০ টকা, ডাইভিং লাইচেঞ্চ নথকাৰ বাবে ৫,০০০ টকা, পলুশ্যন চাৰ্টিফিকেট নথকাৰ বাবে ১০,০০০ টকা, হেলমেট পৰিধান নকৰাৰ বাবে ১০০০ টকা আৰু ইঞ্চুৰেন্স নথকাৰ বাবে ২০০০ টকা জৰিমনা বিহা হয়।
উল্লেখ্য যে আৰক্ষীয়ে যান বাহন আইন উলংঘাকাৰী সকলৰ বিৰুদ্ধে অভিযান চলাই ৰাজ্যখনৰ বিভিন্ন প্ৰান্তৰ পৰা বৃহৎ পৰিমাণৰ জৰিমনা সংগ্ৰহ কৰিবলৈ সক্ষম হয় বুলি জানিব পৰা গৈছে।
