লখিমপুৰ জিলাৰ বঙালমৰাৰ এজন লোকে নিজৰ পত্নী-জী-মাহী মাক-পিতৃ-ভতিজীকে ধৰি চুবুৰীয়া আৰু আৰক্ষীৰ লোকক দাৰে ঘপিওৱাৰ এক চাঞ্চল্যকৰ ঘটনা সংঘটিত হৈছে।
শুকুৰবাৰে বঙালমৰাৰ গোহাঁই পুখুৰী গাঁৱত সংঘটিত এই ঘটনাত নুৰ জামাল ওৰফে জামাল উদ্দিন নামৰ আক্ৰমণকাৰীজনৰ পত্নী চাজিদা বেগম আৰু মাহী মাক মমতাজ বেগমে প্ৰাণ হেৰুৱাইছে।
তেওঁৰ পিতৃ আব্দুল হালিম আৰু ভতিজী তছলিমা বেগম গুৰুতৰভাৱে আহত হৈছে।
আক্ৰমণকাৰী লোকজনক গ্ৰেপ্তাৰৰ বাবে আৰক্ষীয়ে গুলী চলাব লগা পৰিস্থিতিৰ সৃষ্টি হয় আৰু ঘটনাক্ৰমে ৰমজান আলী নামৰ এজন লোকো আঘাতপ্ৰাপ্ত হয়।
আক্ৰমণকাৰী নুৰ জামালক বাধা দিবলৈ যোৱা চুবুৰীয়া আৰু আৰক্ষীৰ লোকো ঘটনাটোত আঘাতপ্ৰাপ্ত হৈছে।
বঙালমৰা আৰক্ষী চকীৰ ভাৰপ্ৰাপ্ত বিষয়া অৰ্জুন সিং আৰু আৰক্ষীৰ গাড়ীচালক বাসুদেৱ গগৈয়ো ব্যক্তিজনৰ আক্ৰমণত আহত হৈছে।
ঘটনাৰ বিৱৰণী মতে, আক্ৰমণৰ খবৰ পাই আৰক্ষীৰ লোক উপস্থিত হোৱাত নুৰ জামালে এটা ঘৰত তলা বন্ধ কৰি সোমাই পৰে।
আৰক্ষীয়ে ঘৰটোৰ দুৱাৰ ভাঙি প্ৰৱেশৰ চেষ্টা কৰাত নুৰ জামাল ঘৰটোৰ পৰা ওলাই আহে আৰু আৰক্ষীৰ লোককো আক্ৰমণ কৰিবলৈ আৰম্ভ কৰে।
পিছত আক্ৰমণকাৰী নুৰ জামালে পথাৰলৈ গৈ নিজৰ ডিঙিত ৰেপি আত্মহত্যাৰ চেষ্টা চলাইছিল যদিও স্থানীয় লোকৰ সহযোগত আৰক্ষীয়ে তেওঁক আটক কৰিবলৈ সক্ষম হয়।
