কলিয়াবৰৰ শিলঘাটস্থিত অসম সমবায় মৰাপাট কলৰ আবাসিক এলেকাত শনিবাৰে নিশা সংঘটিত হৈছে এক লোমহৰ্ষক হত্যাকাণ্ড।
জয়ন্ত কুমাৰ বৰ্মন নামৰ এজন পাষণ্ড লোকে পত্নীসহ তিনি কন্যাক নিজ ঘৰতেই নৃংশসভাৱে হত্যা কৰা ঘটনাই অঞ্চলজুৰি চাঞ্চল্যৰ সৃষ্টি কৰিছে।
হত্যাকাৰী বৰ্মনে তিনিওজনকে কটাৰীৰে ঘপিয়াই হত্যা কৰে। গাৰ নোম শিয়ৰি উঠা এই হত্যাকাণ্ড সংঘটিত কৰি নিশাই ঘৰৰ পৰা পলায়ন কৰে লোকজনে।
হত্যাৰ বলি হোৱা লোক কেইগৰাকী বজয়ন্তী বৰ্মন (পত্নী), তিনি কন্যা ক্ৰমে নিকিতা বৰ্মন(১২), ভাস্বতী বৰ্মন (১০) আৰু নিবেদিতা বৰ্মন (৬) বুলি জানিব পৰা গৈছে।
ইফালে ঘটনা সংঘটিত হোৱাৰ কিছু সময় পিছতেই ঘটনাস্থলত আৰক্ষীৰ লোক উপস্থিত হৈ মৃতদেহ কেইটা উদ্ধাৰ কৰাৰ লগতে মৰণোত্তৰ পৰীক্ষাৰ ব্যৱস্থা কৰে।
ঘটনা সন্দৰ্ভত এগৰাকী বিষয়াই কয়, ‘জয়ন্ত বৰ্মন নামৰ শিলঘাট মিলৰ কৰ্মচাৰীগৰাকীৰ আৱাসত পৰিয়ালৰ সকলো সদস্যৰ মৃতদেহ পোৱা গৈছিল। সেই খবৰৰ ভিত্তিত শিলঘাট থানাৰ আৰক্ষী উপস্থিত হৈ তদন্ত কৰি গম পালো যে তেওঁৰ মহিলা গৰাকী আৰু তিনি ছোৱালীৰ মৃতদেহ আমি কটা অৱস্থাত উদ্ধাৰ কৰিলো’।
আৰক্ষী বিষয়াজনে তদন্ত আৰম্ভ কৰাৰ কথা জানিবলৈ দি কয়, ‘স্বামী জয়ন্ত বৰ্মন বৰ্তমান পলাতক অৱস্থাত আছে। ঘৰৰ ভিতৰত কটাৰী এখনত তেজ লাগি থকা পাইছো। ফৰেনস্কিক ৰিপ’ৰ্ট অহাৰ পিছতহে আমি তদন্ত আগ বঢ়াম। মাটি-বাৰী সম্পৰ্কীয় কাগজ এখনো পাইছো’।
ইফালে ঘটনা সন্দৰ্ভত স্থানীয় ৰাইজে কয় যে জয়ন্ত কুমাৰ বৰ্মন নামৰ লোকজনে বহু বছৰৰ পৰাই জুৱা খেলৰ লগত জড়িত হৈ আছিল আৰু বহু টকাৰ ধাৰত ডুব গৈ আছিল। তেনে ধৰণৰ কিছু কথাৰ কাৰণেই এনে লোমহৰ্ষক হত্যাকাণ্ড সংঘটিত হয় বুলি লোকসকলে সন্দেহ প্ৰকাশ কৰিছে।
আনহাতে পলাতক হত্যাকাৰি বৰ্মনে আজি ৰাতিপুৱা শিলঘাট-গুৱাহাটী ৰেইলযোগে গুৱাহাটীৰ দিশে পলায়ন কৰে বুলি জানিব পৰা গৈছে।
