জয় শ্ৰী ৰাম ধ্বনি এতিয়া ভক্তিৰসৰ আধাৰ নহয়, গোঢ়া হিন্দুত্ববাদীৰ কৃপাত জয় শ্ৰী ৰাম ধ্বনিয়ে এতিয়া অন্যায় – অপৰাধৰ মাগদৰ্শনত পৰিণত হৈছে।
জাতিৰ পিতা মহাত্মা গান্ধীয়ে মৃত্যুৰ সময়ত ‘হে ৰাম’ উচ্চাৰণ কৰি শেষ নিশ্বাস ত্যাগ কৰিছিল বুলি কথিত আছে। অথচ সেই ৰাম নাম উচ্চাৰণ কৰিয়ে গান্ধীৰ উত্তৰসূৰী ভাৰতীয়ই হত্যাকাণ্ড সংঘটিত কৰিবলৈ কুণ্ঠাবোধ নকৰে।
জয় শ্ৰী ৰাম ধ্বনি উচ্চাৰণ কৰি এদল হিন্দুত্ববাদী লোকে কালি এক বিবাহ অনুষ্ঠানত কৰা গুলীবৰ্ষণত এজন লোকৰ মৃত্যু হৈছে। মধ্য প্ৰদেশত সংঘটিত হৈছে এই নিৰ্দয় ঘটনা।
বিবাহ অনুষ্ঠানটো কাৰাগাৰত থকা ‘গডমেন’ ৰামপাল নামৰ এজন ব্যক্তিৰ অনুগামীসকলে আয়োজন কৰিছিল।
স্থানীয় আৰক্ষীৰ এজন জ্যেষ্ঠ বিষয়া অমিত বাৰ্মাই জানিবলৈ দিয়ে যে সশস্ত্ৰ লোকসকলে এনে বিবাহ অবৈধভাৱে আয়োজন কৰা বুলি অভিযোগ কৰি অনুষ্ঠানত আক্ৰমণ কৰিছিল।
ৰামপালৰ অনুগামীসকলে কয় যে তেওঁ ৰামাইনী নামৰ এক পৃথক বিবাহ অনুষ্ঠান অনুসৰণ কৰে। এই অনুষ্ঠানৰ বাবে মাত্ৰ ১৭ মিনিট সময় লাগে। আক্ৰমণকাৰীসকলে অভিযোগ কৰিছে যে এনে বিবাহ হিন্দু ধৰ্মৰ বিৰোধী।
ইণ্টাৰনেটত ভাইৰেল হৈ পৰা আক্ৰমণটোৰ ভিডিঅত দেখা গৈছে যে হাতে হাতে লাঠী কঢ়িয়াই অনা লোকসকলৰ পৰা আতংকিত অতিথি সকল আঁতৰি যাবলৈ চেষ্টা কৰি দৌৰিছে আৰু এনে হুলস্থূলীয়া পৰিৱেশৰ মাজতে পঞ্চায়তৰ প্ৰাক্তন প্ৰধান দেৱতাল মীনাক লক্ষ্য কৰি এজন আততায়ীয়ে গুলীচালনা কৰে। গুলীবিদ্ধ মীনাক ৰাজস্থানৰ কোটাৰ এখন চিকিৎসালয়লৈ লৈ যোৱা হয় যদিও তেওঁৰ মৃত্যু হয়।
ভাইৰেল ভিডিঅ’বোৰত ৰঙা চাৰ্ট আৰু চানগ্লাছ পৰিহিত আক্ৰমণকাৰীজনক বন্দুক দেখুওৱা দেখা গৈছিল। তেওঁক গ্ৰেপ্তাৰ কৰা হৈছে নে নাই সেয়া এতিয়াও জনা হোৱা নাই।অৱশ্যে আৰক্ষীয়ে এই ঘটনাত জড়িত তিনিজন ব্যক্তিক গ্ৰেপ্তাৰ কৰা বুলি জানিবলৈ দিয়ে।
আনহাতে এতিয়ালৈকে চিনাক্ত কৰা ১১ জন ব্যক্তি আৰু আন আন কিছু লোকৰ বিৰুদ্ধে এটা হত্যাৰ গোচৰ ৰুজু কৰা হৈছে।
