মণিপুৰৰ এগৰাকী প্ৰখ্যাত মডেলক তেওঁ সহবাস (live-in) কৰা পুৰুষজনৰ বৈধ পত্নীক ৭০ লাখ টকাৰ ক্ষতিপূৰণ দিবলৈ নিৰ্দেশ দিছে আদালতে।
দেৱানী আদালতৰ নিৰ্দেশটোত য়েমবেম পুনী নামৰ এই মডেলগৰাকীক তেওঁ সহবাস কৰা ডাঃ কনছাম শ্যামসুন্দৰৰ বৈধ পত্নীক জীৱনসংগীৰ সান্নিধ্যৰ পৰা বঞ্চিত কৰা, স্নায়ৱিক আঘাত আৰু হতাশা দিয়াৰ বাবদ ১০ লাখ টকা; সমাজৰ দৃষ্টিত বৈধ পত্নীগৰাকীৰ মৰ্য্যাদা অৱনতি কৰা বাবদ ১০ লাখ টকা; আৰু অপূৰণীয় ক্ষতি কৰা বাবে ৫০ লাখ টকা দিবলৈ কোৱা হৈছে।
বৈধ পত্নী, যিগৰাকী এগৰাকী চিকিৎসকো, ৰঞ্জিতা আচ্চমে প্ৰেমৰ সম্পৰ্কৰ পিছত ২০০৯ চনত শ্যামসূন্দৰৰ সৈতে বিবাহ পাশত আবদ্ধ হৈছিল। তেওঁলোকৰ বিবাহ পঞ্জীয়নকৃত আছিল।
৪১ বছৰীয়া ৰঞ্জিতাৰ তেওঁৰ স্বামীৰ ফালৰ পৰা তিনিটাকৈ সন্তানো আছে।
৩৩ বছৰীয়া মডেলগৰাকীয়ে তেওঁৰ পৰা আঁতৰাই নি একেলগে বাস কৰিবলৈ ধৰা তেওঁৰ স্বামী শ্যামসুন্দৰ মণিপুৰ চৰকাৰৰ অধীনৰ এজন আই এ এছ বিষয়া।
ৰঞ্জিতাই আদালত কাষ চাপি কৈছিল যে ৩৩ বছৰীয়া মডেলগৰাকীয়ে ডা: শ্যামসুন্দৰৰ সৈতে অবৈধ সম্পৰ্ক ৰক্ষা কৰি তেওঁৰ বাবে অবৰ্ণনীয় হতাশাৰ সৃষ্টি কৰিছে।
আদালতৰ ভাষ্য আছিল যে জীৱনসংগীৰ সান্নিধ্যৰ পৰা বঞ্চিত কৰাৰ অভিপ্ৰায়মূলক অপৰাধ এতিয়াও সাধাৰণ সামাজিক নিয়মৰ দ্বাৰা নিয়ন্ত্ৰিত আৰু ভাৰতত ইয়াক কোনো আইনৰ দ্বাৰা নিয়ন্ত্ৰণ কৰা হোৱা নাই। তথাপি এই ঘটনাটোক মৌলিক আখ্যা দি আদালতে কয়, “এইটো এটা এনেকুৱা গোচৰ, যিটো এগৰাকী বৈধভাৱে বিবাহিত মহিলাৰ স্বামীৰ সৈতে বাস কৰা এগৰাকী মহিলাৰ বিৰুদ্ধে দাখিল কৰা হৈছে।”
ৰঞ্জিতাই জীৱনসংগীৰ সান্নিধ্যৰ পৰা বঞ্চনা আৰু মানসিক যন্ত্ৰণাৰ বাবে ১০ কোটি টকাৰ ক্ষতিপূৰণ দাবী কৰিছিল। তেওঁ মডেলগৰাকীৰ বিৰুদ্ধে স্থায়ী নিষেধাজ্ঞা আৰোপো দাবী কৰিছিল।
উচ্চতম ন্যায়ালয়ত উঠা ২০১৩ চনৰ এটা গোচৰৰ প্ৰসংগ টানি দেৱানী আদালতৰ বিচাৰকজনে কয়, “এজন বিবাহিত লোকৰ সৈতে সহবাস (live-in relationship) কৰাটোৱে এজন জীৱনসংগীক আনজনৰ পৰা জানি-শুনি নিঃসংগ কৰাৰ সমান- এইটো এটা গুৰুত্বপূৰ্ণ আৰু ক্ষতিপূৰণীয় অপৰাধ- বিবাহিত পক্ষটোৰ পত্নী আৰু সন্তানে আনটো পক্ষক সম্পৰ্ক নষ্ট কৰা বাবে ব্যৱস্থা গ্ৰহণৰ দাবী কৰিব পাৰে।”
“উচ্চতম ন্যায়ালয়ে এইটো কৈছিল যে বিবাহ আৰু পৰিয়াল হ’ল অতি গুৰুত্বপূৰ্ণ সামাজিক অনুষ্ঠান। সেই পৰিপ্ৰেক্ষিতত মৰমৰ পৰা বঞ্চিত কৰাটো এটা উদ্দেশ্যপ্ৰণোদিত ক্ষতিপূৰণীয় অপৰাধ, যিটোৱে বিবাদী পক্ষৰ পত্নী আৰু সন্তানক আইনীভাৱে বিবাহিত পত্নী/সন্তান বুলি জানিও স্বামী/পিতৃক তেওঁলোকৰ (পত্নী আৰু সন্তানৰ) সান্নিধ্যৰ পৰা আঁতৰাই নিয়াৰ বাবে কাৰ্য্যব্যৱস্থা লোৱাৰ হক দিয়ে।” আন এটা গোচৰৰ উল্লেখ কৰি বিচাৰকজনে কয়।
য়েমবেম পুনীয়ে আদালতত নিজকে শ্যামসুন্দৰৰ দ্বিতীয় পত্নী বুলি দাবী কৰিছিল আৰু তাৰ প্ৰমাণ হিচাপে তেওঁলোকৰ ২০১৬ চনত লৌখাপ্তা অনুষ্ঠান সম্পন্ন হোৱা বুলি কৈছিল, যিটো মণিপুৰীসকলৰ এটা সামাজিক বিবাহৰ দৰে অনুষ্ঠান।
কিন্তু আদালতে আই এ এছ বিষয়াজনৰ সৈতে মডেলগৰাকীৰ সহবাসক দ্বি-বিবাহৰ অপৰাধ হিচাপে গণ্য কৰি সেয়া নাকচ কৰে।
বৰং আদালতে কয়, “এইটো দেখা গৈছে যে ১ নং বিবাদী (য়েমবেন পুনী)-এ তেওঁ কৰাটো আইনগতভাৱে ভুল, অনৈতিক আৰু এটা ভাল পৰিয়ালৰ জীৱন টুকুৰা টুকুৰ কৰাৰ পিছতো পিছ হুঁহকিবলৈ মন কৰা নাই।”
