মণিপুৰত কুকি আৰু নগা সম্প্ৰদায়ৰ মুঠ ৩৮ জন লোকক বিভিন্ন উগ্ৰপন্থী সংগঠনে পণবন্দী কৰি ৰাখিছে। মণিপুৰৰ গৃহমন্ত্ৰী গোবিন্দাস কোনথুউজামে বৃহস্পতিবাৰে এই খবৰ অৱগত কৰাৰ লগতে ৰাজ্যখনত নতুনকৈ হিংসাত্মক পৰিস্থিতি বিয়পি পৰা বুলিও জানিবলৈ দিয়ে।
মণিপুৰৰ প্ৰশাসনিক বিষয়াই জনোৱা মতে, কাংপকপি জিলাত সন্দেহযুক্ত উগ্ৰপন্থীয়ে তিনিজন খ্ৰীষ্টান নেতাক গুলীয়াই হত্যা কৰে। এই ঘটনাত আহত হয় আন চাৰিজন। একে সময়তে ননি জিলাত গুলীচালনাত এজন সাধাৰণ নাগৰিক নিহত হোৱাৰ লগতে তেওঁৰ পত্নী আহত হয়।
গৃহমন্ত্ৰী কনথুউজামে কয় যে মুঠতে বিভিন্ন সম্প্ৰদায়ৰ ৩৮ জনতকৈ অধিক লোকক বিভিন্ন গোটে আটক কৰি ৰাখিছে। তেওঁলোকৰ মুক্তি নিশ্চিত কৰিবলৈ আমি বিভিন্ন নাগৰিক সমাজৰ গোট আৰু ৰাজনৈতিক নেতাৰ সৈতে সক্ৰিয়ভাৱে আলোচনা কৰি আছো। সাংবাদিকৰ আগত তেওঁ এইদৰে কয়।
বুধবাৰে সন্ধিয়া ননি জিলাৰ জোজংটেকৰ সমীপত সংঘটিত আক্ৰমণত নিহত এজন সাধাৰণ নাগৰিকৰ পৰিয়ালক সাক্ষাৎ কৰি কনথুউজামে এই মন্তব্য কৰে।
ইম্ফল পূৱ জিলাৰ জেএনআইএমএছ চিকিৎসালয় ভ্ৰমণৰ সময়ত মন্ত্ৰীগৰাকীৰ সৈতে তিনিজন নগা বিধায়কো উপস্থিত আছিল। তাতেই মৃতদেহ মৰণোত্তৰ পৰীক্ষাৰ বাবে ৰখা হৈছিল।
গৃহমন্ত্ৰীগৰাকীয়ে কয়, “আমি কেন্দ্ৰীয় গৃহ মন্ত্ৰণালয়ক এই বিষয়ে অৱগত কৰিছো আৰু তেওঁলোকক মুকলি কৰি দিয়াৰ প্ৰচেষ্টা চলোৱা হৈছে। আমি সন্দেহ কৰোঁ যে মণিপুৰলৈ শান্তি ঘূৰি অহাটো কিছুমান লোকে নিবিচাৰে।”
বুধবাৰে সন্ধিয়া টাফৌ কুকি গাঁৱৰ চেয়াৰমেন এল চংলইয়ে সেনাপতি থানাত লিখিত এজাহাৰ দাখিল কৰে। এজাহাৰত তেওঁ অভিযোগ কৰে যে ৭খন ট্ৰাক আৰু এখন গাড়ীৰে যাত্ৰা কৰা ২৩জন গাঁৱৰ লোকক অচিনাক্ত ব্যক্তিয়ে অপহৰণ কৰি লৈ যায়। মিজোৰামৰ মুখ্যমন্ত্ৰীয়ে গীৰ্জাৰ নেতাসকলৰ হত্যাকাণ্ডক তীব্ৰ গৰিহণা দি দোষীক শীঘ্ৰে গ্ৰেপ্তাৰ কৰাৰ দাবী জনায়।
ইফালে, বৃহস্পতিবাৰে কুকি-জো আৰু নগা জনগোষ্ঠীয়ে আহ্বান জনোৱা বন্ধৰ বাবে মণিপুৰৰ কমেও তিনিখন জিলা—কাংপকপি, চুৰাচান্দপুৰ আৰু চাণ্ডেলৰ জনজীৱন কাৰ্যতঃ স্তব্ধ হৈ পৰিছে।
প্ৰসংগক্ৰমে ২০২৩ চনৰ মে’ মাহৰ পৰা মণিপুৰ অস্থিৰ হৈ পৰিছে। উত্তৰ-পূবৰ এই ৰাজ্যখনৰ কুকি আৰু মেইটেই জনগোষ্ঠীৰ মাজত দীৰ্ঘদিনীয়া বিবাদ পুনৰ মূৰ দাঙি উঠিছে। ফলত আগন্তুক দুবছৰত দুয়োটা সম্প্ৰদায়ৰ প্ৰায় দুই হাজাৰ লোকৰ মৃত্যু হৈছে। গৃহহাৰা হৈছে পঞ্চাশ হাজাৰ পৰিয়াল।
মুখ্যমন্ত্ৰী সলনিৰ পিছত ৰাজ্যত শান্তি ঘূৰি আহিব বুলি আশা কৰা হৈছিল। তাৰ আগতে ৰাজ্যত ৰাষ্ট্ৰপতিৰ শাসন বহুদিনলৈ জাপি দিয়া হৈছিল। তাত সাময়িক শান্তি আহিলেও পুনৰ হিংসাত্মক পৰিস্থিতিৰ বাবে চিন্তিত হৈ পৰিছে ৰাজ্য চৰকাৰ।
