মণিপুৰত মঙলবাৰৰ দিনটোত ২৬৯ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰে। এয়া হৈছে মণিপুৰত এদিনীয় চিনাক্ত হোৱা দ্বিতীয় সৰ্বোচ্চ কোভিড প’জিটিভৰ ঘটনা।
বিগত ২৪ ঘণ্টাত মণিপুৰত ক’ৰ’না প’জিটিভ হোৱা ২৬৯ গৰাকী লোকৰ ভিতৰত ২৩১ গৰাকী সাধাৰণ নাগৰিক আৰু ৩৮ গৰাকী সুৰক্ষা বাহিনীৰ লোক।
মণিপুৰৰ ২৬ টা কোভিড নিয়ন্ত্ৰণ কক্ষত এইসকল লোকৰ শৰীৰত ক’ৰ’না ভাইৰাছৰ উপস্থিতি ধৰা পৰে।
পশ্চিম ইম্ফল, পূৱ ইম্ফল, উখৰুল, কাংগপোই, কামজং, ন’নেই, কাকচিং, জিৰিবাম, বিষ্ণুপুৰ, সেনাপতি আৰু থৌবাল জিলাত এইসকল লোক কোভিড প’জিটিভ হিচাপে চিনাক্ত হয়।
মঙলবাৰে চাৰিগৰাকী বহিঃৰাজ্যৰ পৰা উভতি অহা লোকৰ শৰীৰতো ক’ৰ’না ভাইৰাছৰ উপস্থিতি ধৰা পৰে।
কোভিড প’জিটিভ হোৱা আটাইকেইগৰাকী লোককে কোভিড কেয়াৰ কেন্দ্ৰত ৰখা হৈছে বুলি জানিব পৰা গৈছে।
আনহাতে, মণিপুৰত বিগত ২৪ ঘণ্টাত ৫৭ গৰাকী লোকক চিকিৎসাৰ অন্তত সুস্থ হৈ উঠাত ঘৰলৈ যাব দিয়া হৈছে।
মণিপুৰত এতিয়ালৈ মুঠ ১০,৭৪৬ গৰাকী লোকৰ শৰীৰত ক’ৰ’না ভাইৰাছৰ সংক্ৰমণ ধৰা পৰিছে।
