ব্যক্তিগত গাড়ী নিৰ্মাণৰ দেশৰ এটা বৃহত কোম্পানি মাৰুটি ছুজুকিয়ে নিৰ্মাণগত ত্ৰুটি থকা বাবে ইয়াৰ ৪০,৬১৮খন ৱেগন-আৰ গাড়ী গ্ৰাহকৰ পৰা ঘূৰাই আনিব।
সংশ্লিষ্ট গ্ৰাহকসকলৰ বাবে এই কথা বিয়াগোম কোম্পানিটোৱে আজি ঘোষণা কৰিছে। ঘোষণামতে, গোটেই বিশ্বজুৰি এই ত্ৰুটিৰ সংশোধন ঘটোৱা অভিযান চলোৱা হ’ব।
ইন্ধননলী (১ লিটাৰ ক্ষমতাৰ ইন্ধন পৰিবাহী অংশ)ৰ সম্ভাব্য ত্ৰুটি থকা কোম্পানিটোৰ এই গাড়ীবোৰ ২০১৮ চনৰ ১৫ নৱেম্বৰৰ পৰা ২০১৯ চনৰ ১২ আগষ্টৰ ভিতৰত নিৰ্মাণ কৰা।
২৪ আগষ্ট ২০১৯ চনৰ পৰাই মাৰুটি ছুজুকিৰ ডিলাৰশ্বিপবোৰে সন্দেহযুক্ত গাড়ীবোৰৰ গৰাকীৰ সৈতে যোগাযোগ আৰম্ভ কৰিব। ত্ৰুটিপূৰ্ণ অংশবোৰৰ পৰীক্ষা আৰু তাৰ পুনৰ স্থাপন বিনামূলীয়া হ’ব। মাৰুটি ছুজুকিয়ে সংবাদ মাধ্যমক এই কথা জানিবলৈ দিয়ে।
লগতে এই কথাও জনোৱা হৈছে যে ৱেগন-আৰ গাড়ীৰ গৰাকী আৰু গ্ৰাহকসকলে কোম্পানিটোৰ ৱেবছাইট marutisuzuki.com (important customer info tab) খুলি চাই তাত থকা search bar-ত চেছিছ নম্বৰ (MA3-ৰ পিছত ১৪টা অংকৰ আলফা-নিউমেৰিক সংখ্যা) সন্ধান কৰি এইটো পৰীক্ষা কৰিব পাৰিব যে তেওঁলোকৰ গাড়ীখনৰ কোনো বিসংগতি পৰীক্ষা কৰাৰ দৰকাৰ আছে নে নাই।
চেছিছ নম্বৰটো গাড়ীখনৰ ID plate-ত থকাৰ উপৰি গাড়ী কৰা ৰচিদ বা পঞ্জীয়ন নথিতো থাকে।
কোম্পানিটোৱে জানিবলৈয়ে দিয়ে যে ১.২ লিটাৰ ইন্ধন নলীৰ যিবোৰ ৱেগন-আৰ, সেইবোৰৰ এনেকুৱা ত্ৰুটি নাই।