পশ্চিম বংগত নিৰ্বাচনী তালিকাৰ বিশেষ নিবিড় সংশোধন বা এছ আই আৰ প্ৰক্ৰিয়াৰ অন্তত শনিবাৰে বিয়লি ৰাজ্যখনৰ চূড়ান্ত ভোটাৰ তালিকা প্ৰকাশ পাইছে। এই নতুন তালিকাত বিশেষকৈ দক্ষিণ কলকাতাৰ মুখ্যমন্ত্ৰী মমতা বেনাৰ্জীৰ নিজৰ সমষ্টি ভৱনীপুৰত এক অভূতপূৰ্ব পৰিৱৰ্তন দেখা গৈছে। চৰকাৰী তথ্য অনুসৰি এই এটা সমষ্টিৰ পৰাই ৪৭,১১১ জন ভোটাৰৰ নাম কৰ্তন কৰা হৈছে। এইসকল লোকক মৃত, স্থায়ীভাৱে স্থানান্তৰিত, অনুপস্থিত বা ভুৱা বুলি চিনাক্ত কৰি তালিকাৰ পৰা আঁতৰাই দিয়া হৈছে। ইয়াৰ উপৰিও ভৱনীপুৰৰে প্ৰায় ১৪,১৫৪ জন ভোটাৰৰ নাম বৰ্তমান ‘আণ্ডাৰ এডজুডিকেচন’ বা বিচাৰাধীন হিচাপে ৰখা হৈছে, যিসকলে এতিয়াও ন্যায়িক বিষয়াৰ ক্লিয়াৰেন্সৰ বাবে অপেক্ষা কৰি আছে।
এই বিশেষ সংশোধন প্ৰক্ৰিয়াৰ প্ৰথম পৰ্যায়তে ভৱনীপুৰ সমষ্টিত ৪৪,৭৮৭ জন অনুপস্থিত, স্থানান্তৰিত, মৃত বা ডুপ্লিকেট ভোটাৰ থকাৰ কথা ধৰা পৰিছিল। নিজৰ সমষ্টিত ইমান বৃহৎ সংখ্যক ভোটাৰৰ নাম কৰ্তন হোৱা বিষয়টোৱে তৃণমূল কংগ্ৰেছৰ ভিতৰচৰাত যথেষ্ট চাঞ্চল্যৰ সৃষ্টি কৰিছে। পৰিস্থিতিৰ গুৰুত্ব উপলব্ধি কৰি মমতা বেনাৰ্জীয়ে ইতিমধ্যে দলৰ নেতা আৰু বুথ লেভেল এজেণ্টসকলৰ সৈতে কেইবাখনো জৰুৰী বৈঠকত মিলিত হৈছে। ভাৰতীয় নিৰ্বাচন আয়োগে প্ৰকাশ কৰা এই তালিকাই দীৰ্ঘদিন ধৰি চলি থকা ৰাজনৈতিক তৰ্ক আৰু আইনী যুদ্ধৰ অৱসান ঘটাইছে। বৰ্তমান ৰাজ্যৰ সকলো বি ডি অ’, এছ ডি অ’ আৰু জিলা নিৰ্বাচনী বিষয়াৰ কাৰ্যালয়ত এই তালিকা উপলব্ধ কৰা হৈছে যাতে ভোটাৰসকলে নিৰীক্ষণ কৰিব পাৰে।
পশ্চিম বংগৰ মুখ্য নিৰ্বাচনী বিষয়া মনোজ আগৰৱালাৰ কাৰ্যালয়ৰ পৰা পোৱা তথ্য মতে, শুনানিৰ পূৰ্বেই খচৰা তালিকাৰ পৰা মুঠ ৬৫ লাখ ভোটাৰক আঁতৰোৱা হৈছিল। ইয়াৰ ভিতৰত ৫৮ লাখ ভোটাৰ আছিল অনুপস্থিত বা মৃত শ্ৰেণীৰ। আনহাতে প্ৰায় ৬০ লাখ ভোটাৰক লৈ অনিশ্চয়তা থকাৰ বাবে তেওঁলোকক ন্যায়িক পৰ্যালোচনাৰ অধীনত ৰখা হৈছে। উচ্চতম ন্যায়ালয়ৰ নিৰ্দেশ মৰ্মে এতিয়া ন্যায়িক বিষয়াসকলেহে এইসকল লোকৰ ভোটাধিকাৰ সাব্যস্ত কৰাৰ মৰ্যাদা নিৰ্ণয় কৰিব। উল্লেখ্য যে ১৬ ডিচেম্বৰত প্ৰকাশ পোৱা খচৰা তালিকাত ৭.০৮ কোটি ভোটাৰ আছিল। এতিয়া চূড়ান্ত তালিকাত ভোটাৰসকলক ডিলিট কৰা, বিচাৰাধীন আৰু অনুমোদিত হিচাপে স্পষ্টকৈ ভাগ কৰা হৈছে।
এই সমগ্ৰ বিষয়টোক লৈ ৰাজ্যিক বিজেপিয়ে শাসকীয় দলক তীব্ৰ আক্ৰমণ কৰিছে। কেন্দ্ৰীয় মন্ত্ৰী সুকান্ত মজুমদাৰে দাবী কৰিছে যে যি ৬৫ লাখ নাম কৰ্তন কৰা হৈছে, তাৰ ভিতৰত ২৪ লাখ লোকেই মৃত। তেওঁ অভিযোগ কৰে যে তৃণমূল কংগ্ৰেছে ইমান দিনে এই মৃত ভোটাৰৰ নামত ভুৱা ভোট দি নিৰ্বাচনত জয়লাভ কৰি আহিছিল। এইবাৰ নিৰ্বাচনত জালিয়াতি কৰাটো শাসকীয় দলৰ বাবে কঠিন হ’ব বুলিও তেওঁ মন্তব্য কৰে। অকল ভৱনীপুৰেই নহয়, কলকাতা উত্তৰ আৰু কলকাতা দক্ষিণৰ দৰে গুৰুত্বপূৰ্ণ জিলাৰ পৰাও প্ৰায় ছয় লাখৰো অধিক নাম কৰ্তন কৰা হৈছে। কলকাতা উত্তৰৰ পৰা চাৰি লাখ আৰু কলকাতা দক্ষিণৰ পৰা ২.১৫ লাখ নাম আঁতৰোৱা হৈছে।
প্ৰকাশিত তথ্য অনুসৰি কলকাতাৰ চৌৰিঘী সমষ্টিত সৰ্বাধিক ৭৪,৫০৫ টা আৰু যোৰাছংকোত ৬৭,৫৭৮ টা সংগ্ৰহ কৰিব নোৱাৰা গণনা প্ৰ-পত্ৰ বা ই এফ পোৱা গৈছে। চৌৰিঘী, যোৰাছংকো, কলকাতা বন্দৰ আৰু বালীগঞ্জৰ দৰে সমষ্টিসমূহত ইমান বৃহৎ সংখ্যক বিসংগতিয়ে আয়োগক চিন্তিত কৰি তুলিছে। মন কৰিবলগীয়া যে এই প্ৰায়বোৰ সমষ্টিতে ২০২১ চনত মমতা বেনাৰ্জীৰ দলে জয়লাভ কৰিছিল। মৃত ব্যক্তি বা একেজন ব্যক্তিৰে একাধিক নাম থকাৰ দৰে কাৰকসমূহৰ বাবেই এই বৃহৎ পৰিমাণৰ নাম কৰ্তন কৰা হৈছে। এই সংশোধনীয়ে ৰাজ্যখনৰ আগন্তুক নিৰ্বাচনী সমীকৰণত এক ডাঙৰ প্ৰভাৱ পেলাব বুলি ৰাজনৈতিক বিশ্লেষকসকলে ধাৰণা কৰিছে।
