বঙাইগাঁও জিলাৰ ৩৪ নং অভয়াপুৰী উত্তৰ বিধানসভা সমষ্টিৰ অন্তৰ্গত ৫ নং বাশবাৰীত আই নৈৰ কৰাল গ্ৰাসত শ শ বিঘা শস্যভূমিৰ লগতে বহু কেইটা ঘৰ-বাৰী জাহ গৈছে।
নদীৰ এটা পাৰ একেৰাহে তিনি-চাৰি বছৰ ধৰি ভঙাৰ ফলত অঞ্চলটোত কাল ৰূপ ধাৰণ কৰিছে গৰাখহনীয়াই।
স্থানীয় ৰাইজে বাৰম্বাৰ বিধায়ক আব্দুল হাই নাগৰীক জনোৱাৰ পিছতো তিনি-চাৰি বছৰত কোনো সমাধান উলিয়াব পৰা নাই আনকি ৰাইজৰ দুখ দুৰ্দশাৰ বুজ ল’বলৈও সময় পোৱা নাই।
ৰাইজৰ অভিযোগ মতে নিৰ্বাচনৰ আগত আহি এশ এবুৰি প্ৰতিশ্ৰুতি দি যায় আৰু নিৰ্বাচনত জয়ী হোৱাৰ পিছত তেখেতৰ মুখখন এবাৰ চাবৰ বাবে আগন্তুক নিৰ্বাচন লৈ অপেক্ষা কৰিব লাগে।
বিধায়কজনে লকডাউন আৰু বানপানীৰ সময়তো নিৰৱ ভূমিকা পালন কৰা পৰিলক্ষিত হৈছে।
গৰাখহনীয়াগ্ৰস্ত ৰাইজৰ কাষত এবাৰো নহাৰ বাবে আৱেগিক ৰাইজে চৰকাৰ তথা জিলা প্ৰশাসনক গৰাখহনীয়া ৰোধৰ বাবে যিকোনো ব্যৱস্থা গ্ৰহণ কৰিবলৈ অনুৰোধ জনায়।
ইফালে সাংসদ আব্দুল খালেকক চিনি নাপায় বুলি কয় একাংশ লোকে। সাংসদ হিচাপে নিৰ্বাচিত হোৱাৰ পিছত উক্ত অঞ্চলৰ সমস্যাৰ প্ৰতি কোনো গুৰুত্ব নিদিয়াৰ অভিযোগ সাংসদজনৰ বিৰুদ্ধে।
উল্লেখ্য যে, অৱশেষত উপায়ন্তৰ হৈ ৰাইজে নিজৰ পকেটৰ পইচা আৰু ঘৰে ঘৰে বাঁহ সংগ্ৰহ কৰি গৰাখহনীয়া ৰোধৰ বাবে যৎপৰোনাস্তি চেষ্টা চলাইছে যদিওঁ ৰোধ কৰিবলৈ সক্ষম হোৱা নাই।
ৰাইজৰ ইমান দুৰ্দশাৰ সময়তো ৰাইজৰ কাষত থিয় নিদিয়াত ধিক্কাৰ জনাইছে বিভিন্ন জনে।
ইফালে উক্ত সমষ্টিটোৰে নাম্বাৰপাৰা বাংলাপাৰাতো মানাহৰ একে ৰূপ, বিধ্বস্ত হৈছে কৃষি ভূমিৰ লগতে বহু কেইটা ঘৰ-দুৱাৰ।
বঙাইগাঁও জিলাৰ সৃজনগ্ৰাম প্ৰাথমিক শিক্ষা খণ্ডৰ অন্তৰ্গত নাম্বাৰপাৰা ৩য় খণ্ড উত্তৰ পশ্চিম প্ৰাথমিক বিদ্যালয়খনো গৰাখহনীয়াৰ কৱলত পৰাৰ উপক্ৰম ঘটিছে।
বিদ্যালয়খন দুই এদিনৰ ভিতৰতে মানাহৰ বুকুত জাহ যাব পাৰে বুলি সন্দেহ প্ৰকাশ কৰিছে স্থানীয় লোকে।
এই ক্ষেত্ৰত বিধায়ক আব্দুল হাই নাগৰীক অৱগত কৰা হৈছিল যদিওঁ কোনো গুৰুত্ব নিদি নিদ্ৰামগ্ন হৈ আছে বুলি ৰাইজে অভিযোগ কৰে। অনুতি পলমে জিলা প্ৰশাসনৰ ফালৰ পৰা বিদ্যালয় খন ৰক্ষা কৰাৰ বাবে স্থানীয় ৰাইজে অনুৰোধ জনায় ।
