শদিয়াৰ ছৈখোৱা অঞ্চলৰ ভূপেন হাজৰিকা সেতু সমীপৱৰ্তী চিচিনি আৰু ভজনী গাঁৱত ভয়ানক ৰূপত গৰা খহাইছে ন দিহিঙে।
চৰকাৰ, জনপ্ৰতিনিধিক “বাৰম্বাৰ” জনোৱাৰ পিছতো কোনো খবৰ নোহোৱাত উপায়হীন গঞাই দেওবাৰে এখন ৰাজহুৱা সভাত আন্দোলনমুখী হোৱাৰ প্ৰস্তাৱ গ্ৰহণ কৰিছে।
“পৰৱৰ্তী পৰ্য্যায়ত স্থানীয় জনপ্ৰতিনিধি আৰু বিভাগীয় কৰ্তৃপক্ষই অতি গুৰুত্বপূৰ্ণ সমস্যাটো যদি আওকাণ কৰি চলে, তেনেহ’লে তীব্ৰ গণতান্ত্ৰিক আন্দোলন গঢ়ি তোলা হ’ব,” ভজনী গাঁৱত অনুষ্ঠিত সভাৰ সিদ্ধান্ত।
খহনীয়াই এনে তীব্ৰ ৰূপ পাইছে যে গাওঁকেইখনৰ কেইবাখনো বিদ্যালয়, ভজনীৰ মূল পথ আৰু বিস্তীৰ্ণ পথাৰ খহনীয়াই ইতিমধ্যে গ্ৰাস কৰি পেলাইছে।
সোনকালে এই গৰাখহনীয়া প্ৰতিৰোধ নকৰিলে ন দিহিং আৰু ব্রহ্মপুত্ৰই তিনিচুকীয়াৰ আন ঠাইতো সংহাৰী ৰূপ ল’ব বুলি লোকসকলে আশংকা প্ৰকাশ কৰিছে।
ৰাইজে দান-বৰঙনিৰ ধনেৰে সমস্যাটোৰে মোকাবিলা কৰাৰ চেষ্টা কৰিছিল যদিও গণ প্ৰতিৰোধৰ চেষ্টা কাৰ্য্যতঃ বিফল হৈছে।
পৰিস্থিতি এনেকুৱা হৈছেগৈ যে, বৃটিশ্বৰ দিনত ১৯১৩ চনতে ৰাজহ গাওঁৰূপে স্বীকৃত অঞ্চলটোৰে ভেটি উচন হোৱাৰ পথত আগবাঢ়িছে।
“আগতে ৩০০ ঘৰতকৈ অধিক পৰিয়াল আছিল। আজি সেয়া গৈ মাত্ৰ ১০০ ঘৰ হৈছেগৈ,” স্থানীয় এজন ব্যক্তিয়ে জনায়।
তাৎপৰ্য্যপূৰ্ণভাৱে, ভূপেন হাজৰিকা সেতু নিৰ্মাণকাৰী প্ৰতিষ্ঠানৰ নামো এই বিপৰ্য্যয়ৰ মাজতে উচ্চাৰিত হৈছে।
স্থানীয় ৰাইজৰ অভিযোগ, ২০১২ চনতে সেতুখনৰ নিৰ্মাতা নবয়ুগ নামৰ কোম্পানিটোৱে অঞ্চলটোত খহনীয়া ৰোধত সহায় কৰাৰ প্ৰতিশ্ৰুতি আগবঢ়াইছিল।
ইয়াৰ কাৰণ আছিল দলং নিৰ্মাণৰ সময়ত নৈখনৰ মাজত কোম্পানিটোৱে বেৰিকেড সাজি নদীৰ সোঁতত বাধা দিয়াত সেই বছৰ অঞ্চলটোত এক ভয়ংকৰ পৰিস্থিতিৰ সৃষ্টি হৈছিল।
আৰু কোম্পানিটোৱে তেতিয়া ৰাইজৰ সৈতে আলোচনাত বহি খহনীয়া ৰোধত সহায়ৰ প্ৰতিশ্ৰুতি দিছিল।
কিন্তু আজিও সেই প্ৰতিশ্ৰুতি প্ৰতিশ্ৰুতি হৈয়ে ৰৈছে আৰু কোম্পানিৰ কোনো খবৰ নাই, ক্ষুভিত ৰাইজৰ মত।