ধাৰাসাৰ বৰষুণ অব্যাহত আছিল। জনজীৱন বিপৰ্যস্ত হৈ পৰিছিল। বিপদ আৰু বৃদ্ধি কৰি ছিকিমত সংঘটিত হ’ল অধিক ভয়াৱহ ভূমিস্খলন। পাহাৰৰ পৰা নামি অহা মাটি আৰু শিলৰ আকস্মিক ঢলে কেইবাটাও পাহাৰীয়া গাঁও ধ্বংস কৰিছে।
পশ্চিম ছিকিমৰ ইউকছম-তাছিডিং অঞ্চলৰ ৰিম্বি গাঁৱত সংঘটিত হৈছে এই ভূমিস্খলন। অৱশ্যে ছিকিমৰ পৰা এই পৰ্যন্ত হতাহতৰ কোনো খবৰ পোৱা নাই।
এই ঘটনাৰ এটা ভিডিঅ’ পোহৰলৈ আহিছে, যিটো ভিডিঅ’ ক্ষিপ্ৰতাৰে ছ’চিয়েল মিডিয়াত ভাইৰেল হৈ পৰিছে। ইয়াত পাহাৰৰ ওপৰৰ পৰা নামি অহা মাটি আৰু শিলৰ বিশাল ঢল এটা দেখা গৈছে। গাঁওখনৰ ঘৰবোৰ ভাঙি মহতিয়াই পেলোৱা হৈছে। এই ভিডিঅ’টোৱে নেপালৰ ভয়াবহ ভূমিস্খলনৰ স্মৃতি উদঙাই দিছে।
ছিকিমত অবিৰত বৰষুণৰ বাবে উদ্ধাৰ কামতো বাধাৰ সৃষ্টি হৈছে। বন্ধ কৰি দিয়া হৈছে পথ যোগাযোগ। ছিকিমৰ অন্যান্য অঞ্চলৰ লোকসকলক আৰু ভূমিস্খলন হ’ব পাৰে বুলি ধাৰণা কৰি সজাগ হ’বলৈ কোৱা হৈছে।
ছিকিম প্ৰশাসনে কয় যে ৰিম্বি অঞ্চলত এয়া প্ৰথম ভূমিস্খলন নহয়। ভূমিস্খলনৰ ফলত ৰিম্বি আৰু খাচেওপালিকৰ পথ প্ৰায় বিধ্বস্ত হৈছে। ফলত পথেৰে যোগাযোগত বিঘিনি ঘটিছে।
শুকুৰবাৰে পুৱা গড়কাপ্তানী মন্ত্ৰী এন বি দাহালে ইউকছম-তাছিডিং সমষ্টিৰ ৰিম্বি আৰু ইয়াৰ আশে-পাশে থকা পথকে ধৰি কেইবাটাও ক্ষতিগ্ৰস্ত অঞ্চল পৰিদৰ্শন কৰে। সমগ্ৰ অঞ্চলটোত কিমান ক্ষতি হৈছে সেয়া এতিয়াও কোৱা সম্ভৱ হোৱা নাই। মেৰামতিৰ কাম ক্ষিপ্ৰ কৰাৰ নিৰ্দেশ দিছে প্ৰশাসনে।
গড়কাপ্তানী মন্ত্ৰী দাহালে ৰিম্বি অঞ্চলৰ কেইবাটাও পথ ভূমিস্খলনৰ কবলত পৰা বুলি জানিবলৈ দিয়ে। তেওঁ ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম লিমিটেডক পৰিস্থিতি স্বাভাৱিক কৰি তুলিবলৈ নিৰ্দেশ দিছে।
