চীনত নিৰ্মাণাধীন ৬০,০০০ মেগাৱাট ক্ষমতাসম্পন্ন মেডগ জলবিদ্যুৎ প্ৰকল্প, অসম আৰু বাংলাদেশৰ বাবে গভীৰ পৰিৱেশগত আৰু আন্তঃগাঁথনিক বিপদৰ সংকেত বহন কৰিছে। এই বিষয়টিক লৈ ডিব্ৰুগড় প্ৰেছ ক্লাবে সাংবাদিকতাৰ ৫০ বছৰ উদযাপন উপলক্ষে অনুষ্ঠিত এক আলোচনা অনুষ্ঠিত হৈ যায়।
ডিব্ৰুগড় বিশ্ববিদ্যালয়ৰ প্ৰাক্তন অধ্যাপক তথা অভিজ্ঞ ভূতত্ত্ববিদ ড° যোগেন্দ্ৰনাথ শৰ্মাই এই বৃহৎ প্ৰকল্পটোক “অসম আৰু বাংলাদেশৰ বাবে এক সম্ভাৱ্য বিপদ” বুলি আখ্যা দি তেওঁ কয়, বান্ধটোৰ ফলত নদীৰ পানীত পলসৰ ঘাট হোৱাৰ সম্ভাৱনাই নদীৰ পাৰৰ খহনীয়া বৃদ্ধি কৰিব পাৰে, যাৰ দ্বাৰা ভূমিক্ষয়, গাঁও উজাৰি যোৱা, আৰু কৃষি ভূমিৰ ক্ষতি হোৱাৰ আশংকা থাকিব।
তেওঁ ভূগৰ্ভস্থ পানী স্তৰ হ্ৰাস আৰু খৰাং-বৰষুণৰ ধৰণৰ অস্বাভাৱিকতা লৈও উদ্বেগ প্ৰকাশ কৰে। সেয়ে ব্ৰহ্মপুত্ৰ নদী মণ্ডলৰ জনসাধাৰণ, কৃষক, আৰু মাছমৰীয়াৰ জীৱিকাৰ ওপৰত বিপৰ্যয়ৰ আশংকাই দেখা দিছে।
ড° শৰ্মাই আগবঢ়োৱা আন এক গুৰুত্বপূর্ণ আশংকা হ’ল ভূমিকম্পৰ সম্ভাৱ্যতা। তেওঁ উল্লেখ কৰে, ১৯৫০ চনৰ ভয়ংকৰ ভূমিকম্পৰ দৰে ঘটনাই যদি বান্ধটোৰ গাঠনিক স্থিৰতা বিঘ্নিত কৰে, তেন্তে ই বিপৰ্যয়জনক বানপানী, ভূমিস্খলন সৃষ্টি কৰিব পাৰে।
বাংলাদেশৰ প্ৰসঙ্গত তেওঁ কয়, যদিও ইয়াৰলুং ছাংপো নদীয়ে ব্ৰহ্মপুত্ৰত অতি কম হাৰত পানী যোগায়, তথাপিও এই ধৰণৰ গাঁথনিৰ বিপদ উপেক্ষা কৰিব নোৱাৰি।
চীনৰ এই প্ৰকল্পৰ প্ৰতি সঁহাৰি দি ভাৰতেও ১১,০০০ মেগাৱাট জলবিদ্যুৎ প্ৰকল্পৰ পৰিকল্পনা কৰিছে, যদিও ড° শৰ্মাই স্বীকাৰ কৰে যে ইয়াৰো অভ্যন্তৰীণ পৰিৱেশগত প্ৰত্যাহ্বান থাকিব পাৰে।
এই আলোচনা সভাত ছিয়াং খিলঞ্জীয়া কৃষক মঞ্চৰ প্ৰতিনিধিসকলে লগতে অন্যান্য বিশিষ্ট অতিথিসকলে অংশগ্ৰহণ কৰে। ডিব্ৰুগড় প্ৰেছ ক্লাবৰ সাধাৰণ সম্পাদক ৰিপুঞ্জয় দাসৰ উদ্যোগত অনুষ্ঠিত অনুষ্ঠানটো ড° যোগেন্দ্ৰনাথ শৰ্মাক পৰম্পৰাগত উপহাৰেৰে সন্মান জনোৱাৰ জৰিয়তে সামৰণি পৰে।
এই বক্তৃতাই স্পষ্টকৈ চিহ্নিত কৰে যে চীনৰ এই উচ্চ ক্ষমতাৰ জলবিদ্যুৎ প্ৰকল্প কেৱল শক্তি উৎপাদন নহয়, বৰং ইয়াৰ অন্তৰ্গত ভূ-ৰাজনৈতিক আৰু পৰিবেশগত প্ৰভাৱসমূহৰ ওপৰতো সতর্ক দৃষ্টিৰ প্ৰয়োজন।
