নিজৰ ৩৩ বছৰীয়া কেৰিয়াৰত ৫৭ বাৰ বদলিৰ সন্মুখীন হৈছে। এতিয়া তেওঁৰ বয়স ৫৯ বছৰ। তথাপি একেবাৰেই দমি যোৱা নাই। বৰঞ্চ তেওঁৰ সুনাম বাঢ়িছে। ক্ষমতাসীন চৰকাৰৰ বিৰুদ্ধে বিৰক্ত হৈছে, সৰৱ হৈছে। কিন্তু আকৌ কামলৈ উভতি আহিছে। কেৰিয়াৰৰ আচল সময়খিনিৰ বেছিভাগ সময়তে তেওঁক ‘কাম নোহোৱা’ স্থানত বহোৱা হৈছে।
কিন্তু চৰকাৰে সেই অশোক খেমকাকে অৱসৰৰ পূর্বে এটা ডাঙৰ দায়িত্ব লৈ আনিলে৷ তেওঁক হাৰিয়ানা পৰিবহণ বিভাগৰ অতিৰিক্ত মুখ্য সচিব হিচাপে নিযুক্তি দিয়া হৈছে। ২০২৫ চনৰ ৩০ এপ্ৰিলত অৱসৰ ল’ব বুলি কেইবাটাও সংবাদ মাধ্যমত দাবী কৰা হৈছে।
১৯৯১ চনৰ হাৰিয়ানাৰ কেডাৰ বিষয়াগৰাকীয়ে ২০১২ চনত কংগ্ৰেছ সভানেত্ৰী ছোনিয়া গান্ধীৰ জোঁৱাই ৰবাৰ্ট ভাদ্ৰাৰ সৈতে জড়িত ভূমি চুক্তিৰ মিউটেচন বাতিল কৰিছিল। দেশৰ প্ৰশাসনিক মহলত হুলস্থুলৰ সৃষ্টি হৈছিল। তেওঁৰ বিষয়ে কিতাপ এখন আছে। যাৰ নাম, Just Transferred: The Untold Story of Ashok Khemka।
ছচিয়েল মিডিয়াত কেইবাবাৰো ক্ষোভ প্ৰকাশ কৰিছে আই এ এছ বিষয়া অশোক খেমকাই। এবাৰ তেওঁ লিখিছিল, ‘’মই কাৰ স্বাৰ্থ ৰক্ষা কৰিম? পোনপটীয়াকৈ আপোনালোকৰ, নে আপুনি প্ৰতিনিধিত্ব কৰা বুলি দাবী কৰাসকলৰ? হাতত ক্ষমতা আছে, সেয়ে মোক এনেকৈ ভৰিৰে মোহাৰিছা। সেইটোৱেইটো। মই আগতেও সহিছো, আৰু এবাৰ সহিয়েই নাথাকো কিয়।’’
কেতিয়াবা লিখিছে, ‘’বহুতৰ বহুত ন্যাস্ত স্বাৰ্থ তথা বাধা-বিপত্তি আওকাণ কৰি দুৰ্নীতি ৰোধ কৰিবলৈ চেষ্টা কৰিছিলো।… দুখজনক পৰিস্থিতি।’’
বিগত দশকত তেওঁক প্ৰায়ে বিভিন্ন ‘গুৰুত্বহীন’ পদত দায়িত্ব দিয়া হৈছে। প্ৰশাসনিক মহলত শুনা যায় যে গোটেই কেৰিয়াৰত তেওঁক ৬ৰ পৰা ৮ মাহৰ ভিতৰত বাৰে বাৰে বদলি কৰা হৈছে। তেওঁ নিজৰ কৰ্মক্ষেত্ৰত দুৰ্নীতিৰ বিৰুদ্ধে বাৰে বাৰে যুঁজিছিল। তেওঁ নিজৰ ছ’চিয়েল মিডিয়াৰ জৰিয়তে বাৰে বাৰে দুৰ্নীতিৰ বিৰুদ্ধে যুঁজিবলৈ বাৰ্তা দিছে।
যোৱা বছৰো খেমকাই তেতিয়াৰ মুখ্যমন্ত্ৰী মনোহৰলাল খট্টৰলৈ পত্ৰ লিখি ভিজিলেন্স বিভাগৰ দুৰ্নীতিৰ শিপাৰ ওচৰলৈ যোৱাৰ কথা কয়। তেওঁক বিশ্বাস কৰি দুৰ্নীতি ৰোধ কৰাৰ সুযোগ দিব লাগে বুলি আৰ্জি জনাইছিল। উল্লেখ্য যে ২০১২ চনত ডি এল এফৰ সৈতে ভাদ্ৰাৰ ভূমি চুক্তি বাতিল কৰি দিছিল তদানীত্বন ভূমি ৰাজহ বিভাগৰ আমোলা অশোক খেমকাই।
মনোহৰলাল লাল খট্টৰ নেতৃত্বাধীন বিজেপি চৰকাৰৰ প্ৰথম কাৰ্যকালত খেমকাই পৰিবহণ আয়ুক্ত হিচাপে কাৰ্যনিৰ্বাহ কৰিছিল, আৰু তাৰ প্ৰায় এদশক পিছত তেওঁক পৰিবহণ বিভাগলৈ ঘূৰাই অনা হৈছে। যদিও পূৰ্বৰ কাৰ্যকালত পৰিবহণ বিভাগত তেওঁ মাত্ৰ চাৰি মাহহে কাম কৰিছিল।
পৰিবহণ আয়ুক্ত হিচাপে থকা সময়ছোৱাত অশোক খেমকাই অটোম’বাইল আৰু ইলেক্ট্ৰনিক সামগ্ৰী কঢ়িয়াই অনা বৃহৎ ট্ৰাক আৰু ট্ৰেইলাৰৰ বাবে ফিটনেছ চাৰ্টিফিকেট প্ৰদান কৰিব বিচৰা নাছিল, যাৰ বাবে সেই সময়ত ট্ৰাক ধৰ্মঘটৰ সৃষ্টি হৈছিল। সেই পৰিস্থিতিৰ সৈতে মোকাবিলা কৰিবলৈ চৰকাৰৰ বহু সময় লাগিছিল। এনে একাধিক পৰিস্থিতিত উপযুক্ত পদক্ষেপ ল’বলৈ তেওঁ কেতিয়াও কুণ্ঠাবোধ কৰা নাছিল।
তেওঁ একাধিক বিষয়কলৈ কোইবাবাৰো সৰৱ হৈ পৰিছে। এসময়ত বন আইনৰ অধীনত আৰৱালী পাহাৰত নিৰ্মাণ কাৰ্য কঠোৰভাৱে নিষিদ্ধ আছিল। হাৰিয়ানাৰ মনোহৰলাল খট্টৰ চৰকাৰে তাত সংশোধন কৰে। সেই সন্দৰ্ভত এখন বিধেয়ক ৰাজ্য বিধানসভাতো গৃহীত হয়। শেহতীয়াকৈ ৰাজ্য চৰকাৰৰ এই পদক্ষেপক লৈ সৰৱ হৈছিল অশোক খেমকা। ৰাজহুৱাভাৱেও তেওঁ নিজৰ মতামত প্ৰকাশ কৰে। লগতে ধৰ্মৰ নামত বিভাজনৰ চেষ্টাকলৈও টুইটাৰ (বৰ্তমান এক্স)তো সৰৱ আছিল। সেই সময়তো তেওঁ বদলিৰ সন্মুখীন হৈছিল।
তেওঁৰ ছ’চিয়েল মিডিয়া হেণ্ডেলত এটা পোষ্ট এতিয়াও চৰ্চাত – ‘সকলোৰে আগতে পোন গছজোপাই কটা হয়।’ নতুন দায়িত্ব পোৱাৰ পিছত তেওঁ যে আকৌ কিবা ডাঙৰ পদক্ষেপ ল’ব সেয়াই সংশ্লিষ্ট মহলে অনুমান কৰিছে।
