বুধবাৰে শিৱসাগৰ জিলা উপায়ুক্তৰ কাৰ্য্যালয়ত অনুষ্ঠিত এক সভাত উপায়ুক্ত এছ লক্ষ্মণনে সমাগত লোকসভা নিৰ্বাচনৰ প্ৰতি লক্ষ্য ৰাখি i-help পদক্ষেপ সম্পৰ্কীয় এখন অভিবিন্যাস সভা অনুষ্ঠিত কৰে। উক্ত সভাত জিলাখনৰ ৮৪ টা সাধাৰণ সেৱা কেন্দ্ৰৰ লগত জড়িত গাঁও পৰ্য্যায়ৰ স্বেচ্ছাসেৱক সকলক বুথ পৰ্য্যায়ৰ বিষয়া সকলৰ সহযোগিতাত তৃণমূল পৰ্য্যায়ত ভোটাৰ সকলৰ মাজত সজাগতা বৃদ্ধিৰ হকে বিভিন্ন কাৰ্যসূচী গ্ৰহণ কৰিবলৈ আহ্বান জনায়।
তেওঁ লগতে সভাত উপস্থিত গাঁও পৰ্য্যায়ৰ স্বেচ্ছাসেৱক সকলক i-help ৰ অন্তৰ্গত উপলবদ্ধ বিভিন্ন সেৱাসমূৰ অধিকতম সুফল ভোটাৰ ৰাইজক প্ৰদান কৰাৰ হকে কাম কৰি যাবলৈ উদগনি যোগায়।
উল্লেখযোগ্য যে, i-help হৈছে নিৰ্বাচন প্ৰক্ৰিয়াত অনা ডিজিটেল পৰিৱৰ্তনসমূহ জনসাধাৰণৰ ওচৰলৈ লৈ যোৱাৰ অৰ্থে গ্ৰহণ কৰা এক পদক্ষেপ।
নিৰ্বাচন বিভাগ আৰু সাধাৰণ সেৱা কেন্দ্ৰৰ যুটীয়া সহযোগত মুকলি এই ব্যৱস্থাৰ জৰিয়তে ডিজিটেল নির্বাচনী শিক্ষাৰ প্ৰচাৰ আৰু প্ৰসাৰৰ ব্যৱস্থা কৰা হ’ব। নিৰ্দিষ্ট কেইটামান ছফ্টৱেৰৰ সহায়ত ভোটাৰসকলে ভোটাৰ তালিকাত নিজৰ নাম পৰীক্ষা কৰাৰ উপৰি বিশেষভাৱে সক্ষম লোকসকলে ভোট দিবলৈ যোৱাৰ বাবে প্ৰয়োজনীয় সুবিধাৰ বিষয়ে জনাৰ লগতে নিৰ্বাচনী আচৰণ বিধি উলংঘন সম্পৰ্কীয় অভিযোগো দাখিল কৰিব পাৰিব।
আনহাতে, দিব্যাঙ্গসকলক ভোট দিবলৈ উদগনি যোগোৱাৰ বাবে একোগৰাকী স্থানীয় সৰবৰহী দিব্যাঙ্গ ব্যক্তিক “দিব্যাঙ্গ সাৰথি” ৰূপে নিয়োগ কৰা হ’ব । ইয়াৰ উপৰি, নাগৰিকে বিভিন্ন তথ্য জানিবৰ বাবে ১৯৫০ নম্বৰৰ হেল্পলাইন ব্যৱস্থা উপলব্ধ থাকিব।