নৱগঠিত চৰাইদেউ জিলাৰ অন্যতম উল্লেখনীয় ৰাজহ সংগ্ৰহকাৰী ভজো ৰেল ষ্টেইশ্যন চৌহদত আজি ভজো ৰেলৱে ভিজিলেঞ্চ কমিটিৰ উদ্যোগত এক চাফাই অভিযান কাৰ্যসূচী গ্ৰহণ কৰা হয়।
নৱগঠিত ভিজিলেঞ্চ কমিটিৰ সভাপতি বিপুল গোঁহাই, কাৰ্যকৰী সভাপতি পুষ্প চাংমাই, সম্পাদক দেৱজিৎ গগৈৰ নেতৃত্বত গ্ৰহণ কৰা এই কাৰ্যসূচীত ভিজিলেঞ্চ কমিটিৰ কৰ্মকৰ্তাসকলৰ লগতে স্থানীয় বিভিন্ন দল-সংগঠন তথা জনসাধাৰণে অংশগ্ৰহণ কৰে।
উল্লেখযোগ্য যে চৰাইদেউ জিলাৰ সদৰ সোণাৰিৰ পৰা মাত্ৰ চাৰিকিলোমিটাৰ আঁতৰৰ ভজো ৰেল ষ্টেইশ্যনটো উত্তৰ পূব সীমান্ত ৰে’লৱে তিনিচুকীয়া ডিভিজনৰ অন্তৰ্গত উল্লেখনীয় ৰাজহ সংগ্ৰহকাৰী ৰেল ষ্টেইশ্যন।
কিন্তু অতি পৰিতাপৰ কথা যে এই ষ্টেইশ্যনটোৰ প্ৰতি উত্তৰ-পূব সীমান্ত ৰে’লৱে যিদৰে দায়বদ্ধ হ’ব লাগিছিল সেইদৰে দায়বদ্ধ নোহোৱাত ষ্টেইশ্যনটোৰ আন্তঃগাঁথনি উন্নয়ন স্তব্ধ হৈ পৰাত যাত্ৰীসকলে অসুবিধাৰ সন্মুখীন হৈছে।
ইফালে ষ্টেচনটোৰ আন্তঃগাঁথনি উন্নয়নৰ বাবে বিভিন্ন দল-সংগঠনে বাৰম্বাৰ দাবী জনায় আহিছে যদিও আজিলৈকে ৰেল কৰ্তৃপক্ষই কোনো ধৰনৰ গুৰুত্ব প্ৰদান কৰা নাই।
ইয়াৰ পৰিপ্ৰেক্ষিতত আজি ভিজিলেঞ্চ কমিটিয়ে অনতি পলমে ভজো ষ্টেচনত অভাৰ ব্ৰীজ নিৰ্মাণ কৰা, শীঘ্ৰেই অতিৰিক্ত শৌচালয় নিৰ্মাণ কৰা, যাত্ৰীবাহী ৰঙিয়া এক্সপ্ৰেছ দৈনিক ভজো ষ্টেচন হৈ চলাচল কৰোৱা, দূৰণিবটীয়া অৱধ আচাম আৰু অমৃতসৰ এক্সপ্ৰেছ ৰখোৱাৰ ব্যৱস্থা গ্ৰহণ কৰিবলৈ দাবী জনায় চৰাইদেউ জিলাৰ উপায়ুক্তৰ জৰিয়তে ৰেল বিভাগৰ মন্ত্ৰীলৈ স্মাৰকপত্ৰ প্ৰেৰণ কৰাৰ ব্যৱস্থা গ্ৰহণ কৰে।