লোক সভাৰ চাবঅৰ্ডিনেট লেজিছলেচন কমিটিয়ে নাগৰিকত্ব সংশোধন আইন ৰূপায়নৰ বিধি প্ৰণয়নত বিলম্ব হোৱা সন্দৰ্ভত কেন্দ্ৰীয় গৃহ মন্ত্ৰ্যালয়ৰ পৰা অহা মাহৰ প্ৰথম ভাগতে উত্তৰ বিচাৰিব।
বিতৰ্কিত আইনখনৰ বিধি প্ৰণয়নৰ ক্ষেত্ৰত ইতিমধ্যে ছমাহৰ সময়সীমা উকলি গৈছে।
সমিতিখনৰ অধ্যক্ষ ৱাই এছ আৰ কংগ্ৰেছৰ সাংসদ ৰঘু ৰামকৃষ্ণ ৰাজুৱে এই সন্দৰ্ভত অহা ৪ আগষ্টত গৃহ মন্ত্ৰ্যালয়ৰ বিষয়াক লগ কৰাৰ কথা।
যোৱা ১১ ডিচেম্বৰত সংসদত আইনখন গৃহীত হোৱাৰ পিছত ৰাষ্ট্ৰপতি ৰামনাথ ক’বিন্দে ১২ ডিচেম্বৰত তাত অনুমোদন জনাইছিল।
পিছত গৃহ মন্ত্ৰ্যালয়ে এক অধিসূচনা জাৰি কৰিছিল। কিন্তু যোৱা মাহত অধিসূচনাৰ সময়সীমা উকলি গৈছে।
বিধিমতে অধিসূচনা জাৰি কৰাৰ ছমাহৰ ভিতৰত এখন আইনৰ বলৱৎকৰণৰ বাবে চৰকাৰে বিধি প্ৰণয়ন কৰিব লাগে।
সূত্ৰমতে বিধি প্ৰণয়নৰ বাবে চৰকাৰে অতিৰিক্ত সময় বিচৰাৰ ক্ষেত্ৰত চাবঅৰ্ডিনেট কমিটিখনে সমস্যাৰ সৃষ্টি কৰিব পাৰে, কাৰণ সমিতিখনত শাসক দলৰ সংখ্যাগৰিষ্ঠতা নাই।
