নৃশংস- নাৰকীয় অত্যাচাৰৰ ভুক্তভোগী এগৰাকী ১৬ বছৰ বয়সৰ কিশোৰী। মাত্ৰ ছয় মাহৰ ভিতৰতে ৪০০ জনৰ অধিক লোকৰ কামনাৰ বলি হৈছে এই কিশোৰী গৰাকী। আনকি ভুক্তভোগীৰ ত্ৰাণকৰ্তা আৰক্ষীৰো যৌন কামনাৰ ভুক্তভোগী হৈছে এই নাবালিকা গৰাকী। পলমকৈ পোহৰলৈ অহা মহাৰাষ্ট্ৰৰ এই নাৰকীয় ঘটনাই এতিয়া চাঞ্চল্যৰ সৃষ্টি কৰিছে।
কিশোৰীগৰাকীয়ে উল্লেখ কৰা অনুসৰি কেইবছৰমান আগতে তাইৰ মাকৰ মৃত্যু হৈছিল। তাৰ পিছত কিশোৰী গৰাকী তেওঁৰ দেউতাকৰ সৈতে বাস কৰিছিল। যোৱা আঠ মাহ আগতে দেউতাকে কিশোৰীগৰাকীক বিয়া দিয়ে।
কিন্তু স্বামী আৰু শহুৰৰ দ্বাৰা নিৰ্যাতনৰ বলি হৈ স্বগৃহলৈ ঘূৰি আহে কিশোৰী গৰাকী।
কিশোৰী গৰাকীৰ ভাষ্য অনুসৰি দেউতাকে কেইদিনমানৰ বাবে তেওঁৰ ভৰণ-পোষণ কৰি আছিল। কিন্তু তেওঁৰ বাবে প্ৰতিদিনে তেওঁৰ জীয়েকৰ খৰচ বহন কৰাটো সম্ভৱ নাছিল। গতিকে কিশোৰী জীৱিকাৰ সন্ধানত আম্বজোগাইলৈ যায়।
আম্বেজোগাইত কামৰ প্ৰতিশ্ৰুতি দি দুজন ব্যক্তিয়ে কিশোৰীগৰাকীক ধৰ্ষণ কৰে। কিন্তু ইয়াৰ পিছতো কোনো বিকল্প জীৱিকাৰ পথ নাপাই তেওঁ ভিক্ষা কৰিবলৈ বাধ্য হৈছিল। তেওঁ অম্বেজোগাই বাছ ষ্টেণ্ডত ভিক্ষা কৰিছিল। অভিযোগ অনুসৰি সেই সময়ত তেওঁ প্ৰায়েই যৌন উৎপীড়ন বলি হয়।
এই ৬ মাহত কমেও ৪০০ জন লোকে যুৱতীগৰাকীক ধৰ্ষণ কৰিছিল বুলি অভিযোগ কৰিছে কিশোৰী গৰাকীয়ে। আম্বেজোগাই আৰক্ষী থানাত তেওঁ অভিযোগ দাখিল কৰিছিল যদিও আৰক্ষীৰ পৰা কোনো সহায় লাভ নকৰে বুলি উল্লেখ কৰে কিশোৰী গৰাকীয়ে। বৰঞ্চ এজন আৰক্ষী বিষয়াই ধৰ্ষণ কৰাৰ গুৰুতৰ অভিযোগ উত্থাপন কৰে কিশোৰী গৰাকীয়ে ।
অৱশেষত এজন আৰক্ষী বিষয়াই বিপদৰ মুহূৰ্তত তেওঁৰ কাষত থিয় দিয়ে আৰু কিশোৰী গৰাকীৰ বিবৃতি অনুসৰি তেওঁ এখন এজাহাৰ দাখিল কৰে। ঘটনাটোৰ সন্দৰ্ভত এতিয়ালৈকে তিনিজন লোকক গ্ৰেপ্তাৰ কৰা হৈছে।
একাধিক ব্যক্তিৰ পৰা যৌন উৎপীড়নৰ সন্মুখীন হোৱা নাবালকগৰাকী বৰ্তমান ২ মাহৰ গৰ্ভৱতী। তেওঁ গোটেই ঘটনাটোৰ দ্বাৰা আৱেগিকভাৱে ভাগি পৰিছে। অভিযুক্তৰ উচিত শাস্তি দাবী কৰিছে কিশোৰী গৰাকীয়ে।
