চুবুৰীয়া দেশৰ অ-মুছলমান শৰণাৰ্থীক ভাৰতীয় নাগৰিকত্ব দিবলৈ ৰাষ্ট্ৰীয় সংকল্পধাৰী বিজেপি নেতৃত্বাধীন চৰকাৰৰ আমোলতে বাংলাদেশী জে’লত পচিছে দৰিদ্ৰ অসমীয়া।
তাৎপৰ্য্যপূৰ্ণভাৱে, বিদেশীৰ চিন্তাত দেশী বিক্ষোভলৈ কেৰেপ নকৰা সোণোৱাল চৰকাৰৰ সঁহাৰিহীনতাৰ বাবেই ম্যাদ উকলাৰ পিছতো বাংলাদেশত বন্দী হৈ আছে মুকুল হাজৰিকা নামৰ মঙলদৈৰ ৰিক্সাচালকজন।
হাজৰিকাৰ নাগৰিকত্বৰ সত্যাসত্যতা সন্দৰ্ভত ৰাজ্য চৰকাৰৰ প্ৰয়োজনীয় সঁহাৰিৰ অভাৱতে ম্যাদ উকলাৰ পিছতো তেওঁ মুক্তি পোৱা নাই, এই তথ্য বাংলাদেশত ভাৰতীয় উপ উচ্চায়ুক্ত বিশ্বদীপ দে’ই অসম চৰকাৰলৈ যোৱা ৫ মে’ত দিয়া পত্ৰ (DAC/CONS/411/03/2019)ৰ।
অসমৰ গৃহ আৰু ৰাজনৈতিক বিভাগৰ প্ৰধান সচিবলৈ প্ৰেৰণ কৰা পত্ৰখনৰ প্ৰতিলিপি ৰাজ্যৰ মুখ্য সচিব আৰু দৰং জিলাৰ উপায়ুক্তকো দিয়া হৈছে।
বৰ্তমান বাংলাদেশৰ ফেনি জে’লত বন্দী হাজৰিকা ফুলেশ্বৰ হাজৰিকাৰ একমাত্ৰ পুত্ৰ, গাওঁ মঙ্গলদৈ আৰক্ষী থানাৰ অন্তৰ্গত হ’দাপাৰা। তিনি বছৰ পূৰ্বে নিৰুদ্দেশ হোৱা হাজৰিকা বিবাহিত, তেওঁৰ পত্নী কাঞ্চন হাজৰিকা আৰু আছে দুই সন্তান।
এসময়ত মঙলদৈৰ জানাৰাম চৌকাত ৰিক্সা চলোৱা হাজৰিকা কি কাৰণত কেতিয়া গৈ দেশখনত বন্দী হ’ল সেই কথা জানিব পৰা হোৱা নাই। কোনো বিদ্ৰোহী গোটৰ সৈতে তেওঁৰ সম্পৰ্কৰ সম্ভাৱনাও নুই কৰিছে পিতৃ ফুলেশ্বৰ হাজৰিকাই।
পিতাকৰ মতে তেওঁ কিছু পৰিমাণে “মানসিক বিকাৰগ্ৰস্ত”। তেওঁৰ নিৰুদ্দেশ সন্দৰ্ভত পৰিয়ালে মঙলদৈ থানাত এখন এজাহাৰো দাখিল কৰিছিল।
কি কাৰণত তেওঁ নিৰুদ্দেশ হ’ল তাৰ কোনো উৱাদিহ নোপোৱা পৰিয়ালটোৱে ব্যক্তিজনৰ পৰিয়ালৰ সন্ধান কৰিবলৈ আৰক্ষী অহাৰ পিছতহে এই সন্দৰ্ভত জানিব পাৰিছে।
দৰঙৰ উপায়ুক্তই উপ উচ্চায়ুক্তৰ পত্ৰৰ পিছতে ব্যক্তিজনৰ পৰিয়ালৰ সন্ধান কৰাৰ বাবে আৰক্ষীক নিৰ্দেশ দিছিল।
“সি হেৰোৱা দিনা জানাৰাম চৌকালৈ সি মোৰ চাইকেলখন লৈ ওলাই গৈছিল আৰু তেতিয়াৰে পৰা চাইকেলো নাই, মানুহো নাই,” নিৰুদ্দেশৰ দিনটোৰ পিতৃৰ স্মৃতি।
এতিয়া তিনি বছৰ পিছত হাজৰিকাৰ সম্ভেদ পাই পৰিয়ালটো আনন্দিত হৈছে যদিও একেটা সময়তে বিষাদেও তেওঁলোকক আৱৰি ধৰিছে– ধন-বিত নোহোৱা তেওঁলোকৰ বাবে বাংলাদেশলৈ গৈ তেওঁক মুকলি কৰি অনাটো সম্ভৱ নহয়।
পৰিয়ালৰ একধৰণৰ একমাত্ৰ উপাৰ্জনকাৰী হাজৰিকাক যিকোনো প্ৰকাৰে মোকলাই অনাৰ ব্যৱস্থা কৰাৰ বাবে পৰিয়ালটোৱে এতিয়া চৰকাৰৰ মুখলৈকে বাট চাইছে।
মঙলদৈৰ লগতে সমগ্ৰ দৰং জিলাতে কথাটোৱে ব্যাপক চাঞ্চল্য সৃষ্টি কৰিছে।
সোণোৱাল চৰকাৰে দৰিদ্ৰ লোকজনক মোকলাই অনাৰ ব্যৱস্থা কৰিবনে?
দৰিদ্ৰ অসমীয়াক বাংলাদেশী জে’লত পচিবলৈ কিয় দিছে চৰকাৰে?
