আমেৰিকাই তিনিজন ভাৰতীয়ক হত্যা কৰাৰ পিছতো নীৰৱ মোদী চৰকাৰ, ক্ষোভ প্ৰকাশ প্ৰাক্তন মেজৰ জেনেৰেল জি ডি বক্সীৰ
ওমান সাগৰত ভাৰতীয় নাবিকৰ মৃত্যুৰ ঘটনাক লৈ কেন্দ্ৰীয় চৰকাৰ আৰু আমেৰিকা যুক্তৰাষ্ট্ৰৰ বিৰুদ্ধে তীব্ৰ ক্ষোভ প্ৰকাশ কৰিছে প্ৰাক্তন মেজৰ জেনেৰেল জি ডি বক্সীয়ে। তেওঁ কয় যে মাত্ৰ চাৰি দিনৰ ভিতৰত তিনিখন জাহাজত আক্ৰমণ চলাই তিনিজন ভাৰতীয় নাগৰিকৰ প্ৰাণ কাঢ়ি লোৱা হৈছে। ইয়াৰ পিছতো ভাৰত চৰকাৰৰ তৰফৰ পৰা যেনেধৰণৰ কঠোৰ প্ৰতিক্ৰিয়া প্ৰকাশ পাব লাগিছিল, তেনে দেখা পোৱা নগ’ল। ভাৰতীয়সকলৰ জীৱনৰ মূল্য আছে বুলি উল্লেখ কৰি তেওঁ কয় যে তিনিটা ভাৰতীয় পৰিয়ালত এতিয়া শোকৰ ছাঁ পৰিছে, কিন্তু দেশৰ চৰকাৰে এই সন্দৰ্ভত একোৱেই মাত মতা নাই।
আমেৰিকাৰ ভূমিকাৰ ওপৰত প্ৰশ্ন উত্থাপন কৰি প্ৰাক্তন মেজৰ জেনেৰেলগৰাকীয়ে কয় যে আমেৰিকাই এফালে ভাৰতৰ ওপৰত পঞ্চাশ শতাংশ শুল্ক জাপি দিয়াৰ কথা কৈছে আৰু আনফালে ৰাছিয়াৰ পৰা কম মূল্যত তেল ক্ৰয় কৰাৰ বাবে পাঁচশ শতাংশ পৰ্যন্ত শুল্ক বৃদ্ধিৰ ভাবুকি দিছে। কেৱল এয়াই নহয়, ভাৰতে লঘু যুঁজাৰু বিমানৰ বাবে এশটা ইঞ্জিনৰ ধন আদায় দিয়াৰ চাৰি বছৰৰ পিছতো অতি কম সংখ্যক ইঞ্জিনহে লাভ কৰিছে। প্ৰথমতে মাত্ৰ দুটা ইঞ্জিন দিয়া হৈছিল আৰু পৰৱৰ্তী সময়ত প্ৰধানমন্ত্ৰী পৰ্যায়ত এই বিষয়টো উত্থাপন কৰাৰ পিছতহে আৰু পাঁচটা ইঞ্জিন যোগান ধৰা হয়, যিয়ে ভাৰতীয় বায়ুসেনাৰ সামৰ্থ্যত প্ৰভাৱ পেলাইছে।
জাহাজৰ ওপৰত চলোৱা সামৰিক কাৰ্যৱস্থাক লৈও তেওঁ সন্দেহ প্ৰকাশ কৰিছে। তেওঁ দাবী কৰা মতে আমেৰিকান সেনাই মিছাইল ব্যৱহাৰ কৰি জাহাজখনৰ ইঞ্জিনক লক্ষ্য কৰি লৈছিল। সাধাৰণতে এনে পৰিস্থিতিত প্ৰথমতে সতৰ্কবাণী দিয়া হয়, বাৰ্তালাপ সংৰক্ষণ কৰা হয় আৰু প্ৰয়োজন হ’লে জাহাজখন জব্দ কৰা হয়। কিন্তু কোনো সতৰ্কবাণী নিদিয়াকৈ পোনপটীয়াভাৱে কৰা এই আক্ৰমণ এক গুৰুতৰ বিষয় আৰু ইয়াৰ বাবে আমেৰিকা জবাবদিহি হ’ব লাগে।
প্ৰাক্তন সামৰিক বিষয়াজনে স্পষ্ট কৰি দিয়ে যে তিনিজন ভাৰতীয়ৰ মৃত্যুক কোনো কাৰণতে আওকাণ কৰিব নোৱাৰি। ভাৰত চৰকাৰে এই ক্ষেত্ৰত কঠোৰ স্থিতি গ্ৰহণ কৰি মৃত নাবিকসকলৰ পৰিয়ালৰ বাবে উপযুক্ত ক্ষতিপূৰণ দাবী কৰিব লাগে। যিকোনো ভাৰতীয় নাগৰিকৰ জীৱন অত্যন্ত মূল্যবান আৰু কোনো চৰকাৰেই এই স্পৰ্শকাতৰ বিষয়টোত মনে মনে থাকি সকলো স্বাভাৱিক হৈ থকা বুলি দেখুৱাব নোৱাৰে। এফালে আমেৰিকাই নিজক ভাৰতৰ বন্ধু বুলি দাবী কৰে আৰু আনফালে ভাৰতীয়ৰ মৃত্যুৰ কাৰণ হৈ পৰে, এই কথাই দুয়োখন দেশৰ সম্পৰ্কৰ ওপৰত ডাঙৰ প্ৰশ্নবোধক চিহ্নৰ সৃষ্টি কৰিছে।