মধ্যপ্ৰাচ্যৰ সংকটৰ মাজতে ফ্ৰান্সত পুনৰবাৰ বিশ্বৰ আগশাৰীৰ নেতাসকল একত্ৰিত হ‘বলৈ গৈ আছে। এই সময়ছোৱাতে আমেৰিকাৰ ৰাষ্ট্ৰপতি ডনাল্ড ট্ৰাম্প আৰু ভাৰতৰ প্ৰধানমন্ত্ৰী নৰেন্দ্ৰ মোদী ফ্ৰান্সত উপস্থিত হ’ব। দুয়োগৰাকী নেতাই বিভিন্ন কাৰ্যসূচীত অংশগ্ৰহণ কৰাৰ লগতে বহুতো গুৰুত্বপূৰ্ণ বিষয়ত আলোচনা কৰাৰ সম্ভাৱনা আছে। জানিব পৰা মতে, প্ৰধানমন্ত্ৰী নৰেন্দ্ৰ মোদী আৰু আমেৰিকাৰ ৰাষ্ট্ৰপতি ডনাল্ড ট্ৰাম্পে ফ্ৰান্সত এক বৈঠকত মিলিত হ’ব আৰু এই সাক্ষাৎ অহা সোতৰ জুন তাৰিখে হোৱাৰ কথা আছে। আমেৰিকাৰ প্ৰশাসনৰ সূত্ৰৰ পৰা জানিব পৰা মতে, ৰাষ্ট্ৰপতি ট্ৰাম্প সোমবাৰে পুৱা নিজৰ চৰকাৰী বাসভৱনৰ পৰা যাত্ৰা আৰম্ভ কৰিব। নিজ দেশৰ এক কাৰ্যসূচীত অংশগ্ৰহণ কৰাৰ পিছত তেওঁ ফ্ৰান্সৰ ইভিয়ান-লেছ-বেইনছত উপস্থিত হ’ব। তাত অনুষ্ঠিত হ’বলগীয়া সন্মিলনত ট্ৰাম্পে বিশ্বৰ অন্যান্য প্ৰধান অৰ্থনীতিৰ দেশসমূহৰ নেতাসকলৰ লগতো বৈঠকত মিলিত হ’ব।
প্ৰধানমন্ত্ৰী নৰেন্দ্ৰ মোদীয়ে ইতিমধ্যে শনিবাৰে ফ্ৰান্স আৰু শ্ল‘ভাকিয়া ভ্ৰমণৰ বাবে যাত্ৰা কৰিছে। ভাৰতৰ বৈদেশিক নীতি আৰু কৌশলগত অংশীদাৰিত্বৰ দিশৰ পৰা এই ভ্ৰমণ অতিশয় তাৎপৰ্যপূৰ্ণ বুলি গণ্য কৰা হৈছে। ফ্ৰান্সত প্ৰধানমন্ত্ৰী মোদীয়ে ৰাষ্ট্ৰপতি ইমানুৱেল মেক্ৰ’নক সাক্ষাৎ কৰিব। এই বৈঠকত দুয়োখন দেশৰ মাজত প্ৰতিৰক্ষা সহযোগিতা অধিক সুদৃঢ় কৰাৰ ওপৰত বিশেষ গুৰুত্ব প্ৰদান কৰা হ’ব। যাত্ৰাৰ পূৰ্বে প্ৰধানমন্ত্ৰী মোদীয়ে সামাজিক মাধ্যমৰ জৰিয়তে নিজৰ ভ্ৰমণসূচীৰ বিষয়ে অৱগত কৰে। তেওঁ জনায় যে ফ্ৰান্স আৰু শ্ল’ভাকিয়া ভ্ৰমণৰ সময়ত তেওঁ দ্বিপাক্ষিক আলোচনা, বহুপাক্ষিক বৈঠক আৰু প্ৰবাসী ভাৰতীয় সমাজৰ সৈতে মত বিনিময়ৰ দৰে বিভিন্ন কাৰ্যসূচীত অংশগ্ৰহণ কৰিব। এই যাত্ৰাৰ মূল উদ্দেশ্য হৈছে দুয়োখন দেশৰ সৈতে অৰ্থনৈতিক, প্ৰযুক্তিগত আৰু সাংস্কৃতিক সম্পৰ্ক অধিক মজবুত কৰা।
এই গুৰুত্বপূৰ্ণ সন্মিলনৰ সময়ত বিশ্বৰ অৰ্থনীতি, সামগ্ৰী যোগান শৃংখলা শক্তিশালী কৰা, অবৈধ প্ৰব্ৰজনৰ প্ৰত্যাহ্বান আৰু কৃত্ৰিম বুদ্ধিমত্তাৰ দৰে দ্ৰুতগতিত বিকশিত হোৱা বিষয়সমূহৰ ওপৰত বিস্তৃত আলোচনা হোৱাৰ আশা কৰা হৈছে। বৰ্তমানৰ বিশ্বৰ পৰিস্থিতিলৈ চাই অৰ্থনৈতিক আৰু প্ৰযুক্তিগত সহযোগিতাই এই বৈঠকৰ প্ৰধান কাৰ্যসূচী হ’ব বুলি ধাৰণা কৰা হৈছে।
আনহাতে, আমেৰিকা আৰু ইৰাণৰ মাজত চলি থকা সংঘাটৰ মাজতে পাকিস্তানৰ প্ৰধানমন্ত্ৰী শ্বেহবাজ শ্বৰীফে এক ডাঙৰ দাবী কৰিছে। তেওঁ প্ৰকাশ কৰিছে যে দুয়োখন দেশৰ মাজত প্ৰস্তাৱিত শান্তি চুক্তি অহা চৌবিশ ঘণ্টাৰ ভিতৰত চূড়ান্ত হ’ব পাৰে। তেওঁৰ এই মন্তব্যই ইংগিত দিছে যে দীৰ্ঘদিন ধৰি চলি থকা আলোচনা এতিয়া এক নিৰ্ণায়ক পৰ্যায়ত উপনীত হৈছে।
