পাকিস্তানৰ এগৰাকী অনুভৱী বলাৰক অতি শীঘ্ৰে টি-১০ টুৰ্মামেণ্টত অংশ লোৱা দেখা যাব। বাওঁহতীয়া এই বলাৰজনক আবু ধাবিত হ’বলগীয়া টি-২০ টুৰ্ণামেণ্টৰ বাবে ভাৰতৰ এটা ফ্ৰেঞ্চাইজিয়ে বাচনি কৰিছে।
মহম্মদ আমীৰক পুণে ডেভিলছ দলত অন্তৰ্ভুক্ত কৰা হৈছে। টি-১০ লীগখনৰ অফিচিয়েল পেজৰ তৰফৰ পৰা ছ’চিয়েল মিডিয়াযোগে এই কথা জানিবলৈ দিয়ে।
লীগৰ দল কৰ্ণাটক টাস্কাৰ্ছৰ নাম সলনি কৰি পুণে ডেভিলছ কৰা হৈছে।
উল্লেখ্য যে পাকিস্তানৰ বাঁওহতীয়া বেগী বলাৰ মহম্মদ আমীৰে যোৱা বছৰ টেষ্ট ক্ৰিকেটৰ পৰা অৱসৰ গ্ৰহণ কৰিছিল।
আমীৰে দীৰ্ঘ সময় ধৰি ফ্ৰেঞ্চাইজি ক্ৰিকেট খেলি আছে। অলপতে তেওঁক লংকা প্ৰীমিয়াৰ লীগৰ প্ৰথম সংস্কৰণত গল গ্লেডিয়টৰ্ছৰ হৈ খেলা পৰিলক্ষিত হয়।
গ্লেডিয়টৰ্ছে প্ৰতিযোগিতাখনৰ ফাইনেলত উপনীত হোৱাৰ ক্ষেত্ৰত আমীৰে গুৰুত্বপূৰ্ণ ভুমিকা গ্ৰহণ কৰিছিল। অৱশ্যে তেওঁৰ দলটো ফাইনেলত পৰাস্ত হৈছিল।
প্ৰতিযোগিতাখনত আমীৰে মুঠ ১১টা উইকেট দখল কৰে।
উল্লেখ্য যে অহা ২৮ জানুৱাৰিৰ পৰা ৬ ফেব্ৰুৱাৰিলৈ আবু ধাবিত চলিব টি-১০ প্ৰতিযোগিতাখন। আঠটা দলে অংশ ল’বলগীয়া প্ৰতিযোগিতাখনৰ সকলো মেচ শ্বেখ জায়েদ ষ্টেডিয়ামত অনুষ্ঠিত হ’ব।
ইয়াৰ পূৰ্বে এই প্ৰতিযোগিতাখন ১৮ নৱেম্বৰৰ পৰা ২৯ নৱেম্বৰলৈ চলাৰ কথা আছিল যদিও ক’ৰ’না ভাইৰাছৰ বাবে জানুৱাৰিলৈ পিছুৱাই দিয়া হয়।
প্ৰতিযোগিতাখনত অংশ ল’বলগীয়া দল কেইটা হৈছে- আবু ধাবি, মৰাঠা এৰেবিয়ানছ, বাংলা টাইগাৰ্ছ, ডেক্কান গ্লেডিয়েটৰ্ছ, কলনদৰ্ছ, দিল্লী বুলছ, নৰ্দান ৱাৰিয়ৰ্ছ আৰু পুনে ডেভিলছ।
