কেইটামান দিন পূৰ্বলৈকে ভাৰতীয় ক্ৰিকেটত এগৰাকী খৰচী বলাৰ হিচাপে ক্ৰিকেট অনুৰাগীৰ ট্ৰলৰ সন্মুখীন হৈছিল মহম্মদ চিৰাজ। লাইন-লেংথত ধাৰাবাহিকতা ৰক্ষা কৰিব নোৱাৰাৰ বাবে নিজৰ স্পেলত যথেষ্ট ৰান খৰচ কৰিবলগীয়া হৈছিল পেচাৰগৰাকীয়ে। কিন্তু হঠাতে যেন উদীয়মান পেচাৰগৰাকীয়ে বিচাৰি পালে সঠিক লয়।
২০২১ ৰ ভাৰতৰ ঐতিহাসিক গাবা টেষ্টে চিৰাজৰ ক্ৰিকেট কেৰিয়াললৈ আনি দিছিল সেই লয়। গাবা টেষ্টে দিয়া আত্মবিশ্বাস, কঠোৰ অধ্যৱসায় আৰু অনুশীলনৰ বলত একালৰ সেই খৰচী চিৰাজ এতিয়া আই চি চি- ৰ এদিনীয়া ৰেংকিঙত বিশ্বৰ শীৰ্ষস্থানৰ বলাৰ।
আজি আই চি চি- এ ঘোষণা কৰা নতুন ৰেংকিং তালিকাত শীৰ্ষস্থানত উপনীত হৈছে ভাৰতীয় পেচাৰগৰাকী। শেহতীয়াকৈ ভাৰতীয় দলৰ হৈ আগবঢ়োৱা চমকপ্ৰদ প্ৰদৰ্শনৰ ফলশ্ৰুতিত এই ঈৰ্ষণীয় সাফল্য অৰ্জন কৰিবলৈ সক্ষম হৈছে চিৰাজ।
ভাৰতৰ তাৰকা বলাৰ যশপ্ৰীত বুমৰাহৰ অনুপিস্থিত বিগত সময়চোৱাত চিৰাজে দক্ষতাৰে বহন কৰিছে পেচ আক্ৰমণৰ দায়িত্ব। পাৱাৰপ্লেত উইকেট দখলৰ সাৰ্থকতাৰ লগতে চিৰাজে মিতব্যয়ী বলিঙেৰে ভাৰতীয় পেচ বলিং আক্ৰমণক এক নতুন শক্তি প্ৰদান কৰিছে।
আজি ঘোষিত ৰেংকিঙত চিৰাজে নিউজিলেণ্ডৰ ট্ৰেণ্ট ব’ল্ট আৰু অষ্ট্ৰেলিয়াৰ জ’ছ হেজলউডক অতিক্ৰম কৰি প্ৰথমবাৰৰ বাবে শীৰ্ষ ৰেংকিঙৰ এদিনীয়া বলাৰ হিচাপে পৰিগণিত হয়। যোৱা এটা বছৰত চিৰাজৰ দুৰ্দান্ত ফৰ্মে খেলুৱৈগৰাকীৰ কেৰিয়াৰত এই গতি প্ৰদান কৰিছে।
শেহতীয়াকৈ শ্ৰীলংকা আৰু নিউজিলেণ্ডৰ বিৰুদ্ধে চিৰাজে আগবঢ়াইছিল দমনীয় প্ৰদৰ্শন। শ্ৰীলংকাৰ বিৰুদ্ধে তিনিখন মেচৰ এদিনীয়া শৃংখলাত ৯টা উইকেট দখল কৰা চিৰাজে নিউজিলেণ্ডৰ বিৰুদ্ধে সদ্যসমাপ্ত শৃংখলাত দুখন মেচত পাঁচটা উইকেট দখল কৰিছিল।
দুটা স্থানৰ উত্তৰণ ঘটা চিৰাজে ৭২৯ ৰেটিং পইণ্টেৰে শীৰ্ষস্থানত থকাৰ বিপৰীতে ৭২৭ পইণ্টেৰে দ্বিতীয় স্থানত আছে অষ্ট্ৰেলিয়াৰ জ’ছ হেজলউড। আনহাতে তৃতীয় স্থানত থকা ট্ৰেণ্ট ব’ল্টৰ ৰেটিং পইণ্ট হৈছে ৭০৮।
আনহাতে বেটাৰৰ তালিকাত শীৰ্ষ দহৰ ভিতৰত আছে তিনি ভাৰতীয়। শেহতীয়াকৈ ভাৰতৰ অপেনিঙৰ দায়িত্ব সুচাৰুৰূপে পালন কৰি চমকপ্ৰদ প্ৰদৰ্শন দাঙি ধৰা যুৱ বেটাৰ শুভমন গিল কেৰিয়াৰ শ্ৰেষ্ঠ ষষ্ঠ স্থানত উপনীত হৈছে। গিলৰ লগতে শীৰ্ষ দহত থকা আন দুগৰাকী ভাৰতীয় বেটাৰ হৈছে তাৰকাদ্বয় ৰোহিত শৰ্মা আৰু বিৰাট কোহলী।
বিৰাট কোহলী ঘোষিত ৰেংকিঙত সপ্তম স্থানত থকাৰ বিপৰীতে অধিনায়ক ৰোহিত শৰ্মা আছে অষ্টম স্থানত। পাকিস্তানৰ অধিনায়ক বাবৰ আজমে এই তালিকাত শীৰ্ষস্থান অক্ষুণ্ণ ৰাখিছে।
