মাৰ্ঘেৰিটাত ডেৰ শতাধিক লোকৰ কংগ্ৰেছত যোগদান
অসমত ২০২১ নিৰ্বাচনী চমু চাপি অহাৰ লগে লগে ৰাজনৈতিক দলসমূহৰ মাজত কুছকাৱাজ বৃদ্ধি পাইছে।
মাৰ্ঘেৰিটাত আজি শামুকজান আৰু ইনথেমৰ গাঁও পঞ্চায়তৰ অধীনৰ প্ৰায় ডেৰ শতাধিক লোকে আনুষ্ঠানিকভাৱে কংগ্ৰেছ দলত যোগদান কৰে।
এইসকলৰ মাজত বিজেপি দলৰ সদস্য তথা কৰ্মীও থকা বুলি মাৰ্ঘেৰিটা ব্লক কংগ্ৰেছৰ সম্পাদক তাৰা প্ৰসাদ দিহিঙীয়াই সংবাদ মাধ্যমক জানিবলৈ দিয়ে।
মাৰ্ঘেৰিটা ব্লক কংগ্ৰেছ কমিটিৰ উদ্যোগত মাৰ্ঘেৰিটা নগৰস্থিত কংগ্ৰেছ ভৱনত আয়োজিত এক যোগদান কাৰ্যসূচী অনুষ্ঠানৰ পৌৰোহিত্য কৰে ব্লক কংগ্ৰেছৰ সভাপতি মনোৰঞ্জন বৰগোহাঁয়ে।
তিনিচুকীয়া জিলা কংগ্ৰেছৰ সভাপতি জয়ন্ত কলিতাই সভাত অংশগ্ৰহণ কৰি দিয়া ভাষণত বিজেপি নেতৃত্বাধীন চৰকাৰক তীব্ৰ সমালোচনা কৰি স্বেচ্ছাচাৰী শাসন চলোৱাৰ অভিযোগ উত্থাপন কৰে।
কেন্দ্ৰীয় চৰকাৰৰ কৃষক বিৰোধী নীতিৰো সমালোচনা কৰে নেতা গৰাকীয়ে।
ব্লক কংগ্ৰেছৰ উপ সভাপতিদ্বয় ক্ৰমে সৰোজ ৰয় আৰু তৌফিক খান, কোষাধ্যক্ষ নৃপেন ৰয়, সম্পাদক ৰুবুল গগৈ, ব্লক মহিলা কংগ্ৰেছৰ সভানেত্ৰী অলকা শ্যাম গোহাঁই, ব্লক কংগ্ৰেছৰ সম্পাদক সুনীতা নেৱাৰ, জিলা যুৱ কংগ্ৰেছৰ সম্পাদক গৌৰৱ শৰ্মা, বিধান সভা সমষ্টি যুৱ কংগ্ৰেছৰ উপ সভাপতি আলফাজ আহমেদ, সম্পাদকদ্বয় ক্ৰমে নজৰুল হুছেইন আৰু প্ৰাঞ্জল চেতিয়া আদি উপস্থিত আজিৰ যোগদান কাৰ্যসূচী অনুষ্ঠিত হয়।
সভাৰ অন্তত সভাপতি মনোৰঞ্জন বৰগোহাঁয়ে এক প্ৰেছ মিটৰ যোগে মাৰ্ঘেৰিটা সমষ্টিত অৰোণোদয় আচঁনি ৰূপায়নত ব্যাপক দুৰ্নীতি হোৱাৰ অভিযোগ কৰি কয় যে এই সন্দৰ্ভত দলৰ ফালৰ পৰা দুৰ্নীতি বন্ধৰ দাবীত অনতিপলমে আন্দোলনৰ কাৰ্যসূচী গ্ৰহণ কৰা হ’ব।
কংগ্ৰেছ নেতৃবৃন্দই আজি নতুনকৈ কংগ্ৰেছ দলত যোগদান কৰাসকলক আনুষ্ঠানিকভাৱে আদৰণি জনায়।