অসমৰ ভূমি আৰু মানৱ অধিকাৰ কৰ্মী তথা গ্ৰেটাৰ কাজিৰঙা লেণ্ড এণ্ড হিউমেন ৰাইটছ প্ৰটেকশ্যন কমিটীৰ আহ্বায়ক প্ৰণৱ দলেৰ বিৰুদ্ধে ৰাষ্ট্ৰীয় সুৰক্ষা আইন (NSA) প্ৰয়োগ কৰাৰ ঘটনাক লৈ দেশজুৰি ৬০ৰো অধিক গণসংগঠন, মানৱ অধিকাৰ সংগঠন, শ্ৰমিক সংগঠন আৰু নাগৰিক সমাজে তীব্ৰ প্ৰতিবাদ সাব্যস্ত কৰিছে।
সোমবাৰে প্ৰকাশিত এক যৌথ বিজ্ঞপ্তিত সংগঠনসমূহে চৰকাৰৰ এই পদক্ষেপক প্ৰতিহিংসামূলক আৰু আইনৰ অপব্যৱহাৰ বুলি অভিহিত কৰি প্ৰণৱ দলেৰ তাৎক্ষণিক মুক্তি দাবী জনাইছে।
যৌথ বিবৃতিটোত উল্লেখ কৰা হৈছে যে, কাজিৰঙা ৰাষ্ট্ৰীয় উদ্যানৰ সমীপৰ ইংলে পাঠাৰত প্ৰস্তাৱিত হায়াট বিলাসী ৰিজৰ্ট প্ৰকল্পৰ বিৰুদ্ধে ২০২৬ চনৰ ২৮ জুনত অনুষ্ঠিত প্ৰতিবাদৰ পাছত অসম আৰক্ষীয়ে প্ৰণৱ দলেক ধৰি কেইবাজনো জনজাতীয় আৰু আদিবাসী অধিকাৰ কৰ্মীৰ বিৰুদ্ধে গোচৰ ৰুজু কৰে। ১২ জুলাইত প্ৰণৱ দলেক গ্ৰেপ্তাৰ কৰাৰ লগতে অমিত নাগ, বিজিত কুটুম, ভাস্কৰ শইকীয়া আৰু ৰাজীৱ পেগুকো গ্ৰেপ্তাৰ কৰা হয়।
বিবৃতি অনুসৰি, ২৯ জুলাইত গোলাঘাট জিলা আৰু সত্ৰ ন্যায়ালয়ে প্ৰণৱ দলে আৰু আন চাৰিজন অভিযুক্তক জামিন মঞ্জুৰ কৰে। কিন্তু তাৰ পিছদিনাই, অৰ্থাৎ ৩০ জুলাইত অসম চৰকাৰে ৰাষ্ট্ৰীয় সুৰক্ষা আইনৰ ধাৰা ৩(২)ৰ অধীনত প্ৰণৱ দলেৰ বিৰুদ্ধে ৰাষ্ট্ৰীয় সুৰক্ষা আইন প্ৰয়োগ কৰে। সংগঠনসমূহৰ অভিযোগ অনুসৰি আদালতে জামিন দিয়াৰ পিছতো তেওঁক কাৰাগাৰত ৰাখিবলৈকে এই আইন প্ৰয়োগ কৰা হৈছে।
বিজ্ঞপ্তিটোত দাবী কৰা হৈছে যে, জামিনৰ আদেশত আদালতে আৰক্ষীৰ বহু অভিযোগ সমৰ্থন কৰিব পৰা ভিডিঅ’ প্ৰমাণৰ অভাৱৰ কথা উল্লেখ কৰাৰ লগতে পৰিৱেশ, জীৱিকা আৰু স্থানীয় সম্প্ৰদায়ৰ উদ্বেগক দমন কৰিবলৈ ফৌজদাৰী আইন ব্যৱহাৰ কৰা উচিত নহয় বুলি পৰ্যবেক্ষণ আগবঢ়াইছিল। লগতে চাহ জনজাতি সম্প্ৰদায়ৰ দৰে প্ৰান্তীয় জনগোষ্ঠীৰ ক্ষেত্ৰত সামাজিক কৰ্মী আৰু সম্প্ৰদায়ৰ নেতাসকলক আলোচনাৰ অংশীদাৰ কৰাৰ প্ৰয়োজনীয়তাৰ কথাও আদালতে উল্লেখ কৰিছিল।
বিবৃতিত কোৱা হৈছে যে, প্ৰণৱ দলেই বহু বছৰ ধৰি কাজিৰঙা অঞ্চলত ভূমি অধিকাৰ, উচ্ছেদ, পৰিৱেশ সংৰক্ষণ আৰু জনজাতীয় সম্প্ৰদায়ৰ অধিকাৰৰ প্ৰশ্ন উত্থাপন কৰি আহিছে। ইংলে পাঠাৰত প্ৰস্তাৱিত হায়াট ৰিজৰ্টৰ বাবে ভূমি আবণ্টনক লৈ স্থানীয় পৰিয়ালসমূহে আপত্তি জনাই গুৱাহাটী উচ্চ ন্যায়ালয়ৰ কাষ চাপিছে বুলিও বিজ্ঞপ্তিত উল্লেখ কৰা হৈছে।
যৌথ বিবৃতিত আৰু অভিযোগ কৰা হৈছে যে NSA-ৰ অধীনত জাৰি কৰা আটকাদেশত প্ৰণৱ দলেৰ বিভিন্ন প্ৰতিবাদত অংশগ্ৰহণ, বিদেশ ভ্ৰমণ আৰু সন্দেহজনক বিদেশী লেনদেনৰ দৰে বিষয় উল্লেখ কৰা হৈছে। কিন্তু জামিনৰ শুনানিত আদালতে এই বিষয়সমূহ নথি-পত্ৰৰ জৰিয়তে তদন্ত কৰিব পাৰি বুলি মত প্ৰকাশ কৰিছিল। সংগঠনসমূহৰ মতে, এই অভিযোগসমূহে ৰাষ্ট্ৰীয় সুৰক্ষাৰ প্ৰতি ভাবুকিৰ সলনি এগৰাকী সক্ৰিয় সামাজিক কৰ্মীক লক্ষ্য কৰি লোৱা পদক্ষেপহে প্ৰতিফলিত কৰে।
বিবৃতিত ২০১৭ চনত কৃষক নেতা অখিল গগৈৰ বিৰুদ্ধেও NSA প্ৰয়োগ কৰা হৈছিল বুলি উল্লেখ কৰি, পিছত গুৱাহাটী উচ্চ ন্যায়ালয়ে সেই আটকাদেশ বাতিল কৰিছিল বুলিও উল্লেখ কৰা হৈছে। সংগঠনসমূহৰ মতে, বৰ্তমানৰ ঘটনাই সেই একেই ধাৰাৰ পুনৰাবৃত্তি কৰিছে।
যৌথ বিবৃতিত স্পষ্টকৈ কোৱা হৈছে যে ভূমি, পৰিৱেশ আৰু জনজাতীয় অধিকাৰৰ সপক্ষে শান্তিপূৰ্ণভাৱে মাত মতাটো ৰাষ্ট্ৰীয় সুৰক্ষাৰ প্ৰতি ভাবুকি হ’ব নোৱাৰে। ভাৰতীয় সংবিধানে মত প্ৰকাশৰ স্বাধীনতা আৰু শান্তিপূৰ্ণভাৱে সমবেত হোৱাৰ অধিকাৰ সুৰক্ষিত কৰিছে বুলি উল্লেখ কৰাৰ লগতে পৰিৱেশ ৰক্ষাৰ বাবে কাম কৰা নাগৰিকক অপৰাধী হিচাপে চিহ্নিত কৰাৰ প্ৰৱণতা বন্ধ কৰাৰ আহ্বান জনোৱা হৈছে।
ইয়াৰ লগতে, ৰাষ্ট্ৰসংঘৰ কেইবাজনো বিশেষজ্ঞই পূৰ্বে প্ৰণৱ দলে আৰু আন কৰ্মীসকলৰ গ্ৰেপ্তাৰক লৈ উদ্বেগ প্ৰকাশ কৰি তেওঁলোকৰ মুক্তিৰ আহ্বান জনাইছিল বুলিও বিজ্ঞপ্তিত উল্লেখ কৰা হৈছে।
যৌথ বিবৃতিত সংগঠনসমূহে প্ৰণৱ দলেৰ বিৰুদ্ধে ৰাষ্ট্ৰীয় সুৰক্ষা আইন তাৎক্ষণিকভাৱে বাতিল কৰা, তেওঁক আৰু এই গোচৰত গ্ৰেপ্তাৰ হোৱা সকলো কৰ্মীক মুক্তি দিয়া, কাজিৰঙা ভূমি আন্দোলনৰ সৈতে জড়িত সকলো গোচৰ প্ৰত্যাহাৰ আৰু কাজিৰঙা অঞ্চলত ভূমি আবণ্টন আৰু পৰ্যটন প্ৰকল্পসমূহ স্বচ্ছভাৱে পুনৰীক্ষণ কৰাৰ দাবী জনাইছে। লগতে জনজাতীয়, আদিবাসী, কৃষক আৰু বনবাসী সম্প্ৰদায়ৰ ভূমি অধিকাৰ সুৰক্ষিত কৰাৰ আহ্বান জনোৱা হৈছে।
