বিটিআৰ নিৰ্বাচনত বিপিএফৰ প্ৰাৰ্থী সকলে আত্মসমৰ্পন কৰক ৷ কিয়নো বিটিআৰত এতিয়া বিপিএফৰ অৱস্থা সোলোক ঢোলক। এই ভাষ্য তামুলপুৰৰ বিধায়ক ইমানুৱেল মোছাহাৰীৰ ৷
তামুলপুৰ বিধানসভা সমষ্টিৰ অন্তৰ্গত ২৭ নম্বৰ নাগ্ৰীজুলি পৰিষদীয় সমষ্টিৰ ৩ নম্বৰ ডোঙাৰগাওঁৰ ৰাম অৱতাৰ প্ৰাথমিক বিদ্যালয় খেলপথাৰত শনিবাৰে আবেলি নাগ্ৰীজুলি মণ্ডল বিজেপিৰ উদ্যোগত অনুস্থিত এখন যোগদান সমাৰোহত অংশ গ্ৰহন কৰি এইদৰে কয় তামুলপুৰৰ বিধায়ক ইমানুৱেল মোছাহাৰীয়ে ৷
বিধায়ক গৰাকীয়ে পুনৰ কয় যে হাগ্ৰামা মহিলাৰী আৰু তেওঁৰ কথাত উঠা বহা কৰা একাংশ নেতাৰ অতপালিৰ বাবে এতিয়া বিপিএফৰ বহু নেতা-কৰ্মী দল ত্যাগ কৰি বিজেপি দলত যোগদান কৰিছে ৷
তেওঁ কয় যে একনায়কত্ববাদেৰে বিগত সোতৰ বছৰে বিটিচিত শাসন চলোৱা হাগ্ৰামা মহিলাৰী কৰ্মকাণ্ডত অতিষ্ঠ হৈ শেহতীয়াকৈ ৰাজ্যসভাৰ সাংসদ তথা বিপিএফ দলৰ কাৰ্যকৰী সভাপতি বিশ্বজিৎ দৈমাৰীও বিপিএফ দলৰ কাৰ্যকৰী সভাপতি পদৰ পৰা পদত্যাগ কৰিছে ৷
অচিৰেই তেওঁৱো বিপিএফ দলৰ প্ৰাথমিক সদস্য পদৰ পৰাও পদত্যাগ কৰি বিজেপি দলত যোগদান কৰিব বুলি উল্লেখ কৰি মোছাহাৰীয়ে কয় যে হাগ্ৰামা এতিয়া অকলশৰীয়া ৷
এইবাৰ বিটিআৰ নিৰ্বাচনত বিপিএফ দলৰ যে শোচনীয় পৰাজয় হব সেয়া নিশ্চিত হৈছে বুলিও মোছাহাৰীয়ে মন্তব্য কৰে ৷
তামুলপুৰ সমষ্টিৰ অন্তৰ্গত পাঁচটা পৰিষদীয় সমষ্টিটো এজনো বিপিএফ দলৰ প্ৰাৰ্থী নিৰ্বাচনত জয়ী হব নোৱাৰে বুলি মন্তব্য কৰি তামুলপুৰ মহকুমাৰ পৰিষদীয় সমষ্টি কেইটাৰ বিপিএফৰ দলৰ প্ৰাৰ্থী কেইজনক নিৰ্বাচনত অযথা টকা পইচা খৰচ কৰাতকৈ নিৰ্বাচনী যুঁজৰ পৰা আঁতৰি থাকিবলৈ আহ্বান জনায় বিধায়ক গৰাকীয়ে ৷
সভাত ২৭ নম্বৰ নাগ্ৰীজুলি পৰিষদীয় সমষ্টিৰ বিজেপি দলৰ প্ৰাৰ্থী ধৰ্মনাৰায়ন দাসে নিজৰ বক্তব্যত কয় যে হাগ্ৰামা নেতৃত্বাধীন বিপিএফৰ ১৭ বছৰীয়া অপশাসনৰ পৰা পৰিত্ৰাণ বিচাৰি এতিয়া বিটিআৰবাসী বিভিন্ন জাতি-জনগোষ্ঠীৰ লোকে পৰিবৰ্তন বিচাৰি বিজেপি দলৰ প্ৰতি সমৰ্থন আগবঢ়াই দলত যোগদান কৰিছে ৷ বিজেপি দলৰ প্ৰতি বিটিআৰবাসীৰ অভূতপুৰ্ব সহাৰিয়েই বিটিআৰত বিজেপিৰ শাসন নিশ্চিত কৰিছে৷
তেওঁ লগতে কয় যে শেহতীয়াকৈ বিপিএফ দল ত্যাগ কৰি তামুলপুৰৰ বিধায়ক ইমানুৱেল মোছাহাৰী আৰু ৰাজ্য সভাৰ সাংসদ বিশ্বজিৎ দৈমাৰীয়ে বিজেপিত যোগদান কৰিবলৈ অহাৰ পাছত বিটিআৰত বিজেপিৰ শক্তি দুগুণ বৃদ্ধি হব ৷
নাগ্ৰীজুলি মণ্ডল বিজেপিৰ সম্পাদক অৰবিন্দ দাসে আঁত ধৰা আৰু সভাপতি ৰাম বাচতোলাৰ সভাপতিত্বত অনুষ্ঠিত যোগদান সমাৰেহত প্ৰাক্তন ভিচিডিচিৰ অধ্যক্ষ দেবেন মেধী আৰু বিশিষ্ট সমাজ কৰ্মী অমৰ প্ৰধানৰ নেতৃত্বত প্ৰায় পাঁচশ গৰাকী বিপিএফ দলৰ নেতা কৰ্মীয়ে বিজেপি দলত আনুষ্ঠানিক ভাৱে যোগদান কৰে ৷
শনিবাৰৰ যোগদান সমাৰোহত বাক্সা জিলা বিব্জেপিৰ সভাপতি ৰাম দাহাল, সম্পাদক ৰাজেশ বড়ো, বাক্সা জিলা বিজেপিৰ প্ৰাক্তন সভাপতি কৃষ্ণ স্বৰ্গীয়াৰী, বাক্সা জিলা যুৱ মৰ্চাৰ সভাপতি কৰন ছেত্ৰী, উপ সভাপতি ভজন দাসৰ লগতে বহু কেইজন নেতা কৰ্মী উপস্থিত থাকে ৷