মধ্যপ্ৰাচ্যৰ উত্তপ্ত পৰিস্থিতিৰ মাজতে এইবাৰ ইৰাণৰ চৰকাৰী সংবাদ মাধ্যমৰ ওপৰত চলিল এক অভূতপূৰ্ব চাইবাৰ আক্ৰমণ। ইজৰাইলৰ চোৰাংচোৱা সংস্থা মোছাদে ইৰাণৰ ৰাজ্যিক সম্প্ৰচাৰ সংস্থা আই আৰ আই বিৰ মুখ্য কাৰ্যালয়ত আক্ৰমণ চলোৱাৰ লগতে ইয়াৰ টিভি চেনেলসমূহ হেক কৰা বুলি বাতৰি প্ৰকাশ পাইছে। হেক কৰাৰ পিছতে ইৰাণৰ চৰকাৰী টিভিৰ পৰ্দাত ইজৰাইলৰ প্ৰধানমন্ত্ৰী বেঞ্জামিন নেতানিয়াহু আৰু আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ভাষণ পোনপটীয়াকৈ সম্প্ৰচাৰ কৰা হয়। জেৰুজালেম পোষ্টৰ তথ্য অনুসৰি যোৱা দেওবাৰে এই আক্ৰমণ সংঘটিত হৈছিল আৰু সেই সময়ত সমগ্ৰ ইৰাণতে এই দুই বিশ্ব নেতাৰ ভাষণ সম্প্ৰচাৰিত হৈ আছিল।
ইৰাণৰ সৰ্বোচ্চ নেতা আয়াতুল্লাহ খামেনেই এক ভয়াৱহ আক্ৰমণত নিহত হোৱাৰ খবৰটো আই আৰ আই বিয়ে শনিবাৰে বিয়লি লাভ কৰিছিল। এই গুৰুত্বপূৰ্ণ খবৰটো দেওবাৰে আনুষ্ঠানিকভাৱে ঘোষণা কৰাৰ পৰিকল্পনা আছিল যদিও তাৰ পূৰ্বেই ইজৰাইলে সম্প্ৰচাৰ সংস্থাটোৰ মুখ্য কাৰ্যালয়ত আক্ৰমণ চলায়। অভিযোগ উঠিছে যে ইৰাণৰ ৰিভল্যুচনেৰী গাৰ্ড কৰ্পে ইজনে সিজনৰ সৈতে যোগাযোগৰ বাবে এই চৰকাৰী চেনেলটোক ব্যৱহাৰ কৰি আহিছিল। ইজৰাইলৰ মতে এই সংবাদ মাধ্যমে দীৰ্ঘদিন ধৰি ইজৰাইলক ধ্বংস কৰিবলৈ পাৰমাণৱিক অস্ত্ৰ ব্যৱহাৰৰ উচটনি দি আহিছে আৰু সেইবাবেই ইয়াক লক্ষ্য কৰি লোৱা হয়।
ইফালে ইৰাণৰ ওপৰত হোৱা এই আক্ৰমণৰ পাছতে তেহৰানে তীব্ৰ প্ৰতিশোধমূলক ব্যৱস্থা গ্ৰহণ কৰে। ইৰাণে সমগ্ৰ মধ্যপ্ৰাচ্যত বিয়পি থকা আমেৰিকা আৰু ইজৰাইলৰ সামৰিক ঘাটিসমূহলৈ লক্ষ্য কৰি ধাৰাবাহিক আক্ৰমণ চলায়। ডুবাইৰ পাম জুমেইৰা অঞ্চল আৰু বিশ্বৰ সৰ্বোচ্চ অট্টালিকা বুৰ্জ খলিফাৰ ওচৰতো কেইবাটাও বিস্ফোৰণৰ শব্দ শুনা যায়। নিৰাপত্তাজনিত কাৰণত বুৰ্জ খলিফা খালী কৰি দিয়াৰ লগতে সমগ্ৰ অঞ্চলটোত আতংকময় পৰিৱেশৰ সৃষ্টি হয়।
সংযুক্ত আৰব আমিৰশ্বাহীৰ প্ৰতিৰক্ষা মন্ত্ৰালয়ে জনোৱা অনুসৰি ইৰাণে আবুধাবিৰ নৌসেনাৰ ঘাটিত ড্ৰ’ন আক্ৰমণো চলাইছে। ইয়াৰ উপৰিও চৌদি আৰৱৰ ৰিয়াদত থকা আমেৰিকাৰ দূতাবাসতো আক্ৰমণ অব্যাহত থকা বুলি জানিব পৰা গৈছে। আমেৰিকা আৰু ইজৰাইলে ইৰাণৰ সৈতে লিপ্ত হোৱা এই সংঘাতৰ ফলত সমগ্ৰ বিশ্বতে এতিয়া এক যুদ্ধসদৃশ পৰিৱেশে বিৰাজ কৰিছে।
