‘বিটিচিত বিজেপিয়ে ২খন আসন লৈ দেখাওক। বিজেপি-BPFৰ ভিতৰুৱা বুজা-বুজি চলি আছে। ৩০+ আসন লৈ বিটিচিত চৰকাৰ গঠন কৰিম।’ বুধবাৰে দিছপুৰ প্ৰেছ ক্লাৱত এক সংবাদমেল সম্বোধন কৰি এই দাবী কৰে সাংসদ নৱ কুমাৰ শৰণীয়াই।
ইপিনে, আগন্তুক বিটিচি নিৰ্বাচনত প্ৰমোদ বড়ো জয়ী হোৱাৰ কোনো সম্ভাৱনা নাই বুলিও সংবাদমেলত শৰণীয়াই দাবী কৰে।
তদুপৰি সময়মতে ৰাজ্য চৰকাৰ আৰু নিৰ্বাচন আয়োগে বিটিচিত নিৰ্বাচন অনুষ্ঠিত কৰিবৰ নোৱাৰাৰ বাবে ধিক্কাৰ জনাই শৰণীয়াই লগতে অভিযোগ কৰি কয় ‘স্বতন্ত্ৰ নিৰ্বাচন আয়োগ চৰকাৰৰ মতেহে পৰিচালিত হৈছে। গণ সুৰক্ষা পাৰ্টি পূৰ্ণ পৰ্যায়ত যুঁজ দিবলৈ এতিয়া সাজু হৈ আছে। শেহতীয়াভাৱে জাতীয় দল-সংগঠনক চলে বলে হাত কৰাৰ চেষ্টা চলি আছে।’
‘বিটিচিবাসী ৰাইজৰ জয় সুনিশ্চিত, কোনেও এয়া সলনি কৰিব নোৱাৰে। গাঁৱলৈ বিভিন্ন ৰাজনৈতিক দলৰ নেতাক মাতি জনসাধাৰণৰ সন্মুখত জবাবদিহি কৰিম, সকলো উত্তৰ দিব লাগিব। নৱেম্বৰৰ প্ৰথম সপ্তাহৰ পৰা এনে বহু কাম-কাজ আৰম্ভ হ’ব।’ শৰণীয়াই লগতে কয়।
ইপিনে, বিটিচিত বড়ো ভাষা মুখ্য ভাষা হিচাপে স্বীকৃতি দিয়াক কেন্দ্ৰ কৰি ক্ষোভ প্ৰকাশ কৰি শৰণীয়াই কয় ‘বিটিচিত ৮১% মানুহে অসমীয়াতে লিখা পঢ়া কৰিছিল। আমাৰ চৰম দুৰ্ভাগ্য যে ৰাজ্য চৰকাৰে বিটিচিত বড়ো মুখ্য ভাষা কৰিলে।’
উক্ত সংবাদমেলৰ জৰিয়তে শৰণীয়াই ৰাজ্য চৰকাৰক এই সিদ্ধান্ত বাতিল কৰিবলৈ আহ্বান জনাই লগতে কয় ‘অন্যথা সমগ্ৰ অসমলৈ এই দাবী লৈ যাম। বড়ো মুখ্য ভাষা হৈ থাকক আপত্তি নাই, কিন্তু অসমীয়া ভাষা সহযোগী ভাষা হ’ব নোৱাৰে। বড়ো-অবড়ো কৰি চৰকাৰে অসমীয়া ভাষাটোক চাৰি নম্বৰলৈ লৈ গ’ল।’
‘ধৰ্মৰ নামত ৰাজনীতি কৰি বিটিচিত নিৰ্বাচন জিকিব নোৱাৰে বিজেপিয়ে। যিমান পাৰে সোনকালে বিটিচিৰ নিৰ্বাচন অনুষ্ঠিত কৰক।’ বিজেপিক কটাক্ষ কৰি সংবাদমেলত শৰণীয়াই এইদৰে কয়।
