অসম চৰকাৰৰ অভিলাষী আচঁনিৰ অধীনত আজি যোৰহাট জিলাৰ ৰাজৈ চাহ বাগিচাত আদৰ্শ হাইস্কুলৰ আধাৰশিলা স্থাপন কৰে যোৰহাট সংসদীয় সমষ্টিৰ সাংসদ তপন কুমাৰ গগৈয়ে।
এই অনুষ্ঠানত ভাষণ প্ৰদান কৰি বৰ্তমানৰ মিত্ৰজোঁটৰ চৰকাৰৰ কাম-কাজৰ খতিয়ান দাঙি ধৰি বাগিচা অঞ্চলত এনে ধৰণৰ বিদ্যালয় স্থাপনে বাগিচাৰ লোক সকলৰ জীৱন ধাৰনৰ মান উন্নত কৰিব বুলি মন্তব্য কৰে।
উল্লেখযোগ্য যে, ৰাজ্য চৰকাৰে সমগ্ৰ অসমৰ চাহ বাগিচা সমূহত মুঠ ১১৯ খন আদৰ্শ বিদ্যালয় স্থাপনৰ এক অভিলাষী আঁচনি হাতত লৈছে।
ইয়াৰ অংশ হিচাপে টীয়ক ৰাজৈ চাহ বাগিচাত অসম চৰকাৰৰ লোক নিৰ্মাণ বিভাগ (গৃহ)ৰ দ্বাৰা ১.৬ কোটি টকা ব্যয় সাপেক্ষে এখন আদৰ্শ বিদ্যালয় স্থাপন কৰিবলৈ লোৱা হৈছে।
ইয়াৰ উপৰি টীয়কৰ মাহাৰা গাঁৱৰ মূল পথটি প্ৰধান মন্ত্ৰী গ্ৰাম চড়ক যোজনাৰ অধীনত পকীকৰণৰ আধাৰশিলাও স্থাপন কৰে।উক্ত দুয়োটা অনুষ্ঠানত স্থানীয় বিধায়িকা ৰেণুপমা ৰাজখোৱাকে প্ৰমুখ্য কৰি দুয়োটা দলৰে কেইবাজনো বিষয়ববীয়া উপস্থিত থাকি সহযোগিতা আগবঢ়ায়।